دارىگەرلەردىڭ جالاقىسى قاشان وسەدى - پرەزيدەنت جولداۋى
بۇل تۋرالى بۇل تۋرالى پرەزيدەنت جولداۋىن تالقىلاۋعا ارنالعان ق ر ۇكىمەتىنىڭ كەڭەيتىلگەن وتىرىسىندا دەنساۋلىق ساقتاۋ ءمينيسترى ەلجان ءبىرتانوۆ ايتتى، دەپ حابارلايدى قازاقپارات ءتىلشىسى.
وتىرىستا مينيستر حالىققا مەديتسينالىق قىزمەت كورسەتۋ ساپاسىن جاقسارتۋ ماقساتىندا بارلىق ۋچاسكەلىك مەديتسينا قىزمەتكەرلەرىنىڭ جالاقىسى ساتىلاي %20 عا ارتاتىنىن اتاپ ءوتتى. ياعني، بۇل - 10 مىڭنان اسا ۋچاسكەلىك دارىگەر مەن 30 مىڭ مەدبيكەنىڭ جالاقىسى جاڭا ادىستەردى مەڭگەرۋ دەڭگەيىنە قاراي كەلەسى جىلدىڭ سوڭىنا دەيىن وسەدى دەگەن ءسوز. بۇل ماقساتقا 5 ميلليارد تەڭگە بولىنەدى. بۇل مەديتسينالىق كومەكتىڭ ساپاسىن جاقسارتۋعا، نەگىزگى اۋرۋلار كەزىندە اسقىنۋلار مەن اۋرۋحاناعا جاتقىزۋ سانىن ازايتۋعا، سونداي-اق بالالار مەن جۇكتى ايەلدەرگە ساپالى مەدكومەك كورسەتۋگە مۇمكىندىك بەرەدى.
سونىمەن قاتار، بيىل قاعازسىز دەنساۋلىق ساقتاۋ جۇيەسىنە كوشۋ بويىنشا پيلوتتىق جوبا اياقتالۋدا. جوبا پيلوتتىق ۇيىمداردىڭ %92 ىندا جۇزەگە استى. مەملەكەت باسشىسىنىڭ تاپسىرماسىن ىسكە اسىرۋ اياسىندا 2019 -جىلدىڭ 1 -قاڭتارىنان باستاپ بارلىق ەمحانالار مەن اۋرۋحانالار تولىعىمەن قاعازسىز مەديتسينالىق قۇجاتتارمەن جۇمىس ىستەيتىن بولادى. بۇدان باسقا، 2020 -جىلعا قاراي حالىقتىڭ %100 ى ەلەكتروندى پاسپورتپەن قامتىلادى.
سونىمەن قاتار، مەملەكەت باسشىسىنىڭ تاپسىرماسى بويىنشا استاناداعى ۇلتتىق عىلىمي ونكولوگيالىق ورتالىقتىڭ جاڭا تۇجىرىمداماسى ازىرلەنگەن.
ورتالىق قۇرىلىسى استاناداعى قولدانىستاعى مەديتسينالىق كلاستەر نىساندارىنىڭ بىرىندە تۇرعىزىلماق. بۇل ورتالىقتى بولاشاقتا مەديتسينا مەكتەبى مەن نازاربايەۆ ۋنيۆەرسيتەتىنىڭ عىلىمي ورتالىقتارىمەن ينتەگراتسيالاۋعا مۇمكىندىك بەرەدى. وندا ونكولوگيالىق اۋرۋلاردى انىقتاۋ مەن ەمدەۋگە، ونىڭ ىشىندە يادرولىق مەديتسينادا، پروتون تەراپياسىندا، راديوحيرۋرگيادا، جاسۋشالىق يممۋنوتەراپيادا قولدانىلاتىن زاماناۋي تەحنولوگيانىڭ ءبارى بولماق. قۇرىلىس جۇمىستارى بيىل باستالادى.
ايتا كەتسەك، كەشە ۇكىمەت ۇيىندە ق ر پرەمەر-ءمينيسترى ب. ساعىنتايەۆتىڭ توراعالىعىمەن پرەزيدەنت اكىمشىلىگىنىڭ باسشىسى ءا. يسەكەشەۆتىڭ قاتىسۋىمەن مەملەكەت باسشىسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» قازاقستان حالقىنا ارناعان جولداۋىندا اتالعان تاپسىرمالاردى ورىنداۋ ماسەلەلەرى بويىنشا قر ۇكىمەتىنىڭ كەڭەيتىلگەن وتىرىسى وتكەن بولاتىن.
ەسكە سالا كەتسەك، مەملەكەت باسشىسى نۇرسۇلتان نازاربايەۆ حالىققا ارناعان جىل سايىنعى جولداۋىندا مەديتسينا قىزمەتكەرلەرىنىڭ جالاقىسىن كوتەرۋدى تاپسىرعان ەدى.