قازاق جامبىشىلارى الەم چەمپيونى اتاندى
23 مەملەكەتتىڭ الپىستان استام مەرگەندەرى باق سىناعان وسى الەم چەمپيوناتىندا قازاقستاندىق قوس سۇرمەرگەن ەلدوس باداشيەۆ پەن ابزال تۋلىبەكوۆ كوماندالىق باسەكەدە باس جۇلدەنى يەلەنىپ، الەم چەمپيوندارى اتاندى.
باسەكە باستالاردان بىرەر كۇن بۇرىن وتكەن سەميناردا ءبىزدىڭ مەرگەندەر الەم چەمپيوناتىنا جينالعان سپورتشىلار مەن كورەرمەندەرگە «قازاق ءستيلى» بويىنشا جامبى اتۋدىڭ ءادىس- تاسىلدەرىن ءتۇسىندىرىپ، ارنايى الاڭدا ات ۇستىنەن اتىپ تا كورسەتكەن. ءسويتىپ، «قازاق ءستيلى» بويىنشا بىرنەشە مەملەكەت مەرگەندەرى قاتىسقان جارىس ۇيىمداستىرىلعان. جامبى اتۋدىڭ باسەكەسىنە قاتتى قىزىققان وڭتۇستىك كورەيا رەسپۋبليكاسىنداعى دۇنيەجۇزىلىك ات ۇستىنەن ساداق اتۋ فەدەراتسياسىنىڭ پرەزيدەنتى كيم يۋنگ سۋپ مىرزا سەمينار ۇستىندە «قازاق ءستيلىن» كەلەسى جىلعى الەم چەمپيوناتىنا قوسۋعا ۋادە بەرىپ، ق ر ۇلتتىق ات سپورتى قاۋىمداستىعىنا ارنايى سەرتيفيكات جولداعان.
الەم چەمپيوناتىندا ءبىزدىڭ مەرگەندەر جارتىلاي فينالدا موڭعوليالىقتاردان، اقتىق باسەكەدە وڭتۇستىك كورەيالىقتاردان باسىم ءتۇسىپ، الەم چەمپيوناتىنىڭ التىن مەدالىن ولجالادى. وسى جارىس ۇستىندە ابزال تۋلىبەكوۆ ەڭ كىشكەنتاي نىسانا اتۋدان (15*15 س م) رەكوردتىق كورسەتكىشكە قول جەتكىزگەن. بۇعان دەيىن مۇنداي ۇساق نىساناعا ابزال سياقتى قاتارىنان ءتورت جەبەسىن قاتارىنان قاداعان مەرگەن بولماپتى.
ەسكە سالىپ وتسەك، ەلدوس باداشيەۆ پەن ابزال تۋلىبەكوۆ بۇعان دەيىن ات ۇستىنەن ساداق اتۋدان تۇركيا، ۆەنگريا، يوردانيادا وتكەن دۇنيەجۇزىلىك جارىستارعا قاتىسقان تاجىريبەلى سپورتشىلار. ق ر چەمپيوناتىنىڭ جەڭىمپازى، استانادا ەكى جىل قاتارىنان ۇيىمداستىرىلعان «التىن جەبە» حالىقارالىق ءتۋرنيرىنىڭ جۇلدەگەرلەرى.
الەم چەمپيونى اتانعان مەرگەندەردى سالتاناتتى قارسى الۋ ءراسىمى الماتى اۋەجايىندا وتەدى. جەڭىمپاز مەرگەندەر ەلدوس باداشيەۆ پەن ابزال تۋلىبەكوۆ 9 - قازان كۇنى ساعات 22 دە الماتى اۋەجايىنا ۇشىپ كەلەدى.