الەن جولداسوۆ: جولداۋدان تۇيگەنىم - مەملەكەت ەڭبەكقوردىڭ تابىسىن ارتتىرۋدى كوزدەيدى
ەلباسى نۇرسۇلتان نازاربايەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىنا وراي ءوز پىكىرىن بىلدىرگەن الماتى وبلىسى پانفيلوۆ اۋدانى «قامقورلىق» جاۋاپكەرشىلىگى شەكتەۋلى سەرىكتەستىگىنىڭ ديرەكتورى الەن ءابىلماجىن ۇلى جولداسوۆتىڭ وي- تۇجىرىمى وسىنداي.
اتالعان سەرىكتەستىك اۋداننىڭ ۇلكەنشىعان اۋىلدىق وكرۋگىنە قاراستى «قانت قىزىلشاسىنىڭ ەليتالىق تۇقىمىن وندىرەتىن شارۋاشىلىق» مارتەبەسىنە يە، - دەپ حابارلايدى قازاقپارات ءتىلشىسى.
«ەلباسىنىڭ جولداۋىمەن تانىسىپ شىقتىق. وسى جولداۋدىڭ «حالىق تابىسىنىڭ ءوسۋى» اتتى ءبىرىنشى بولىمىندەگى «ادام ەڭبەكقور بولىپ، ءوز كاسىبىن جاقسى مەڭگەرگەندە جانە لايىقتى جالاقى الۋعا نەمەسە جەكە كاسىپ اشىپ، ونى دامىتۋعا مۇمكىندىك بولعان كەزدە تابىس ارتادى» دەگەن سوزدەر كوكەيىمە قونا كەتتى.
پرەزيدەنتتىڭ ايتىپ وتىرعانى راس. ءوز كاسىبىڭنىڭ قىر- سىرىن جەتىك مەڭگەرىپ، ەسەلى ەڭبەك ەتسەڭ تابىسىڭ دا تاسقىنداپ، پايداڭ دا ارتا تۇسپەي مە؟! اباي اتامىزدىڭ «ەڭبەك ەتسەڭ ەرىنبەي، تويادى قارنىڭ تىلەنبەي» دەگەنى دە وسىندايدا ويعا ورالادى. سوسىن جولداۋدا ەلباسى اگروونەركاسىپ كەشەنىنىڭ الۋەتىن تولىق ىسكە اسىرۋ كەرەكتىگىن ايتىپ، مەملەكەتتىك قولداۋدىڭ بارلىق شارالارىن ەلىمىزگە زاماناۋي اگروتەحنولوگيالاردى اۋقىمدى تۇردە تارتۋعا باعىتتاۋ قاجەتتىگىن اتاپ ءوتتى.
ءدال وسىنى ءبىز ءوز ءىس- تاجىريبەمىزدەن جەتە تۇيسىنگەنمىز: بارشاعا ءمالىم، قانت قىزىلشاسى بۇرىن تەحنيكالىق داقىل بولىپ ەسەپتەلسە، ءقازىر ستراتەگيالىق ونىمگە اينالدى. بۇكىل ەلىمىزدە جەرگىلىكتى قىزىلشا تۇقىمىن وسىرەتىن جالعىز عانا شارۋاشىلىق بولىپ ەسەپتەلەتىن ءبىزدىڭ سەرىكتەستىك ون بەس جىلدان بەرى قازاق ەگىنشىلىك جانە وسىمدىك شارۋاشىلىعى عىلىمي- زەرتتەۋ ينستيتۋتىمەن جانە ۋكراينانىڭ بيوتەحنيكالىق قانت قىزىلشاسىن وسىرەتىن اكادەمياسىمەن تىعىز بايلانىستا جۇمىس ىستەپ كەلەدى»، - دەيدى سەرىكتەستىك باسشىسى.
ونىڭ ايتۋىنشا، سەرىكتەستىك قازىر قىزىلشانىڭ نەبىر تۇرلەرىن ءوسىرىپ، باسقا وڭىرلەردەگى ماماندانعان شارۋاشىلىقتەرمەن ىنتىماقتاسا ەڭبەك ەتىپ جاتىر.
«سونىڭ ارقاسىندا قازىر ەلىمىزگە قاجەتتى بارلىق قانت قىزىلشاسى تۇقىمىنىڭ 11 پايىزىن قامتاماسىز ەتىپ وتىرمىز. الداعى ۋاقىتتا وسى تابىسىمىز مولايا تۇسەتىنى ءسوزسىز. ويتكەنى، ەلباسىنىڭ جاڭا جولداۋىنىڭ ءتۇپ توركىنى - ءبىز سەكىلدى قاراپايىم شارۋالاردىڭ، جالپى حالىقتىڭ تابىسىن ارتتىرۋ. جاڭا باعدارلاما وسى باعىتتا سەنىمىمىزدى ارتتىرىپ، قۇلشىنىستى كۇشەيتە ءتۇستى»، - دەيدى الەن جولداسوۆ.
ءنۇرادىل بەگىمبەت