استانادا وتەتىن ايتىسقا كىل مىقتىلاردى قوسىپ وتىرمىز - ءجۇرسىن ەرمان

 استانا. قازاقپارات - قازاقستان رەسپۋبليكاسىنىڭ ەڭبەك سىڭىرگەن قايراتكەرى ءجۇرسىن ەرمان استانادا وتەتىن حالىقارالىق ايتىس تۋرالى ايتتى، دەپ حابارلايدى قازاقپارات ءتىلشىسى.

«ايتىستى ايتىس اقىندارى مەن جىرشى- تەرمەشىلەردىڭ حالىقارالىق وداعىمەن بىرلەسىپ ۇيىمداستىرۋدامىز. دايىندىق قاتىسۋشىلاردان باستالادى. وسى ايتىسقا ەڭ ءتاۋىر اقىنداردى قوسىپ وتىرمىز. ودان باسقا دا اقىندار بار، البەتتە ىرىكتەدىك. سودان كەيىن حالىقارالىق سايىس بولعاننان كەيىن جاستار دا قاتىسسىن دەپ، ەكى- ءۇش جاس اقىنعا سەنىم ارتىپ توپقا قوسىپ وتىرمىز» ، - دەيدى ءجۇرسىن ەرمان ەلوردادا مادەنيەت جانە سپورت ءمينيسترى ارىستانبەك مۇحامەدي ۇلىنىڭ قاتىسۋىمەن وتكەن باسپا ءسوز ءماسليحاتىندا.

ونىڭ ايتۋىنشا، ايتىسقا قىتاي حالىق رەسپۋبليكاسى، موڭعوليا مەن قىرعىز رەسپۋبليكاسىنان ەكى اقىننان شاقىرىلىپ وتىر.

«قازاقستاننان ىلعي بايگە الىپ كەتىپ جۇرگەن ءجاميعا مەن ۇلاربەك سىندى مىقتى اقىندار كەلەدى. سوندىقتان، ايتىستىڭ مارتەبەسى جوعارى. ماقسات - باس جارىپ، كوز شىعارىپ، بىرەۋدى جامانداۋ ەمەس، قايتا وسى ەلىمىزدىڭ ابىرويىن كورسەتىپ، بولىپ جاتقان جاقسى جاڭالىقتارىمىزدى، جەتىستىكتەرىمىزدى پاش ەتسەك دەيمىز. كەشەگى ەلباسىنىڭ جولداۋى اياسىندا وتەدى دەسەك تە تەرىس ەمەس. اقىندار قوعامدا بولىپ جاتقان ماسەلەلەر مەن قۇبىلىستاردى قوزعايدى عوي. ءبىرىڭعاي اڭگىمە ايتار دەپ تە ويلاپ قالماڭىزدار. سىپايى تۇردە كوركەم ولەڭمەن تۇسىنىكتى، ۇعىنىقتى تىلدە ايتىلادى» ، - دەدى ءجۇرسىن ەرمان.

ءجۇرسىن ەرمان سونىمەن قاتار، ايتىسقا قاتىساتىنداردىڭ ءبارى دە جۇلدە الىپ جۇرگەن جۇيرىكتەر ەكەنىن ايتىپ ءوتتى.

« ءار اقىننىڭ بابى مەن مۇمكىندىگى كورىنىپ ءجۇر. ايتىسقا قاتىساتىنداردى تاڭداعاندا وڭىرلىك قاعيداتتاردى دا ساقتاۋعا تىرىستىق. ياعني، قازاقستاننىڭ باتىسى مەن شىعىسىنان، وڭتۇستىگى مەن سولتۇستىگىنەن، ورتالىعىنان اقىندار قاتىسسىن دەپ وتىرمىز. كەشە عانا قوستانايدا ۇلكەن ايتىس ءوتتى. سول ايتىستا باس جۇلدە العان مۇحتار نيازوۆ تا بولادى. اقىنداردىڭ ءبارىنىڭ ارتىندا سونداي جەڭىستى جولدارى تۇر» ، - دەدى ءجۇرسىن ەرمان.

ەسكە سالا كەتسەك، بۇعان دەيىن 20-21 - قازان ارالىعىندا ەلوردادا «قازاقستان» كونسەرت زالىندا حالىقارالىق اقىندار ايتىسى وتەتىنىن حابارلاعان ەدىك. اقىندار ايتىسى استانانىڭ 20 -جىلدىعىنا ارنالىپ وتىر. ايتىسقا ميناتحان ۇلاربەك، ءجاميعا داۋلەت قىزى (ق ح ر) ، ايدوس راشات، امانجول قۋانتقان (موڭعوليا) ، اسىلبەك ماراتوۆ، ۋسۋپبەك ۋۋلۋ مۋندۋزبەك (قىرعىز رەسپۋبليكاسى) پەن قازاقستاننان رينات زايتوۆ، ەركەبۇلان قاينازاروۆ، سەرىك قويشىعۇلوۆ، ءبىرجان بايتۋوۆ، مۇحتار نيازوۆ قاتىسادى.