جازۋشى قالامگەرلەر جولداۋداعى تۇيتكىلدى ماسەلەلەرگە ءۇن قوستى

الماتى. قازاقپارات - الماتىدا ق ر جازۋشىلار وداعى باسقارماسىندا قالامگەرلەر مەن اقىندار باس قوسىپ، مەملەكەت باسشىسىنىڭ جولداۋىن تالقىعا سالدى، دەپ حابارلايدى قازاقپارات ءتىلشىسى.

زيالى قاۋىم وكىلدەرى ماڭىزدى قۇجاتتا ايتىلعان باستامالارعا ءۇن قوسىپ، تۇيتكىلدى ماسەلەلەردى شەشۋ جولدارىن ۇسىندى.

ق ر جازۋشىلار وداعى باسقارماسى ءتوراعاسىنىڭ ورىنباسارى، بەلگىلى اقىن، جۋرناليست، فيلولوگيا عىلىمدارىنىڭ دوكتورى باۋىرجان جاقىپتىڭ ايتۋىنشا، 2019 -جىلدىڭ جاستار جىلى دەپ جاريالانۋى جاستاردىڭ الەۋمەتتىك، مورالدىق، ماتەريالدىق ماسەلەلەرىنىڭ شەشىمى بولماق.

«ەلباسى جولداۋىندا جاستار جىلى دەپ جاريالادى. بۇل ورايدا جازۋشىلار وداعىنىڭ مىندەتى نە؟ جاس جازۋشى، جاس دراماتۋرگ، جاس سىنشى، جاس اقىنداردى قولداۋ. جاس ادەبيەتشىلەردىڭ الەۋمەتتىك جاعدايى تومەن. ءبىرىنشى ماسەلە - باسپانا. بۇل ورايدا ءبىزدىڭ مىندەت - جەرگىلىكتى اكىمشىلىكتەرگە حات جازىپ، ۇسىنىس ءبىلدىرۋ. قۇزىرلى ورگاندارعا حات جازىپ، جاس اقىننىڭ ءومىربايانىن، كىتاپتارىن كورسەتە وتىرىپ جەڭىلدىك جاساۋ تۋرالى ءوز تاراپىمىزدان ءوتىنىش ءبىلدىرۋ. وسى باعىتتا اكىمشىلىكتەرمەن جۇمىستى جالعاستىرا تۇسەمىز. بيىلدىڭ وزىندە قازاقستان جازۋشىلار وداعىنا 24 جاس اقىن-جازۋشى قابىلداندى. ولاردىڭ الەۋمەتتىك جاعدايىنا جازۋشىلار وداعى جاۋاپ بەرۋى كەرەك»، - دەدى باۋىرجان جاقىپ.

سونىمەن قاتار، وداق اياسىندا وتكىزىلىپ وتىرعان ءبىرقاتار شارالاردى تىلگە تيەك ەتتى.

«ءبىز وسى كۇزدە تۇركىتىلدەس جاس ادەبيەتشىلەردىڭ فورۋمىن وتكىزگەلى وتىرمىز. بۇل شارا ورالدا وتەدى. وعان باشقۇرت، تاتار، قىرعىز، تۇركمەن، تۇركيا، ماكەدونيا سەكىلدى تۇركى تەكتەس حالىقتار بار ەلدەردەن اقىندار شاقىرىلادى. بۇل فورۋم جىل سايىن ءداستۇرلى تۇردە وتكىزىلىپ تۇرادى. جاس ادەبيەتشىلەردىڭ سەمينار كەڭەستەرى، ءمۇشايرا، ادەبي كەشتەردى وتكىزۋ، فەستيۆال ۇيىمداستىرۋ جوسپاردا بار»، - دەدى اقىن.

وتىرىسقا قاتىسقان وزگە دە جازۋشىلار 2019 -جىلدىڭ 1 -قاڭتارىنان باستاپ تومەنگى جالاقى 42000 وسەتىنىنە قۋانىشتارىن جاسىرمادى.

سونىمەن قاتار، ءبىراۋىزدان مۇعالىمدەردىڭ، بيۋدجەتتىك سالادا قىزمەتكەرلەرىنىڭ، دەنساۋلىق ساقتاۋ، پوليتسيا جالاقىسىن كوتەرۋ باستاماسىن قولدايتىندارىن جەتكىزدى.

ق ر جازۋشىلار وداعى باسقارماسى ءتوراعاسىنىڭ ءبىرىنشى ورىنباسارى عالىم جايلىباي ەكولوگيالدىق احۋالدى جاقسارتۋ ماسەلەسىنە كەڭىنەن توقتالدى.

«جولداۋدا جازۋشىلارعا قاتىستى ەشتەڭە جوق ەكەن» دەپ قابىلداماي، تەرەڭىرەك ءۇڭىلۋ كەرەك. بۇل قۇجات حالىقتىڭ وسۋىنە، حالىقتىڭ تابىسى مەن تۇرمىسىن ارتتىرۋىنا ارنالعان. ونىڭ ىشىندە مەنىڭ ەرەكشە نازارىمدى اۋدارتقانى ەكولوگيالىق مونيتورينگ جۇرگىزۋ ماسەلەسى. استانادان بەرى دەمالىس ورىندارىنىڭ تىنىسى تارىلىپ قالدى. كەپتەلىس، اينالاسى بوتەلكە. مەنىڭ تۋعان اۋىلىمدا پروتون قۇلادى. جەرىمىز گەپتيلمەن ۋلاندى. 1989 -جىلى ەڭ سوڭعى رەت رادياتسيا كولەمى قالىپتى نورمادان 10 ەسە ارتىق بولعان. ەكولوگيالىق احۋالدى كۇشەيتۋ - ءبىزدىڭ ارالاساتىن ماسەلەمىز»، - دەدى عالىم جايلىباي.

ايتا كەتۋ كەرەك، پرەزيدەنت نۇرسۇلتان نازاربايەۆ 5 -قازاندا قازاقستان حالقىنا كەزەكتى جولداۋىن جاريا ەتتى.

ستراتەگيالىق قۇجات ەلىمىزدىڭ الەۋمەتتىك- ەكونوميكالىق دامۋىنىڭ وزەكتى ماسەلەلەرىنە جانە قازاقستاندىقتاردىڭ ءال-اۋقاتىن ودان ءارى ارتتىرۋ مىندەتتەرىنە ارنالعان.