اليك شپەكبايەۆ ءبىر قوراپ كامپيتتىڭ دە ۇلكەن پارا ەكەندىگىن ەسكەرتتى

استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتىگىنىڭ ءتوراعاسى اليك شپەكبايەۆ مەملەكەتتىك قىزمەتكەرلەرگە ورىنسىز «سىيلىقتار جاساۋدىڭ» قايدا اپارىپ سوعاتىندىعىن ەسكەرتتى، دەپ حابارلايدى قازاقپارات ءتىلشىسى.

«مەملەكەتتىك قىزمەتشىلەرگە قىزمەتتىك مىندەتتەمەلەرىن اتقارعانى ءۇشىن كەز كەلگەن فورمادا سىيلىقتار بەرۋگە تىيىم سالىنعاندىعىن تاعى دا ەسكەرتەمىن. ەگەر سىيلىقتىڭ قۇنى 2 ايلىق ەسەپتىك كورسەتكىشتەن (4810 تەڭگە) تومەن بولسا، بەرۋشى ءۇشىن 200 ا ە ك(481000 تەڭگە) اكىمشىلىك ايىپپۇل كوزدەلگەن. الۋشى ءۇشىن - 600 ا ە ك(1443000 تەڭگە) بەلگىلەنەدى. جوعارىدا ايتىلعانداردىڭ بارلىعى پارا بولىپ باعالانادى جانە قىلمىستىق جاۋاپكەرشىلىكتى كوزدەيدى»، - دەپ جازدى اليك شپەكبايەۆ فەيسبۋكتەگى پاراقشاسىندا.

ۇلتتىق بيۋرو باسشىسى اگەنتتىك جۇمىسىنداعى باسىمدىقتاردىڭ ءبىرى - تۇرمىستىق سىبايلاس جەمقورلىقتى جويۋ ەكەنىنە توقتالىپ، وعان قوعامدىق باقىلاۋ جاساۋ قاجەتتىگىن ايتىپ ءوتتى. سول سياقتى ورىنسىز سىيلىق بەرۋدىڭ سوڭى نەمەن اياقتالاتىنىنا مىسال دا كەلتىردى.

«مىسال كەلتىرە كەتسەم، الماتى قالاسىنداعى المالى اۋدانىنىڭ مەملەكەتتىك كىرىستەر باسقارماسىنا بەيرەزيدەنتتىڭ ج س ن الۋ ءۇشىن جۇگىنگەن ازامات باسقارما قىزمەتكەرىنە 2 مىڭ تەڭگە ۇسىنعان. ناتيجەسى - 200 ا ە ك ايىپپۇل (481 مىڭ تەڭگە). وسىعان ۇقساس، سولتۇستىك قازاقستان وبلىسىندا الكوگولگە بەرىلگەن ليتسەنزيانى قايتارعانى ءۇشىن قوراپ كامپيت سىيلاعان، ناتيجەسى جارتى ميلليون تەڭگە ايىپپۇل تولەۋمەن اياقتالعان»، - دەدى ول.

ءسوز سوڭىندا ا. شپەكبايەۆ مەملەكەتتىك قىزمەتكەرلەرگە 2 مىڭ تەڭگە ءۇشىن 240 ەسە كوپ تولەۋگە تۋرا كەلەتىن ورىنسىز «سىيلىقتار جاساۋدىڭ» قايدا اپارىپ سوعاتىندىعىن ويلانۋ الدەقايدا ماڭىزدى ماسەلە ەكەنىن ەسكەرتتى.