كاسىپكەر ەرمەكتى بيزنەسكە اينالدىرعان
وڭىرلىك كاسىپكەرلەر پالاتاسىنىڭ باستاماسىمەن جۇزەگە اسىرىلىپ كەلە جاتقان جوبا جاستار كاسىپكەرلىگىن دامىتۋ مەن قولداۋعا، تاجىريبە الماسۋ مەن بايلانىس ورناتۋعا باعىتتالعان، دەپ حابارلايدى Baq.kz اقپارات اگەنتتىگى.
بۇل تۋرالى الماتى وبلىسى كاسىپكەرلەر پالاتاسىنىڭ باسپا ءسوز حاتشىسى مالىمدەدى. جوبا اياسىندا ستۋدەنتتەر، جاستار مەن جاڭادان كاسىپ باستاۋشىلارعا تابىستى كاسىپكەرلەرمەن كەزدەسۋلەر ۇيىمداستىرىلادى.
اعاشتان ۇلتتىق ىدىس- اياق جاسايتىن ابزال بەگىمبەتوۆپەن كەزدەسۋگە «باستاۋ» كاسىپكەرلىك نەگىزدەرىنە وقىتۋ جوباسىنىڭ تۇلەكتەرى مەن ب ا ق وكىلدەرى شاقىرىلدى.
كاسىپكەردىڭ سوزىنشە، استاۋ سياقتى ىدىستى دايىنداپ شىعارۋ وڭاي بولا قويمادى. ءبارى دە قىزىعۋشىلىقتان باستالعان. كەيىن بۇل ەرمەك بيزنەسكە اينالعان.
«بىرنەشە جىل بۇرىن ءداستۇرلى ىدىستاردى جاساۋعا قىزىعۋشىلىق تانىتىپ، ءۇي جاعدايىندا جاساي باستادىم. وكىنىشكە وراي، تسەحتارعا جۇگىنگەنىممەن، وندا وقىتۋ جۇرگىزۋگە باس تارتاتىن. وسىلايشا تاراز قالاسىندا وسىنداي ءونىم شىعاراتىن كاسىپكەرمەن جولىقتىم. كەلىسسوزدەردەن كەيىن سەحتارىنىڭ ءبىرىن جالعا الىپ، جۇمىسشىلاردى تارتىپ، ءىستى باستاپ كەتتىم. سول كەزدە قولونەر شەبەرلەرى كوپ ەكەنىن بايقادىم. الايدا، ءوندىرىس ورنىن دايىنداپ، ءونىمدى جىلجىتۋ مەن وتكىزۋدى كوبىسى بىلە بەرمەيدى. مىنە، وسىلايشا، كاسىپكەرلىك قىزمەتىم باستالدى» ، - دەيدى ابزال بەگىمبەتوۆ.
بۇدان سوڭ ول «تابىس» جەكە كاسىپكەرى رەتىندە تىركەلىپ، 2017 -جىلى «بيزنەستىڭ جول كارتاسى - 2020» باعدارلاماسى اياسىنداعى مەملەكەتتىك گرانتتار بايقاۋىنا قاتىستى. اعاشتان ۇلتتىق ىدىستار جاساۋ ءوندىرىسى جوباسى ۇزدىك اتانىپ، ميلليون تەڭگە كولەمىندەگى گرانت بۇيىردى. بۇل قاراجاتقا قۇرال- جابدىقتار ساتىپ الىنىپ، سەح كەڭەيتىلدى.
ءوندىرىس تسەحىندا بەس ادام جۇمىس ىستەيدى. ولار كۇنىنە 12-15 دانادان استاۋ دايىندايدى. اعاشتىڭ جاسى ۇلكەن بولعان سايىن، ىدىستىڭ ساپاسى مەن جارامدىلىق مەرزىمى ۇلعايادى.
«استاۋ - تۇتىنۋشىلار اراسىندا سۇرانىسى جوعارى ىدىستىڭ ءبىر ءتۇرى. ءبىزدىڭ ءونىم استانا، الماتى، قوستاناي قالالارىندا ساۋدالانادى. جالپى تاپسىرىس كوپ، سوندىقتان ءونىمدى وتكىزۋ بويىنشا كەدەرگى جوق» ، - دەپ ءبولىستى ول.
ابزال بەگىمبەتوۆ ساپانى قامتاماسىز ەتۋ مەن اۆتورلىق قۇقىقتى ساقتاۋ ماقساتىندا ءاربىر ونىمگە «ۇكى كوز» دەگەن قازاقتىڭ ەجەلگى ويۋ- ورنەگىن باسادى. ءوز كەزەگىندە بۇل ورنەكتى ۇقساتىپ جاساۋ وڭاي ەمەس.
كاسىپكەرلىكتە ەڭ الدىمەن ءوز ءىسىڭدى جاقسى كورۋىڭ كەرەك جانە شەبەرلىگىڭدى دامىتىپ، ونى جەتىلدىرىپ وتىرۋىڭ قاجەت، دەيدى كاسىپكەر. از ۋاقىت ىشىندە ابزالدىڭ كاسىبيلىگىنىڭ ارقاسىندا ونىمدەرى سۇرانىس ارتىپ، وڭىردە تانىمالدىلىعى ارتتى. سونىمەن بىرگە ول جاس شەبەرلەر مەن كاسىپكەرلەرگە تالىمگەر اتاندى. ءوندىرىس ورنىنا ونداعان ادام وقۋعا جازىلىپ، كەيىن ءوز ىستەرىن اشقان. ەندىگى تاڭدا ابزال بەگىمبەتوۆ ءونىم تۇرلەرىنىڭ جەلىسىن كوبەيتۋدى جوسپارلاپ وتىر.
Baq.kz