نۇرسۇلتان نازاربايەۆ ەلوردادا ب ۇ ۇ اياسىندا وتەتىن شارالاردى اتادى
اقوردادا ءبىرقاتار شەت ەلدەردىڭ قازاقستانعا جاڭادان تاعايىندالعان توتەنشە جانە وكىلەتتى ەلشىلەرىنەن سەنىم گراموتاسىن قابىل الۋ سالتاناتتى شاراسىندا ەلباسى نۇرسۇلتان نازاربايەۆ وسىلاي دەدى، دەپ حابارلايدى قازاقپارات ءتىلشىسى.
«سىزدەر حالىقارالىق قاتىناستار جۇيەسى تۇبەگەيلى وزگەرىستەرگە ۇشىراپ وتىرعانىن بىلەسىزدەر. بۇگىنگى زاماناۋي الەمنىڭ قاۋىپتى ءارى قۇبىلمالى جاعدايعا تاپ بولعانى وكىنىشتى. جاقىندا نيۋ-يوركتە وتكەن ب ۇ ۇ باس اسسامبلەياسىنىڭ كەزەكتى سەسسياسىندا كەيبىر ەلدەر اراسىندا سەنىم داعدارىسىنىڭ ودان ارى ءورشي تۇسكەنى انىق بايقالدى. ءوزارا سەنىم ورنىقپاسا داعدارىسقا قارسى كەز-كەلگەن ءىس-قيمىلدىڭ وڭ ناتيجەسى بولمايتىنىن مەن ءاردايىم ايتىپ كەلەمىن. قازاقستان وسى پروتسەسكە بەي-جاي قاراپ وتىرعان جوق. ءبىز سىرتقى ساياسي ستراتەگيامىزدا كوپۆەكتورلىق باعىتتى، تەڭگەرىمدى ءارى بەلسەندى ۇستانىمدى باسشىلىققا الىپ وتىرمىز»، - دەدى نۇرسۇلتان نازاربايەۆ.
سونىمەن قاتار ق ر پرەزيدەنتى قازاقستان ب ۇ ۇ قاۋىپسىزدى كەڭەسىنىڭ تۇراقتى ەمەس مۇشەسى رەتىندە الەمدەگى قاۋىپسىزدىكتى ساقتاۋعا ناقتى قادامدار جاساۋ ارقىلى ءوز ۇلەسىن قوسىپ وتىرعانىن باسا ايتتى.
«وسى ايدىڭ وزىندە ب ۇ ۇ اياسىندا ءبىزدىڭ ەلوردامىزدا ەكى ءىرى شارا وتەدى. ءبىرىنشىسى - شەكارالىق سۋ ارنالارى مەن حالىقارالىق كولدەردى قورعاۋ جانە پايدالانۋ تۋرالى كونۆەنسيانىڭ سەسسياسى. ەكىنشىسى - دۇنيەجۇزىلىك دەنساۋلىق ساقتاۋ ۇيىمى مەن يۋنەسەف-تىڭ العاشقى مەديتسينالىق سانيتارلىق كومەك جونىندەگى جاھاندىق كونفەرەنسياسى. ال استانادا وتەتىن الەمدىك جانە ءداستۇرلى دىندەر كوشباسشىلارىنىڭ 6- سەزىنە سىزدەردىڭ ەلدەرىڭىزدەن دە دەلەگاتسيالار قاتىسادى دەپ كۇتەمىز»، - دەدى ەلباسى.