الماتى وبلىسىندا جولداۋدان تۋىندايتىن مىندەتتەر بەلگىلەندى
ونىڭ بارىسىندا جولداۋدى جۇزەگە اسىرۋداعى وبلىستىق اتقارۋشى ورگانداردىڭ مىندەتتەرى تۋرالى ماسەلە قارالدى، دەپ حابارلايدى قازاقپارات.
ا. باتالوۆ پرەزيدەنتتىڭ بۇل جولداۋى وسىعان دەيىن جۇزەگە اسىرىلىپ جاتقان ستراتەگيالىق باستامالاردىڭ زاڭدى جالعاسى ەكەنىن اتاپ ءوتتى. ءار وتباسىنىڭ، ءاربىر ادامنىڭ جاعدايىن، تىرشىلىك ورتاسىن جاقسارتۋعا ارنالعان جولداۋدى ورىنداۋعا جەرگىلىكتى اتقارۋشى ورگاندار بۇگىننەن باستاپ كىرىسۋى كەرەكتىگىن قاداپ ايتتى.
الماتى وبلىسى اكىمىنىڭ باسپا ءسوز قىزمەتىنەن حابارلاعانداي، كوكسۋ اۋدانىنداعى ق. جالايري اتىنداعى مەكتەپ- گيمنازيا ديرەكتورىنىڭ ورىنباسارى ايدىنگۇل نۇرداۋلەتوۆا جولداۋدا ايتىلعان پەداگوگتاردىڭ مارتەبەسىن انىقتاۋ - شەشىمىن كوپتەن كۇتكەن ماسەلە ەكەندىگىن جەتكىزدى. سونىمەن قاتار جىلدىڭ باستى قۇجاتىندا ءۇش اۋىسىمدى مەكتەپتەر پروبلەماسىن شەشۋگە دە ەرەكشە نازار اۋدارىلعانى قۋانتادى.
«وتكەن جىلى وبلىستا «نۇرلى جول» باعدارلاماسىمەن 33 مەكتەپ سالىنسا، بيىل 9 جاڭا مەكتەپ پايدالانۋعا بەرىلگەن. سىزدەر مەكتەپ سالىپ بەرە بەرسەڭىزدەر، ءبىز قانشا بالا بولسا دا وقىتۋعا قۋانا كىرىسەمىز»، - دەدى ا. نۇرداۋلەتوۆا.
سول سياقتى وبلىستىق پەريناتالدى ورتالىقتىڭ دارىگەرى ەلەنا وسيپوۆا مەديتسينالىق قىزمەت كورسەتۋ ساپاسىن ارتتىرۋدا، دەنساۋلىق ساقتاۋ سالاسىن تسيفرلاندىرۋدا وزدەرىنە جۇكتەلىپ وتىرعان مىندەتتىڭ زور ەكەنىن ايتتى. سونداي-اق وعان قول جەتكىزۋگە وبلىستا بارلىق مۇمكىندىكتەر جاسالىپ وتىرعانىن جانە سوعان سايكەس ساپالى جۇمىس ىستەيتىندىكتەرىن اتاپ ءوتتى.
جيىندا، سونداي-اق اۋىل شارۋاشىلىعى، سپورت، جاستار ءىسى سالالارى بويىنشا دا ماماندار ءسوز الىپ، جولداۋعا قاتىستى ءوز وي- پىكىرلەرىن ءبىلدىردى.
مۇنان سوڭ جولداۋ تاپسىرمالارىنا وراي قاي سالادا قانداي مىندەتتەر كۇتىپ تۇرعانى، قاي باعىتتارعا باسىمدىق بەرىلۋى تيىستىگى جايىندا وبلىس اكىمى ا. باتالوۆ ناقتى مىندەتتەردى بەلگىلەپ بەردى.
وبلىس باسشىسىنىڭ ايتۋىنشا، ەكونوميكا جانە بيۋدجەتتىك جوسپارلاۋ باسقارماسى قىسقا مەرزىمدە ەلباسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىن ىسكە اسىرۋ جونىندەگى ءىس- شارالار جوسپارىن ازىرلەپ، سول جوسپار باسشىلىققا الىناتىن بولادى.
