ەلەكتروندى وقۋلىقتار وقۋشىلاردىڭ اۋىر سومكەسى ماسەلەسىن شەشەدى - مينيستر ساعاديەۆ

استانا. قازاقپارات - ق ر پرەمەر- ءمينيسترى باقىتجان ساعىنتايەۆ ۇكىمەتتىڭ بۇگىنگى وتىرىسىندا باستاۋىش سىنىپ وقۋشىلارىنىڭ اۋىر سومكەسىنە قاتىستى ماسەلەنى كوتەردى، دەپ حابارلايدى قازاقپارات ءتىلشىسى.

«اتا-انالار تاراپىنان كوپتەگەن سۇراقتار كەلىپ تۇسۋدە، وقىتۋدىڭ جاڭا مازمۇنى جونىندە، وقۋشىلاردى باعالاۋ ماسەلەسى، ەلەكتروندى جۋرنالدار، باستاۋىش سىنىپ بالالارىنىڭ سومكەسى اۋىرلاپ كەتتى. ولارعا قانداي جاۋاپ بەرە الامىز؟»، - دەپ ساۋال قويدى پرەمەر- مينيستر ق ر ءبىلىم جانە عىلىم ءمينيسترى ەرلان ساعاديەۆكە.

ءوز كەزەگىندە ءبىلىم جانە عىلىم ءمينيسترى جاڭارتىلعان مازمۇن بويىنشا ءتۇسىندىرۋ جۇمىستارى جالعاسىپ جاتقانىن، بالالاردىڭ 70 پروتسەنتى جاڭا باعدارلاما بويىشا وقيتىنىن اتاپ ءوتتى.

«جاڭارتىلعان مازمۇن ماسەلەسى شەشىلگەن، اتا-انالار مەن بالالار ءتۇسىنىپ جاتىر، تاعى ءبىر جىل بەرسە، بارلىق تۇسىنىسپەۋشىلىكتەر ايقىندالادى. سومكە ماسەلەسىن شەشۋدىڭ جولى - مەكتەپ ىشىندە كىتاپ قالدىراتىن ارنايى شكافتار ازىرلەۋ، ونى سىنىپتا نەمەسە دالىزدە سالۋعا بولادى. ەلەكتروندى وقۋلىقتار قازىر دە بار، ونى ءجيى پايدالانادى. جاڭارتىلعان مازمۇنعا كوشكەن سىنىپتارعا ەلەكتروندى وقۋلىقتار 100 پروتسەنت ەنگىزىلگەن. ياعني، قازىرگى ۋاقىتتا بالالاردىڭ 70 پروتسەنتىنە ەلەكتروندى وقۋلىقتار قولجەتىمدى. ءبىزدىڭ جوسپار بويىنشا، الداعى ەكى جىلدا وقۋلىقتار 100 پروتسەنت ەلەكتروندى تۇردە شىعادى»، - دەدى ە. ساعاديەۆ.

سونىمەن بىرگە، بيىل العاش رەت قاعاز وقۋلىقتار نورماسى، ونىڭ قانداي قاعازدان جاسالاتىنى، ءپىشىمى مەن سالماعى ءبىر نورماعا كەلتىرىلىپ، ءتيىستى قۇجاتتار بەكىتىلگەن.

«سومكەلەردىڭ سالماعى بويىنشا جاڭا ستاندارتتار جاسادىق دەدىك، ونى كىم شىعارىپ جاتىر؟ ەلەكتروندى وقۋلىقتار دا بارلىق پاننەن جوق. ءبىر جاعىنان جاسادىق دەدىك، شىن مانىندە ونىڭ بىرەۋى دە جۇمىس ىستەمەيدى. ناتيجەسىندە سول باياعى سالماعى اۋىر كىتاپ، باستاۋىشتا وقيتىن كىشكەنتاي بالاعا ۇلكەن سالماق. الدىمەن شەشىپ الىپ، سودان كەيىن جاسامايمىز با؟ قاعازدارىن جونگە كەلتىرىپ، سودان كەيىن جاڭا ستاندارتقا كوشپەيمىز بە؟»، - دەپ قوسىمشا سۇراق قويدى پرەمەر- مينيستر ساعىنتايەۆ.

«قاعاز وقۋلىقتاردى 50-60 جىل بويى بالالار تاسىپ ءجۇردى. ءبىز دە تاسىعانبىز. بيىل العاش رەت ستاندارتتى ەنگىزىپ وتىرمىز، وقۋلىقتاردىڭ قاي قاعازدان باسىلاتىنىن، سالماعى مەن فورماتىن بەكىتتىك. ارينە، ول تەك بيىل شىعاتىن وقۋلىقتارعا ەنگىزىلگەن، ەندى 5-6 جىلدا بارلىق وقۋلىقتاردى قامتيدى. ەلەكتروندى وقۋلىقتار 70 پروتسەنت جۇمىس ىستەپ جاتىر، ەندى جاڭارتىلعان مازمۇنعا كوشەتىن سىنىپتاردىڭ وقۋلىقتارىن ەلەكتروندى تۇردە مىندەتتى تۇردە شىعاراتىن بولامىز»، - دەپ جاۋاپ بەردى ساعاديەۆ.