قازاقستان مەكتەپتەرى كەدەرگىسىز ورتا قۇرۋعا دايىن با - ءمينيستردىڭ جاۋابى

استانا. قازاقپارات - ق ر ءبىلىم جانە عىلىم ءمينيسترى ەرلان ساعاديەۆ ينكليۋزيۆتى ءبىلىم بەرۋگە جاعداي جاساۋ جۇمىستارى تۋرالى باياندادى، دەپ حابارلايدى قازاقپارات ءتىلشىسى.

«بارلىق مەكتەپتى قايتا جابدىقتاپ شىعۋ ءۇشىن وتە كوپ قاراجات پەن ۋاقىت كەرەك. مەكتەپتەرىمىزدىڭ باسىم بولىگى ەسكى جانە باستاپقىدا وندا كەدەرگىسىز ورتا قۇرۋ قاراستىرىلماعان. ۋنيۆەرسيتەتتەردە مۇگەدەكتەرگە ارنالعان ليفت ورناتۋ - وتە قىمبات شارۋا. ماسەلەنى وڭاي شەشەتىن امالدى كورىپ تۇرعان جوقپىز»، - دەپ جاۋاپ بەردى ەرلان ساعاديەۆ ۇكىمەت ۇيىندە جۋرناليستەر سۇراعىنا.

ونىڭ ايتۋىنشا، پاندۋس ماسەلەسى از عانا ۋاقىتتا شەشىلىپ كەلە جاتىر.

«كوپتەگەن مەكتەپتەر پاندۋس سالۋمەن اينالىسىپ جاتىر. پاندۋستار - ءبىرىنشى قاباتقا عانا اپاراتىن جول، وسى ناتيجەنىڭ ءوزى دە جامان ەمەس. ءبىزدىڭ قازىرگى مىندەتىمىز - بارلىق مەكتەپتەر مەن ۇيىمداردى پاندۋسپەن قامتاماسىز ەتۋ، كەيىنىرەك مۇمكىندىگى شەكتەۋلى ادامدارعا ارنالعان ليفت قويۋ ماسەلەسىن دە قاراستىرا جاتىرمىز» - دەدى ساعاديەۆ.

ايتا كەتەيىك، بۇگىن ق ر ەڭبەك جانە حالىقتى الەۋمەتتىك قورعاۋ ءمينيسترى ءمادينا ءابىلقاسىموۆا مۇمكىندىگى شەكتەۋلى 10 مىڭنان استام بالانىڭ مەكتەپكە بارا الماي وتىرعانىن مالىمدەدى.

وسىعان بايلانىستى، مينيستر ءابىلقاسىموۆا ءبىلىم جانە عىلىم مينيسترلىگىنە ينكليۋزيۆتى ءبىلىم بەرۋدى دامىتۋ ماقساتىندا كادرلاردىڭ جەتىسپەۋشىلىگى، ينكليۋزيۆتى ءبىلىم بەرۋ جۇيەسىن ادىستەمەلىك قامتاماسىز ەتۋ، كەدەرگىسىز ورتا قۇرۋ شەڭبەرىندە ءبىلىم بەرۋ ۇيىمدارىنىڭ ماتەريالدىق- تەحنيكالىق بازاسىن نىعايتۋ سياقتى ماسەلەلەردى شەشۋ قاجەتتىگىن ەسكەرتتى.