بيىلعى جولداۋدا «بيزنەستىڭ جول كارتاسى-2020» باعدارلاماسىن جىل سايىن سوماسى 30 ميلليارد تەڭگەگە قوسىمشا قارجىلاندىرا وتىرىپ، 2025 -جىلعا دەيىن ۇزارتۋ تاپسىرىلعان بولاتىن. ماسەلەن، باعدارلاما باستالعاننان بەرى وبلىس كاسىپكەرلەرى ءۇشىن 1219 جوبانى ىسكە اسىرۋعا 30,6 ميلليارد تەڭگەگە قولداۋ كورسەتىلگەن، جەتى مىڭ سەگىز ءجۇز جۇمىس ورنى اشىلىپ، 26 مىڭ جۇمىس ورنى ساقتالعان. سونىڭ ناتيجەسىندە شاعىن جانە ورتا بيزنەس سۋبەكتىلەرىنىڭ سانى 115 مىڭنان اسىپ، جەرگىلىكتى بيۋدجەتتەگى ۇلەسى ءبىر جىل ىشىندە 39 پروتسەنتەن 53 پروتسەنتكە وسكەن، ال جالپى وڭىرلىك ونىمدە جىل سوڭىندا 28 پروتسەنتتى قۇرايدى.
ەلباسى تاپسىرماسىنا سايكەس اكتيۆ جيىنىندا وبلىس اكىمىنىڭ ورىنباسارى ج. تۇياقوۆقا، كاسىپكەرلىك باسقارماسىنا ءوڭىر كاسىپكەرلەرىنە قولداۋ كورسەتۋ ماقساتىندا قوسىمشا قارجى الۋ ءۇشىن ناقتى شارالار قابىلداۋدى تاپسىرىلدى.
«اۋىل شارۋاشىلىعىندا وبلىس جاقسى كورسەتكىشتەرگە جەتىپ كەلەدى. قانت قىزىلشاسى، جۇگەرى ءوسىرۋ، وڭدەۋ ءىسىن جولعا قويدىق. الايدا ءبىز وسى جەتىستىكتەرىمىزبەن توقتاپ قالماۋىمىز كەرەك. سوندىقتان ءبىر اي ىشىندە وبلىستاعى ا و ك دامىتۋدىڭ وڭىرلىك باعدارلاماسىن ازىرلەپ، بەكىتىپ، باعدارلاما ىشىنە 9 باسىم باعىتتى بەلگىلەۋدى تاپسىرامىن. سونىڭ ىشىندە، ەتتى- ءسۇتتى مال شارۋاشىلىعى، قوي شارۋاشىلىعى، باسىمدىق بەرىلەتىن داقىلدار، ينتەنسيۆتى باقتار، جىلىجاي شارۋاشىلىقتارى جانە تاعى باسقاسى بار»، - دەپ اتاپ ءوتتى ا. باتالوۆ.
سونىمەن قاتار ءبىلىم بەرۋ مەكەمەلەرىن بەينەباقىلاۋمەن قامتاماسىز ەتۋ، اپاتتى جانە ءۇش اۋىسىمدى مەكتەپتەر ماسەلەسىن شەشۋگە قاتىستى دا ناقتى مىندەتتەر جۇكتەلدى. ماسەلەن، ىشكى مينگراتسيا مەن دەموگرافيالىق ءوسىمنىڭ ناتيجەسىندە ءۇش اۋىسىمدا وقىتاتىن بۇرىننان بار مەكتەپتەردىڭ قاتارىنا وتكەن جىلى 11 مەكتەپ قوسىلسا، بيىل تاعى 13 ى قوسىلىپ وتىر، ءسويتىپ ولاردىڭ سانى قازىرگى كەزدە 34-تى قۇرايدى.
