استانادا نازاربايەۆ اتىنداعى ورتالىق اشىلادى

استانا. قازاقپارات - الەمدىك جانە ءداستۇرلى دىندەر ليدەرلەرىنىڭ سەزى حاتشىلىعىنىڭ كەزەكتى وتىرىسىندا مادەنيەتتەر مەن دىندەردىڭ حالىقارالىق ورتالىعىن قايتا قۇرۋ باستاماسى كوتەرىلدى، دەپ حابارلايدى قازاقپارات ءتىلشىسى.

ق ر پارلامەنتى سەناتانىڭ ءتوراعاسى، حاتشىلىق جەتەكشىسى قاسىم-جومارت توقايەۆ ەرتەڭگى سەزدىڭ دەكلاراتسياسىنا مادەنيەتتەر مەن دىندەردىڭ حالىقارالىق ورتالىعىن نازاربايەۆ اتىنداعى دىندەر مەن وركەنيەتتەر اراسىنداعى ديالوگ ورتالىعى رەتىندە قايتا قۇرۋ ماسەلەسىن ەنگىزۋدى ۇسىندى.

«بيىل الەمدىك جانە ءداستۇرلى دىندەر ليدەرلەرىنىڭ سەزىنە 15 جىل تولىپ وتىر. وسى ۋاقىتتىڭ ىشىندە اتالعان فورۋم ادامزاتتىڭ وزەكتى ءارى كۇردەلى ماسەلەلەرى شەشۋدىڭ ءتيىمدى الاڭىنا اينالدى. II سەزد كەزىندە قازاقستان پرەزيدەنتى نۇرسۇلتان نازاربايەۆ مادەنيەتتەر مەن دىندەردىڭ حالىقارالىق ورتالىعىن ىسكە قوسقان بولاتىن. اتالعان ورتالىقتىڭ نەگىزگى ماقساتى - سەزدىڭ بارلىق شەشىمدەرىن ىسكە اسىرۋ. بىزدىڭشە، وسى ىسپەتتى ينستيتۋتتاردىڭ ءرولىن كۇشەيتەتىن كەز كەلدى. سوندىقتان مادەنيەتتەر مەن دىندەردىڭ حالىقارالىق ورتالىعىن نازاربايەۆ اتىنداعى دىندەر مەن وركەنيەتتەر اراسىنداعى ديالوگ ورتالىعى رەتىندە قايتا قۇرۋدى ۇسىنامىز. وسى باستامامىزعا قولداۋ بىلدىرەسىز دەپ سەنەمىز. شەتەلدە وسى سالاداعى ورتالىقتار جاقسى جۇمىس ىستەپ كەلەدى. ناتيجەسى دە بار. ءبىز دە وسى تاجىريبەنى كەڭىنەن قولدانۋىمىز قاجەت. سول سەبەپتى سىزدەر قارسى بولماساڭىز، ءبىز اتالعان ۇسىنىستى ەرتەڭگى سەزدىڭ دەلاراتسياسىنا ەنگىزەيىن دەپ وتىرمىز»، - دەدى قاسىم- جومارت توقايەۆ.

حاتشىلىق مۇشەلەرى اتالعان باستاماعا قارسىلىق بىلدىرگەن جوق.

ايتا كەتەيىك، مادەنيەتتەر مەن دىندەردىڭ حالىقارالىق ورتالىعى قازاقستان رەسپۋبليكاسى پرەزيدەنتى ن. ءا. نازاربايەۆتىڭ الەمدىك جانە ءداستۇرلى دىندەر ليدەرلەرىنىڭ II سەزىندەگى كوتەرگەن باستامالارىن جۇزەگە اسىرۋعا قاتىستى جوسپارىنا سايكەس قۇرىلعان بولاتىن. ورتالىق ءوز قىزمەتىن قر ادىلەت مينيسترلىگى ءدىن ىستەرى كوميتەتى اياسىندا باستادى. ودان كەيىن قر مادەنيەت مينيسترلىگىنىڭ ءدىن ىستەرى كوميتەتى قاراماعىنا بەرىلدى. ارتىنان كوميتەت دىن ىستەرى اگەنتتىگى بولىپ قايتا قۇرىلدى.

بۇگىندە ورتالىق ق ر قوعامدىق دامۋ مينيسترلىگىنە قارايدى. ونىڭ نەگىزگى ماقساتى - قازاقستاننىڭ مادەنيەتارالىق جانە كونفەسسياارالىق سۇحبات ورتالىعى رەتىندەگى ءرولىن جاڭا دەڭگەيگە كوتەرۋگە ىقپال ەتۋ، قازاقستاننىڭ وسى سالاداعى تاجىريبەسىن حالىقارالىق دارەجەدە تانىتۋ.

الەمدىك جانە ءداستۇرلى دىندەر ليدەرلەرىنىڭ كەزەكتى سەزى 10-11 -قازان ارالىعىندا وتەدى. سەزدىڭ اشىلۋىنا سەربيا پرەزيدەنتى الەكساندر ۆۋچيچ پەن ە ق ى ۇ باس حاتشىسى توماس گرەمينگەر قاتىسادى.

وتىرىسقا مەملەكەت باسشىسى نۇرسۇلتان نازاربايەۆ ءتوراعالىق ەتەدى.