الماتىدا «ازاتتىق اڭساعان قازاق كوشى، ەل باستاعان ەلىسحان» اتتى كونفەرەنسيا وتەدى
ق ر ءبىلىم جانە عىلىم مينيسترلىگى عىلىم كوميتەتىنىڭ ش. ءۋاليحانوۆ اتىنداعى تاريح جانە ەتنولوگيا ينستيتۋتى جانە «ەر جانىبەك» حالىقارالىق قوعامدىق قورىنىڭ ۇيىمداستىرۋىمەن وتەتىن كونفەرەنسيادا «ەل باستاعان ەلىسحان» كىتابىنىڭ تۇساۋى كەسىلىمەك. ءىس- شارا سوڭىندا باتىر رۋحىنا قۇران باعىشتالىپ، اس بەرىلەدى.
ەلىسحان ءالىپ ۇلى (1908-1943) - قازاق حالقىنىڭ باسىنا تۇسكەن 1930-1940 -جىلدارداعى قاندى كەزەڭنىڭ قۇربانى. ۇلت قاھارمانى. ەل- جۇرتىن زۇلىمدىقتان قۇتقارۋ جولىندا جان اياماي ارپالىسقان كۇرەسكەر تۇلعا. گيمالايدى تۇعىش رەت اسىپ وتكەن قازاق كوشىنىڭ باسشىسى.
ەلىم، جەرىم دەپ كۇرەسكەن ەر ەلىسحان ءالىپ ۇلىنىڭ ەسىمى ۇلت تاريحىندا ەرەكشە ورىنعا يە. ونىڭ اتى ادەبيەتتەردەن، تاريحي كىتاپتاردان ورىن الدى. ەلىسحان ءومىرى تۋرالى جازىلعان ءجادي شاكەن ۇلىنىڭ «قارالى كوش» رومانى قازاقستاندا ءۇش رەت باسىلىپ، تۇرىك تىلىنە اۋدارىلعان. تۇركيادا دا جارىق كوردى. كىتاپ تۇركيا پرەزيدەنتى رەجەپ تايىپ ەردوعاننىڭ قولىنا ءتيىپ، ەلدەگى مەملەكەتتىك كىتاپحانالار تورىنەن ورىن الدى. ايتا كەتەيىك، بيىلعى شىلدە ايىندا تۇرىك ەلىنىڭ ىستانبۇل قالاسىندا باتىردىڭ 110 جىلدىق ءىس- شاراسى اسا جوعارى دەڭگەيدە اتالىپ ءوتتى.
«ازاتتىق اڭساعان قازاق كوشى جانە ەل باستاعان ەلىسحان» تاقىرىبىنداعى كونفەرەنسيا ەلىسحان ءالىپ ۇلىنىڭ جاۋعا تىزە بۇكپەيتىن قايسارلىعى، ەرجۇرەكتىگى مەن تۇركى ۇلدارىنا ءتان ءور رۋحىنىڭ ۇرپاققا بەرەر ساباعى، باتىردىڭ ءومىر جولى مەن ەرلىك ىزدەرىنە ارنالادى. جيىن نەگىزىنەن ۇلت قاھارمانى جايىندا جازىلعان ادەبيەتتەر مەن عىلىمي زەرتتەۋلەر حاقىنداعى باياندامالاردى قامتيدى. سونداي- اق ازاتتىق، ەركىندىك اڭساعان كوشتىڭ مۇراتى - ءبىزدىڭ بۇگىنگى تاۋەلسىزدىگىمىز ەكەنىن، وتاننىڭ قىمبات قۇندىلىعى ەكەنىن، ونى ماڭگى قورعاپ ءوتۋدىڭ قاجەتتىگىن ۇرپاق ساناسىنا ءسىڭىرۋدى ماقسات ەتەدى» ، - دەيدى جازۋشى ج. شاكەن ۇلى.
جيىنعا مەملەكەت جانە قوعام قايراتكەرلەرى، اتاقتى عالىمدار، جازۋشىلار، زيالى قاۋىم وكىلدەرى، تۇركيا، گەرمانيا، شۆەتسيا جانە موڭعوليادان كەلەتىن قوناقتار مەن ەلىسحان باتىردىڭ ۇرپاقتارى قاتىسادى دەپ كۇتىلۋدە.
اۆتور: ريزابەك نۇسىپبەك ۇلى