قاراعاندى كوللەدجدەرىنە قازاق تىلىنە اۋدارىلعان كىتاپتار جەتتى
«بولاشاقتا جاستارىمىز شەتەلدىك ازاماتتاردان قالىس قالماۋى، 30 الپاۋىت مەملەكەتتىڭ قاسىنان تابىلۋى ەڭ بىرىنشىدەن، وسى گۋمانيتارلىق سالاعا بايلانىستى. گارۆارد، ستەنفورد، وكسفورد سياقتى وقۋ ورىندارى وسى كىتاپتارمەن ءدارىس بەرىپ جاتىر. ءبىز وسى كىتاپتاردى جوعارى سىنىپ وقۋشىلارى مەن كوللەدج ستۋدەنتتەرىنە جەتكىزۋدى ءجون سانادىق»، - دەدى وبلىستىق ءبىلىم باسقارماسىنىڭ باسشىسى ەسەنعازى يمانعاليەۆ.
ءبىلىم سالاسى ماماندارىنىڭ ايتۋىنشا، «100 جاڭا وقۋلىق» جوباسى عىلىمي مازمۇن مەن قازاق ءتىلىنىڭ لەكسيكاسىن بايىتۋعا، عىلىمي تەرمينولوگيانى ودان ءارى دامىتۋعا سەرپىن بەرەدى. سونداي- اق جاستاردىڭ الەمنىڭ ۇزدىك ستاندارتتارىمەن ءبىلىم الۋىنا جول اشادى. بۇدان بولەك، جوبا اياسىندا جەتەكشى حالىقارالىق ۋنيۆەرسيتەتتەر، عىلىمي ورتالىقتار مەن وقۋلىقتار شىعارۋعا ماماندانعان باسپالارمەن تىعىز ىنتىماقتاستىق ورناتىلۋدا.
ەسكە سالايىق، «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» - ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا جاريالانعان جوبالاردىڭ ءبىرى. بيىلعى ءساۋىر ايىندا العاشقى 18 وقۋلىق اۋدارىلىپ، پرەزيدەنتكە تانىستىرىلدى.
ولار: دەرەك دجونستوننىڭ «فيلوسوفيانىڭ قىسقاشا تاريحى. سوكراتتان دەرريداعا دەيىن»؛ ەنتوني كەننيدىڭ «باتىس فيلوسوفياسىنىڭ جاڭا تاريحى. انتيكا فيلوسوفياسى» I- تومى جانە «باتىس فيلوسوفياسىنىڭ جاڭا تاريحى. ورتا عاسىر فيلوسوفياسى» II- تومى؛ رەمي حەسستىڭ «فيلوسوفيانىڭ تاڭداۋلى 25 كىتابى»؛ دەۆيد برينكەرحوف، روۋز ۋەيتس، سيۋزان ورتەگانىڭ «الەۋمەت تانۋ نەگىزدەرى»؛ دجوردج ريتتسەر، دجەففري ستەپنيتسكيدىڭ «الەۋمەت تانۋ تەورياسى»؛ ەلليوت ارونسوننىڭ «كوپكە ۇمتىلعان جالعىز. الەۋمەتتىك پسيحولوگياعا كىرىسپە»؛ دۋەين شۋلتس، سيدنەي ەللەن شۋلتستىڭ «قازىرگى پسيحولوگيا تاريحى»؛ دەۆيد گ. مايەرس، جان م. تۋەنجدىڭ «الەۋمەتتىك پسيحولوگيا»؛ ن. گرەگوري مەنكيۋ، مارك پ. تەيلوردىڭ «ەكونوميكس»؛ دونالد ف. كۋراتكونىڭ «كاسىپكەرلىك: تەوريا، پروتسەسس، پراكتيكا»؛ ريككي ۋ. گريففيننىڭ «مەنەدجمەنت»؛ كارەن ارمسترونگتىڭ «يۋدايزم، حريستياندىق پەن يسلامداعى 4000 -جىلدىق ىزدەنىس: قۇداي تانۋ بايانى»؛ ۆيكتوريا فرومكين، روبەرت رودمان، نينا حايامستىڭ «ءتىل بىلىمىنە كىرىسپە»؛ سۆەتلانا تەر- ميناسوۆانىڭ «ءتىل جانە مادەنيەتارالىق كوممۋنيكاتسيا»؛ الان بارناردتىڭ «انتروپولوگيا تاريحى مەن تەورياسى»؛ كلاۋس شۆابتىڭ «ءتورتىنشى يندۋستريالىق ريەۆوليۋتسياسى».
وقۋلىقتاردىڭ ءتىزىمى مەن جوبا تۋرالى تولىق اقپاراتتى www.100kitap.kz سايتىنان الۋعا بولادى.