تۇندە جۇمىس ىستەۋ قانشالىقتى زيان؟

 استانا. قازاقپارات - بىزگە تۇنگى اۋىسىم قاجەت- اق. اۋەجاي، اۋرۋحانا، ءدارىحانا جانە مەيرامحانالار تاۋلىك بويى قولجەتىمدى بولماسا، دامىعان وركەنيەتكە ۇيرەنىپ قالعان ءبىزدىڭ قوعامعا قيىن بولادى.

ءبىراق، كۇن باتقان سوڭ جۇمىسى باستالاتىن ادامداردىڭ دەنساۋلىعى نە بولماق؟ ەندەشە، بۇل تۋرالى عالىمدار نە ايتاتىندىعىن قاراستىرايىق. اعزا تۇنگى كەستەگە تولىقتاي ۇيرەنىپ كەتە المايدى ساراپشىلار 24  جىل بويى ءتۇرلى جاستاعى 189 مىڭ ايەلدىڭ دەنساۋلىق جاعدايىن زەرتتەگەن. ولاردىڭ بارلىعى تۇنگى اۋىسىمدا كەزەكتەسىپ جۇمىس جاسايدى. ايەلدەر مۇنداي تارتىپپەن قانشالىقتى ۇزاق ءومىر سۇرسە، جۇرەك- قان تامىرلار اۋرۋى قاۋپى سونشالىقتى جوعارى بولاتىندىعى انىقتالعان. باسقا زەرتتەۋ ءۇش تۇنگى اۋىسىمنان سوڭ گەندەگى اقۋىز سينتەزىنىڭ پروتسەسى بۇزىلاتىندىعى كورىندى. ول بارلىق اعزانىڭ جۇمىسىن باياۋلاتادى. ادام -  كۇندىزگى تىرشىلىك يەسى، ونىڭ ىشكى بيولوگيالىق ساعاتى تاۋلىك ۋاقىتىنا باعىتتالعان. تۇندە اعزادا ۇيقى گورمونى مەلاتونين بولىنەدى: ول يممۋنيتەتتى كوتەرەدى جانە جاسۋشالاردى قارتايۋدان قورعايدى.

 ينسۋلين دەڭگەيى دە جوعارىلايدى، بۇل گارمون اشتىق سەزىمىنە جاۋاپ بەرەدى. سوندىقتان ءبىز تۇندە ۇيىقتاماساق، قارنىمىز اشادى. سونداي- اق، تۇندە ۇيىقتاماۋ كەزىندە كۇيزەلىس گارمونى كورتيزول مولشەرى كوبەيەدى. ياعني، اعزا ۇنەمى كۇيزەلىستە بولادى. ول دەمالمايدى جانە جىلدام شارشايدى.

 مۇنداي رەجيمنىڭ زاردابىن بىردەن كورەسىز: كۇندىزگى ۇيقىشىلدىق پايدا بولادى، ەستە ساقتاۋ مەن زەيىن قويۋ تومەندەيدى، كوڭىل كۇي مەن جۇمىسقا قابىلەتتىلىك ناشارلايدى. وسىلاي ۇزاق جۇمىس ىستەۋدىڭ سەبەبىنەن جارا، قانت ديابەتى، دەپرەسسيا جانە ءتىپتى، ءسۇت بەزى راگى قاۋپى جوعارىلاي تۇسەدى. زەرتتەۋلەر بويىنشا، كەستە ۇزاق ۋاقىت بويى وزگەرمەسە، ادام بەيىمدەلە باستاۋى مۇمكىن. ءبىراق بۇل قابىلەت بارىنە بىردەي بەرىلمەگەن: زەرتتەۋلەر تەك % 40 ادامنان مەلاتونيننىڭ كۇندىز بولىنە باستاعانىن بايقاعان. تۇنگى جۇمىستىڭ تاعى ءبىر كەمشىلىگى -  سپورت پەن دۇرىس تاماقتانۋعا از مۇمكىندىكتىڭ بولۋى. ساۋالنامالار تۇنگى اۋىسىمنان سوڭ سپورزالعا بارۋ نەمەسە تاماق ءپىسىرۋ قيىنعا تۇسەتىندىگىن كورسەتەدى. تۇنگى ءومىر ءسۇرۋ سالتىنىڭ زيانىن قالاي ازايتۋعا بولادى؟

 1. كۇندىز ۇيىقتاۋعا ۋاقىت تابىڭىز. ەرەسەك ادامعا 6,5-8 ساعات قاجەت.

 2. جارىقتا ۇيىقتاۋ قيىن، سوندىقتان جاعداي جاساپ الىڭىز. مىسالى: جاپقىشتى كۇن تۇسپەيتىندەي ەتىپ جابۋ جانە كوزىڭىزگە ارنايى ماسكا كيۋ.

 3. كەزەگىڭىزدىڭ باسىندا كوفەينى بار سۋسىن ءىشىپ، جارىق شام قوسىڭىز.

 4. اۋىسىمىڭىزدىڭ سوڭىندا كوفەينى بار ەشتەڭە ىشپەڭىز.

 5. كۇندىز دالادا جۇرۋگە تىرىسىڭىز. كۇننىڭ جارىعى جەتىسپەسە، دەپرەسسيا باستالۋى مۇمكىن.

 6. تۇستەن كەيىنگى ۇيقى 40 مينۋتتان اسپاۋ كەرەك. ەگەر ول 75 مينۋتتان اسىپ كەتسە، تەرەڭ ستادياعا ەنىپ، كۇنى بويى ۇيقىشىل بولىپ جۇرەسىز.

 7. تۇندە زات الماسۋ باياۋلايدى، سوندىقتان تۇنگى اۋىسىمدا سالماق جيناۋ وڭاي. تۇندە كالورياسى كوپ تاماق جەمەي، ءجيى قوزعالىڭىز.

Massaget.kz