ۇلكەن قالالاردا مەكتەپ پسيحولوگتارى كوبەيەدى - مينيستر

استانا. قازاقپارات - قازاقستاندا مەكتەپ پسيحولوگتارىنىڭ كاسىبي بىلىكتىلىگىن ارتتىرۋ كۋرستارى جۇرەدى جانە ارنايى تەستىلەۋ ارقىلى ولاردىڭ ەڭبەكاقىلارى كوبەيەدى، دەپ حابارلايدى قازاقپارات ءتىلشىسى.

بۇل تۋرالى ق ر ءبىلىم جانە عىلىم ءمينيسترى ەرلان ساعاديەۆ ۇكىمەت وتىرىسىندا مالىمدەدى.

ءمينيستردىڭ ايتۋىنشا، سوڭعى كەزدەرى بالالارعا پسيحولوگيالىق كومەك كورسەتۋ ماسەلەلەرى ءجيى كوتەرىلەدى.

«قازىرگى ۋاقىتتا 7 مىڭنان استام پسيحولوگ-پەداگوگىمىز بار. رەسپۋبليكا بويىنشا ءبىر پسيحولوگقا 300 بالادان كەلەدى. كورسەتكىش جامان ەمەس. ءبىراق، استانا، الماتى، شىمكەنت سىندى ۇلكەن قالالاردا ءبىر پسيحولوگ مىڭنان استام بالامەن جۇمىس ىستەيدى. سەبەبى، ءبىزدىڭ ەرەجە بويىنشا قازىر ءبىر پسيحولوگ بالالاردىڭ سانىنا ەمەس، سىنىپقا بەرىلەدى. ارينە، سىنىپتا ورتاشا 10-15 بالا بولسا، پسيحولوگتار جەتەر ەدى. قالاداعى سىنىپتاردا 35-45 بالا بار جانە پسيحولوگ مىڭنان استام بالامەن جۇمىس ىستەۋگە ءماجبۇر. قازىر ءتيىستى وزگەرىستەر ەنگىزىپ جاتىرمىز. ۇلكەن قالالاردا جاڭا پسيحولوگتاردى جۇمىسقا الۋ قاجەت بولادى، اكىمدەرگە وسى ماسەلەگە نازار اۋدارۋدى سۇرايمىز»، - دەپ اتاپ ءوتتى مينيستر ساعاديەۆ.

سونىمەن بىرگە، مينيستر جالپى ءبىلىم بەرۋ ۇيىمدارىنداعى پسيحولوگتاردىڭ كاسىبي دەڭگەيى كوڭىل كونشىتپەيتىنىن جەتكىزدى.

«وسى ماسەلەنى شەشۋ ءۇشىن «باقىتتى وتباسى» جانە  قىزىلوردا وبلىسىندا يۋنيسەف باعدارلاماسى سىندى بىرنەشە جوبالار پيلوتتىق رەجىمدە جۇرگىزىلدى. ەندى مينيسترلىك جۇيەلى تۇردە وسى پيلوتتاردى بىرىكتىرىپ، شەتەلدىك مامانداردى تارتا وتىرىپ، ءبىرىڭعاي مەملەكەتتىك باعدارلاما جاسايدى. ۇلتتىق تەستىلەۋ ەنگىزىپ، پسيحولوگ-كادرلاردىڭ بىلىكتىلىگىن ارتتىرۋ كۋرستارىن وتكىزەدى. جاڭا تەستىلەۋ جۇيەسى ارقىلى پەداگوگ- پسيحولوگتاردىڭ ساناتتارىن وزگەرتىپ، ايلىقتارىن كوتەرۋ ماسەلەلەرى شەشىلەتىن قۇجاتتار ازىرلەنىپ جاتىر»، - دەدى ەرلان ساعاديەۆ.

جاڭا جۇيە جىل سوڭىنا دەيىن تولىق ازىرلەنىپ، پسيحولوگتاردىڭ تالقىسىنان ءوتىپ، ۇكىمەتتىڭ قاراۋىنا ەنگىزىلەدى.