استانانىڭ سول جاعالاۋىندا بولعان توتەنشە جاعدايعا كىم كىنالى

استانا. قازاقپارات - استانادا بولعان توتەنشە جاعدايعا كىنالى «نۇر استانا قۇرىلىس» جاۋاپكەرشىلىگى شەكتەۋلى سەرىكتەستىگى.

بۇل تۋرالى بۇگىن استانا اكىمدىگىنىڭ باسپا ءسوز حاتشىسى ەلۆيرا جۇرگەنبايەۆا حابارلادى.

«كومپانيا وكىلدەرى وزدەرى جۇمىس جۇرگىزىپ جاتقان قۇرىلىس ايماعىندا ەلەكتر جۇيەسىنىڭ كابەلدەرى بولعانىن بىلە تۇرا وسىنداي ولقىلىقتارعا جول بەردى. وسىعان قاراي وقيعامەن بايلانىستى شىعىنداردى دا اتالعان كومپانيا وتەيتىن بولادى»، - دەپ مالىمدەتى باسپا ءسوز حاتشىسى.

ايتا كەتەيىك، وقيعا كەشە، 8 -قازان كۇنى كەشكىسىن بولدى. استانانىڭ سول جاعالاۋىنداعى شۇبار شاعىن اۋدانى مەن قونايەۆ پەن سارايشىق كوشەلەرىندەگى ءبىرقاتار تۇرعىن ۇيلەر ەلەكتر جارىعىنسىز قالدى. بولعان وقيعانى ەلوردا تۇرعىندارى الەمەتتىك جەلىگە جازىپ، بەينەتۇسىرىلىمدەر جاريالادى.

توتەنشە وقيعانىڭ بولعانىن استانا قالاسى اكىمىنىڭ باسپا ءسوز حاتشىسى ەلۆيرا جۇرگەنبايەۆا دا راستادى.

«قالانىڭ سول جاق بولىگىندە قۇرىلىس جۇمىستارىن جۇرگىزۋ كەزىندە، جارىق بەرەتىن كابەلدەرگە زاقىم كەلىپ، سونىڭ سالدارىنان شۇبار كەنتى مەن قونايەۆ كوشەسىندەگى جانە سول جاعالاۋداعى ءبىرقاتار تۇرعىن ۇيلەر جارىقسىز قالدى. قازىرگى كەزدە توتەنشە جاعدايلاردى جويۋ ماقساتىندا قالانىڭ بارلىق كوممۋنالدىق جانە توتەنشە جاعدايلار قىزمەت وكىلدەرى جان- جاقتى جۇمىستار جۇرگىزىپ جاتىر»، - دەپ حابارلاعان بولاتىن استانا قالاسى اكىمىنىڭ باسپا ءسوز حاتشىسى ەلۆيرا جۇرگەنبايەۆا.

باسپا ءسوز حاتشىسىنىڭ مالىمەتتەرىنشە، وقيعا ورنىندا «استانا-رەك» بريگاداسى جۇمىس جۇرگىزدى. اپاتتىڭ سالدارى جويىلىپ، تۇنگى ساعات 02.28-دە جاعداي تولىق قالپىنا كەلدى.