جۋرناليست: تورەشتەردى توبەمىزگە شىعارىپ، «تورە» جاساعان ءوزىمىز كىنالىمىز

 استانا. قازاقپارات - بەلگىلى جۋرناليست، پروديۋسەر ارمان سقابىل ۇلى ەل ىشىندە تاعى شۋ شىعارعان تورەعاليدى سىنعا الدى.

«تورەشتەردى» توبەمىزگە شىعارىپ، «تورە» جاساعان ءوزىمىز. ۋىس- ۋىس اقشا بەرىپ تويعا شاقىرامىز، ونىمەن قويماي ۇشاقتىڭ بيزنەس كلاسىنا بيلەت الىپ بەرەمىز. بەس جۇلدىزدى قوناق ءۇي دايىندايتىنىمىز تاعى بار. وسىدان كەيىن «تورەشتەر» قۇتىرماي قايتسىن! بىلتىر وسىنداي ءبىر جۇلدىز ءىنىمىزدى شىمكەنتتە ۇشاقتىڭ قالىڭ جولاۋشىسى جارتى ساعات كۇتىپ تۇرعانىنا ءوزىم كۋا بولعانمىن. الدەبىر دوكەيدىڭ تويىنان كەشىگىپ كەلگەن الگى انشىگە جينالعان جۇرت رەنجۋدىڭ ورنىنا سۋرەتكە ءتۇسىپ، سەلفيلەتىپ جاتتى. تۇك بولماعانداي»، - دەيدى جۋرناليست جەلىدە.

وسى ورايدا جۋرناليست تورەعالي تورەالىنىڭ ۇشاققا زاڭسىز كىرگەنى جونىندە ءسوز قوزعاپ، انشىلەردى وسىلاي جاساۋىنا ءوزىمىز كىنالىمىز دەگەن پىكىر ايتتى.

 «كەشە تورەعالي تورەالى تايلاندقا باراتىن ۇشاققا بيلەتسىز كىرىپ، بالا- شاعاسىن شىعارىپ سالعان ەكەن! ۇشاقتىڭ ءىشى قايتا تەكسەرىلىپ، جارتى ساعاتقا كەشىگىپ ۇشقان. كەدەن، شەكارا، ۇشاق قىزمەتتەرىنىڭ بارلىعىنان تەكسەرۋسىز ءوتىپ كەتىپ، مەملەكەتتىك شەكارانى بۇزعان بۇل باۋىرىمنىڭ باسبۇزارلىعىنا ءوز باسىم ونشا تاڭ قالا قويعان جوقپىن. ونى دا ءبىر «تابىنۋشىسى» وتكىزگەن شىعار؟ «تورەشتەر» ەندى وزدەرىنە ءبارى بولادى دەپ ويلايدى. ولار جۇلدىز! ولار كوكتە ءجۇر! جەرگە تۇسىرگەن دۇرىس شىعار؟ ايتپەسە تاعى تالاي نارسەنى بۇلدىرەدى ولار»، -  دەپ جازدى ارمان سقابىل ۇلى.

ايتا كەتەيىك، تورەعالي تورەالى قىركۇيەك ايىنىڭ ورتاسىندا ۇشاق بورتىنا بيلەتسىز ءوتىپ، زاڭدى بۇزعان بولاتىن. ءانشى شەتەلگە جولعا شىققان جۇبايىنا كومەكتەسپەك بولىپتى. تورەعاليدى ۇشاققا زاڭسىز كىرگىزگەندەر جازاعا تارتىلدى.

Stan.kz