«وبلىس اكىمىنىڭ ءبىرىنشى ورىنباسارى ل. تۇرلاشوۆ پەن ءتيىستى باسقارمالارعا 15 مەكتەپتىڭ جوبالىق- سمەتالىق قۇجاتتارىن دايىنداۋدى اياقتاۋدى، جاڭا 11 ءۇش اۋىسىمدى مەكتەپتىڭ قۇجاتتارىن ازىرلەۋدى تاپسىرامىن. 11 مەكتەپتىڭ قۇجاتتارىن ازىرلەۋگە قاجەتتى قارجىنى جۋىق ارادا وتەتىن بيۋدجەتتى ناقتىلاۋ كەزىندە قاراستىرۋىمىز كەرەك. ەلىمىزدە «7-20-25» باعدارلاماسى باستالدى، الايدا ءبىزدى ءالى كۇنگە دەيىن ساتىپ الۋشىلاردىڭ تولىق پۋلى قالىپتاستىرىلماعان. ەكىنشى دەڭگەيلى بانكتەر سوماسى 849 ميلليون تەڭگەگە 73 ءوتىنىم عانا قابىلداعان، ونىڭ 53 ى ماقۇلدانىپ، 4 پاتەر بەرىلگەن. سونداي-اق، «نۇرلى جەر» باعدارلاماسى شەڭبەرىندە جالدامالى جانە نەسيەلىك تۇرعىن ۇيلەردىڭ ىسكە قوسىلۋىن ۇلعايتۋ قاجەت. وبلىس اكىمىنىڭ ورىنباسارلارى ل. تۇرلاشوۆ پەن ا. بايجانوۆقا تۇرعىن ءۇي سالۋ ءۇشىن جەكە ينۆەستورلار تارتۋ ماسەلەسىن پىسىقتاۋدى، سونداي-اق جەڭىلدەتىلگەن يپوتەكا بويىنشا العاشقى جارنانى ءىشىنارا سۋبسيديالاۋ بويىنشا ۇسىنىس ەنگىزۋدى تاپسىرامىن»، - دەدى وبلىس باسشىسى.
وعان قوسا جيىن بارىسىندا پوليتسيا قىزمەتىنىڭ جۇمىسىن جەتىلدىرۋ، مەديتسينا سالاسىن سيفرلاندىرۋ، بيۋدجەتتىك قىزمەتكەرلەردىڭ جالاقىسىنىڭ وسۋىنە بايلانىستى قاجەتتى قارجىنى 2019 -جىلدىڭ بيۋدجەتىندە قاراستىرۋ، تۇرعىن ءۇي-كوممۋنالدىق شارۋاشىلىق پەن تابيعي مونوپوليالار قىزمەتتەرى ءۇشىن تاريفتەردىڭ بەلگىلەنۋى مەن جينالعان قارجىنى جۇمساۋدىڭ اشىقتىعىن قامتاماسىز ەتۋ، تۋريزمدى دامىتۋ بويىنشا ارنايى ۇيىم قۇرۋ تۋرالى ۇسىنىس ەنگىزۋ، ءبىر اي مەرزىمىندە مەملەكەتتىك اپپاراتتا وڭتايلاندىرۋ جۇرگىزىپ، كەلەسى جىلدىڭ باسىنان ەڭبەكاقى تولەۋدىڭ جاڭا مودەلىن ەنگىزۋ، وبلىس ەكونوميكاسىنا ينۆەستورلار تارتۋ، «نۇرلى جول» جانە «نۇرلى جەر» باعدارلامالارىن ىسكە اسىرۋ مەرزىمىنىڭ 2025 -جىلعا دەيىن ۇزارتىلۋىنا وراي ەلدى مەكەندەردىڭ پەرسپەكتيۆالىق دامۋ جوسپارلارىن ەسكەرە وتىرىپ، قوسىمشا ينفراقۇرىلىمدىق جوبالار تىزبەسىن قۇرۋ جۇكتەلدى.
سونىمەن قاتار كەلەسى جىلدىڭ جاستار جىلى بولىپ جاريالانۋىنا جانە «اۋىل - ەل بەسىگى» ارنايى جوباسىنىڭ ىسكە قوسىلۋىنا بايلانىستى دا مىندەتتەر ايقىندالدى.
«جولداۋدى حالىق اراسىندا ءتۇسىندىرۋ وڭىردە قۇرىلعان اقپاراتتىق ناسيحات توپتارىنىڭ جۇمىسى بولسا، ناقتى ىسكە اسىرۋ - جەرگىلىكتى اتقارۋشى ورگانداردىڭ مىندەتى. سوندىقتان وبلىستا دايىندالعان جوسپاردىڭ ءار تارماعى بويىنشا ءتيىستى ايماقتار مەن سالالار باسشىلارى تىڭعىلىقتى جۇمىس اتقارۋى ءتيىس جانە بۇل ءۇشىن ءار باسشى دەربەس جاۋاپ بەرەدى»، - دەدى ا. باتالوۆ.
فوتو: دميتري ەروفەيەۆ