تورەعاليدىڭ ءتارتىبى: الماتى اۋەجايى شەكاراشىنىڭ ايتقانىن جوققا شىعاردى
2010 اسكەري ءبولىمىنىڭ قىزمەتشىسى «ۆرەميا» باسىلىمىنا قىركۇيەكتىڭ 14 ى كۇنى «ەير- استانا» الماتى-گونكونگ رەيسىندە بولعان وقيعاعا قاتىستى ءوز پىكىرىن بىلدىرگەن.
ول VIP- اگەنت بيلەتسىز ەر ادامنىڭ وتباسىن شىعارىپ سالۋىنا رۇقسات بەرۋ تۋرالى ءوتىنىش ايتقانىن مالىمدەگەن ەدى.
«بۇل اقپارات شىندىققا جاناسپايدى. ىشكى تەكسەرۋ ناتيجەسىندە اۋە قاۋىپسىزدىگى قىزمەتىنىڭ، قاراۋ ءبولىمىنىڭ قىزمەتكەرلەرى، VIP قىزمەت اگەنتتەرى ەر ادامدى بيلەتسىز وتكىزۋ تۋرالى ءوتىنىش ايتپاعان. بۇعان VIP- تەرمينال دالىزىندەگى كامەرالار دالەل بولا الادى. بەينەماتەريالدار قىزمەتتىك تەكسەرۋ كەزىندە تولىق زەرتتەلدى»، - دەدى باسپا ءسوز قىزمەتىنەن.
اۋەجاي وكىلدەرى جاۋاپكەرشىلىكتەن قاشپايتىندارىن ايتتى.
«قاراۋ ءبولىمىنىڭ قىزمەتكەرلەرى وزدەرىنىڭ باقىلاۋ پۋنكتىندە وتىرۋ تالونىن كورسەتۋىن تالاپ ەتپەي، وتكىزىپ جىبەرگەن. بۇل ءۇشىن قاراۋ ءبولىمىنىڭ ينسپەكتورلارى راقىمگەرەيەۆ رينات پەن قىرعىزبايەۆ ابىلاي، زاكيروۆا شولپان ءارقايسىسى 20 ا ە ك كولەمىندە ايىپپۇل تولەيتىن بولدى»، - دەدى اۋەجايدان.
اۋەجاي تاراتقان اقپاراتقا سايكەس، جولاۋشىلاردى تىركەۋ مەن باگاج تەكسەرۋ، boarding-كونترول، بورتقا وتىرعىزۋ - اۋە كومپانيالارىنىڭ قىزمەتكەرلەرىنىڭ مىندەتى.
ال ۇشاققا وتىرعىزۋ الدىنداعى پاسپورت تەكسەرۋ، ۇشاققا وتىرعىزۋ الدىنداعى تەكسەرۋدى ق ر ۇ ق ك شەكارا قىزمەتى ورىندايدى.
جولاۋشىلاردى جەكە تەكسەرۋ، قول جۇگى مەن جۇكتى تەكسەرۋ الماتى اۋەجايى قىزمەتكەرلەرىنىڭ مىندەتى بولىپ تابىلادى ەكەن.