ىشكى ىستەر ورگاندارىن وڭتايلاندىرۋ جۇمىس ساپاسىن ارتتىرادى - جولداۋ
بۇل وتە قۋانتارلىق جاعداي. بۇل پىكىردى شىعىس قازاقستان وبلىسى ىشكى ىستەر دەپارتامەنتىنىڭ سەمەي قالاسى ءى ءى ب شتاب باستىعى، پوليتسيا كاپيتانى جاسۇلان كاكىموۆ ءبىلدىردى، دەپ حابارلايدى قازاقپارات.
«مەن پوليتسيا قىزمەتكەرى رەتىندە ەلباسىمىز نۇرسۇلتان نازاربايەۆتىڭ حالىققا ارناعان جولداۋىنداعى قۇقىق قورعاۋ سالاسىن وڭتايلاندىرۋعا قاتىستى كوتەرىپ وتىرعان ماسەلەلەردى تولىقتاي قولدايمىن. ويتكەنى وسى مىندەتتەر ءوز شەشىمىن تاپقان كەزدە ەلىمىزدە «پوليتسيا- مەنىڭ قورعانىم» ۇستانىمى ۇدەسىنەن شىعا بىلەتىن كاسىبي، پوليتسيا قالىپتاسادى. جولداۋدا ەلباسى ىشكى ىستەر ورگاندارىندا تەك قانا كاسىبي شەبەرلەردىڭ قىزمەت ەتۋىن تالاپ ەتىپ وتىر. وسى ماقساتتا ىشكى ىستەر ورگاندارىندا كەزەكتەن تىس اتتەستاتسيا وتكىزىلمەك. ونىڭ ناتيجەسى بويىنشا ۇزدىك دەپ تانىلعاندار عانا ءوز قىزمەتىن جالعاستىرۋعا قۇقىلى»، - دەدى جاسۇلان كاكىموۆ.
سونىمەن قاتار، ەلباسى جولداۋىندا پوليتسيا قىزمەتىن وڭتايلاندىرۋ ءىسىن قولعا الۋدى مىندەت ەتىپ قويدى. پوليتسيا كاپيتانى ءتارتىپ ساقشىلارىن نەگىزگى مىندەتىنە كىرمەيتىن قوسالقى قىزمەتتەردەن بوساتىپ، وسىنىڭ نەگىزىندە ۇنەمدەلگەن قارجىعا جالاقىنى كوتەرىپ، پوليتسەيلەردى باسپانامەن قامتۋ ماسەلەسىن شەشۋ بۇگىنگى كۇننىڭ باستى ماسەلەسى ەكەنىن ايتتى.
«بۇل پوليتسيا ساپىندا ءوز ىسىنە ادال بەرىلگەن، كاسىبي ماماندار عانا قالىپ، ولاردى ماتەريالدىق- الەۋمەتتىك قورعاۋ ماسەلەسىنىڭ وڭ شەشىلۋىن قامتاماسىز ەتەدى. ىشكى ىستەر ورگاندارىن جاڭعىرتۋدىڭ جول كارتاسى اياسىندا كادرلىق دايارلاۋدىڭ جاڭا ستاندارتى قارالىپ، حالىقپەن جۇمىس ىستەۋدىڭ تىڭ جۇيەسى قولعا الىنباق. مەملەكەت باسشىسى سالانى جاڭعىرتۋ زامان تالابى ەكەنىن اتاپ ءوتتى. كەلەسى جىلدان باستاپ قوعامدىق ءتارتىپتى ساقتاۋ جانە قىلمىسپەن كۇرەس جۇرگىزەتىن ەلىمىزدىڭ پوليتسياسى ەندى قىزمەتتىك مودەلگە كوشىرىلەدى»، - دەيدى سەمەي قالاسى ءى ءى ب شتاب باستىعى.