استانادا «ۇلى دالا ەلىنە ساياحات» ەكسپەديتسياسى قورىتىندىلاندى
بەلگىلەنگەن جوسپارعا ساي، 3 ايدىڭ ىشىندە ەكسپەديتسيا قاتىسۋشىلارى ەلىمىزدەگى ماڭىزدى تابيعي نىساندارعا اپاراتىن 6 باعىت بويىنشا، قازاقستاننىڭ 11 وبلىسىن قامتىعان 17 مىڭ شاقىرىمنان استام جول ءجۇرىپ، ونداعان تابيعي ورىنعا، ساياباقتار مەن قورىقتارعا بارىپ قايتتى.
توپ قۇرامىندا ساياحاتشىلار، تۋرفيرما وكىلدەرى، شەتەلدىك جانە قازاقستاندىق تريەۆەل- بلوگەرلەر مەن فوتوگرافتار جانە ب ا ق وكىلدەرى بولدى.
«ەكسپەديتسيانىڭ ماقساتى - ەلىمىزدىڭ اسەم جەرلەرىن ارالاپ قانا قويماي، جاڭا تۋريستىك مارشرۋتتاردى اشۋ. وسى ورايدا قاتىسۋشىلار ەلىمىزدىڭ 60 قا تارتا تاريحي جانە تۋريستىك ايماقتارىندا بولدى. ەندىگى جۇمىس - جينالعان ماتەريالدار مەن اقپاراتتاردى سارالاپ، جاڭا تۋريستىك مارشرۋتتاردى اشۋ جانە ونى قۇجاتتاندىرۋ ىسىنە كىرىسۋ. سول جۇمىستار اياقتالعان سوڭ جاڭا تۋريستىك باعىتتار اشىلادى. بۇل جەردە ەكسپەديتسيا قۇرامىنداعىلاردىڭ ءرولى ەرەكشە، ويتكەنى ولار تۋريستىك جەرلەردى ءوز كوزىمەن كورگەندىكتەن، بىزگە ءتيىستى ۇسىنىستاردى بەرەدى. ۇسىنىستاردى جىل سوڭىنا دەيىن قاراستىرامىز» ، - دەدى «Kazakh Tourism» ا ق باسقارما ءتوراعاسى راشيد كۇزەمبايەۆ.
اتالعان ەكسپەديتسيانى استانا قالاسىنىڭ 20 جىلدىعىنا وراي قر مادەنيەت جانە سپورت مينيسترلىگى تۋريزم يندۋسترياسى كوميتەتىنىڭ تاپسىرىسى بويىنشا «Kazakh Tourism» ۇلتتىق كومپانياسى ۇيىمداستىرعان بولاتىن.
بۇعان دەيىن حاباردار ەتكەنىمىزدەي، «ۇلى دالا ەلىنە ساياحات» جوباسى - قازاقستان تەرريتورياسىنا جاسالعان ەڭ ءىرى ەكسپەديتسيالاردىڭ ءبىرى. ەكسپەديتسيا 2018 -جىلدىڭ 18 - شىلدەسى مەن 29 - قىركۇيەگى ارالىعىندا «تيان- شان مارجانى» ، «جوڭعار الاتاۋى» (الماتى وبلىسى) ، «التاي - وركەنيەت بەسىگى» (ش ق و) ، «سارىارقا» (اقمولا، پاۆلودار، قاراعاندى، قوستاناي وبلىستارى) ، «تەڭىزدەن تەڭىزگە دەيىن» ( قىزىلوردا، اقتوبە، ماڭعىستاۋ وبلىستارى) ، «جاڭا جىبەك جولى» (تۇركىستان، جامبىل، الماتى وبلىستارى) باعىتتارى بويىنشا ءجۇرىپ ءوتتى.