ساراپشى «پەداگوگتاردىڭ مارتەبەسى» تۋرالى قۇجاتقا پىكىر ءبىلدىردى

استانا. قازاقپارات - قازاقستانداعى بۇلدىرشىندەردى ءبىلىم بەرۋدىڭ زاماناۋي ستاندارتتارىمەن وقىتۋعا نازار اۋدارىلادى.

بۇل تۋرالى ەلباسى جولداۋىنا قاتىستى پىكىرىندە ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ورىنباسارى ءمادينا نۇرعاليەۆا ءمالىم ەتتى، دەپ حابارلايدى قازاقپارات.

«2023 -جىلعا دەيىن بىلىمگە، عىلىمعا جانە دەنساۋلىق ساقتاۋ سالاسىنا باعىتتالاتىن قارجىنى جالپى ىشكى ءونىمىنىڭ 10 پايىزىنا دەيىن ارتتىرۋ جوسپارلانىپ وتىر. ارينە، بۇل وتە ماڭىزدى مىندەت»، - دەپ توقتالدى ساراپشى.

ونىڭ سوزىنە قاراعاندا، قازىرگى كەزدە قازاقستان عىلىمعا ج ءى ءو- گە شاققاندا 0,14 پايىز دەڭگەيىندە، بىلىمگە ج ءى ءو -نىڭ 3,8 پايىزى جانە دەنساۋلىق ساقتاۋ سالاسىنا ج ءى ءو -نىڭ 3,5 پايىزى كولەمىندە قارجى جۇمساپ كەلەدى. وسى رەتتە اتالعان سالالارعا 7,5 پايىز شاماسىندا قارجى باعىتتالۋدا.

«بيىلعى جولداۋدا وسكەلەڭ ۇرپاققا ەرەكشە نازار اۋدارىلىپ وتىرعانىن ايرىقشا بايقاۋعا بولادى. مەملەكەت باسشىسى جالپى ءبىلىم بەرۋ ساپاسىن كوتەرۋ ماسەلەسىنە ەكپىن قويدى. قازىرگى زامانعى ءومىر جاعدايى بالالاردى بولاشاققا تىڭعىلىقتى دايارلاۋدى تالاپ ەتەدى. وسى ورايدا تاربيەشىلەرگە قاتىستى بىلىكتىلىك تالاپتارىن قايتا قاراۋ ەسكەرىلىپ وتىر. سونىمەن قاتار، ولاردىڭ ەڭبەكاقى تولەۋ جۇيەسىن قاراستىرۋعا نازار اۋدارىلدى. اتاپ ايتقاندا، مەكتەپكە دەيىنگى ءبىلىم بەرۋدە وقىتۋدىڭ جاڭا ءادىسنامالارىن ەنگىزۋگە قاتىستى ناقتى قادامدار ىسكە اسىرىلاتىن بولادى. بۇل تۇرعىدا ءبىزدىڭ بالالار ءبىلىم بەرۋدىڭ جاڭا پاراديگماسىندا وقيدى»، - دەدى ءمادينا نۇرعاليەۆا.

ساراپشىنىڭ پايىمداۋىنشا، «پەداگوگتاردىڭ مارتەبەسى» تۋرالى زاڭ قابىلداۋ وتە ماڭىزدى قادام بولىپ وتىر.

«وسى قۇجاتتىڭ قاجەتتىلىگى بۇرىننان سەزىلۋدە. مۇعالىمدەر ەلدەگى جاڭعىرتۋ وزگەرىستەرىنىڭ كوشباسشىسى. سوندىقتان دا ولاردى باعالاپ، سىيلاستىقپەن قاراپ، قامقورلىق جاساۋىمىز قاجەت. وسى ورايدا ءمۇعالىمنىڭ مارتەبەسى مەن اتاعىن كوتەرۋ - وتە قاجەتتى قادام»، - دەپ ءتۇيدى ءمادينا نۇرعاليەۆا.

بۇدان بۇرىن حابارلانعانداي، ەلباسى نۇرسۇلتان نازاربايەۆ قازاقستان حالقىنا ارنالعان جولداۋىندا بالاباقشالاردا تاربيەشىلەر جالاقىسىنا قاتىستى تاپسىرما بەردى.

مۇنىمەن قوسا پرەزيدەنت مەكتەپتەگى اياعى جوق رەفورمالارعا سوڭعى شەشىم جاسالاتىنىن قاداپ ايتتى.

جولداۋ جۇكتەگەن مىندەتتەردىڭ اراسىندا عىلىم مەن دەنساۋلىق سالالارىنا قارجىلاندىرۋ كولەمىن ارتتىرۋ ماقساتى ەسكەرىلگەن.

نۇرسۇلتان نازاربايەۆ قازاقستان حالقىنا جولداۋى بارىسىندا 2019 -جىلى قازاقستاندا «پەداگوگتاردىڭ مارتەبەسى» تۋرالى زاڭ قابىلداناتىنىن اتاپ ءوتتى.

فوتو: www.kisi.kz