جولداۋدان كەيىنگى وزگەرىستەردى كەلەسى جىلدىڭ بيۋدجەتىنە ەنگىزۋ كەرەك - ۆلاديمير بوجكو

استانا. قازاقپارات - ق ر پارلامەنتى ءماجىلىسى ءتوراعاسىنىڭ ورىنباسارى ۆلاديمير بوجكو دەپۋتاتتاردىڭ ق ر پرەزيدەنتى جولداۋىن قالاي جۇزەگە اسىراتىنىن ايتىپ بەردى، دەپ حابارلايدى قازاقپارات ءتىلشىسى.

ونىڭ ايتۋىنشا، جولداۋدا ايتىلعان ماسەلەلەر بويىنشا زاڭ جوبالارى قاراستىرىلىپ جاتىر.

«پرەزيدەنتتىڭ جولداۋىن جۇزەگە اسىرۋدا دەپۋتاتتىق توپتىڭ الدىندا تۇرعان مىندەتتەر ايتارلىقتاي سالماقتى. بيىل ەڭبەكاقى مەن زەينەتاقىنىڭ كوتەرىلۋىنە كۋا بولدىق، ءوزىمىز دە زاڭنامالىق بازانى جەتىلدىرۋگە بەلسەنە قاتىستىق. از قامتىلعان جاندارعا قولداۋ كورسەتۋ ماسەلەلەرى شەشىلدى، جۇمىسپەن قامتۋ، بيزنەستى قولداۋ، جەكە كاسىپكەرلىكپەن اينالىسقىسى كەلەتىن ازاماتتاردى وقىتۋعا ارنالعان «باستاۋ بيزنەس» باعدارلاماسى جۇمىس ىستەيدى»، - دەدى ۆ. بوجكو استانادا «پرەزيدەنت جولداۋىنداعى مىندەتتەردى ىسكە اسىرۋداعى قازاقستان حالقى اسسامبلەياسىنىڭ ورنى مەن ءرولى» اتتى ق ح ا كەڭەسىنىڭ كەڭەيتىلگەن وتىرىسىندا.

ول دەپۋتاتتىق كورپۋستاردىڭ، اسىرەسە ق ح ا اتىنان سايلانعان دەپۋتاتتاردىڭ زاڭ شىعارۋشىلىققا ەرەكشە كوڭىل بولەتىنىن اتاپ ءوتتى.

«قازىر پرەزيدەنت ايتقان تۇرعىن ءۇي- كوممۋنالدىق شارۋاشىلىق تۋرالى زاڭ قابىلداۋىمىز كەرەك. ازىرگە قاراستىرىلىپ جاتىر. اۋىل شارۋاشىلىعى تۋرالى زاڭعا وزگەرىستەر مەن تولىقتىرۋلار ەنزىگۋ تۋرالى زاڭ جوباسىن ازىرلەپ جاتىرمىز. وندا پرەزيدەنت جولداۋىندا ايتىلعان ەسكەرتپەلەردى نازارعا الامىز. ودان بولەك، دەپۋتاتتىق توپتىڭ الدىندا ءۇشجىلدىق بيۋدجەتتى قابىلداۋ مىندەتى تۇر. ەڭ باستىسى 2019 -جىلعا ارنالعان بيۋدجەت تۋرالى زاڭدى قاراۋ. پرەزيدەنت جولداۋىنان كەيىنگى بارلىق وزگەرىستەردى كەلەسى جىلدىڭ بيۋدجەتىنە ارنالعان زاڭ جوباسىنا ەنگىزۋىمىز قاجەت»، - دەدى ۆ. بوجكو.

ەسكە سالا كەتسەك، كەشە قازاقستان پرەزيدەنتى نۇرسۇلتان نازاربايەۆ «قازاقستاندىقتاردىڭ ءال- اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىن جاريالادى.