جولداۋدى ءتيىمدى جۇزەگە اسىرۋدا پاسسيوناري جاستار كەرەك - دانيار ماناربەك ۇلى

استانا. قازاقپارات - ق ر تۇڭعىش پرەزيدەنتى - ەلباسى كىتاپحاناسىندا مەكتەپ وقۋشىلارى مەن ستۋدەنتتەرگە ارنالعان تانىمدىق سەمينار-ترەنينگتەر سيكلى جالعاسىپ جاتىر.

«رۋحاني جاڭعىرۋ: بولاشاققا باعدار» باعدارلامالىق ماقالاسى اياسىندا ءوتىپ جاتقان شارانىڭ كەزەكتى سپيكەرى - «نۇر وتان» پارتياسى «جاس وتان» جاستار قاناتىنىڭ ءتوراعاسى دانيار ماناربەك ۇلى.

دانيار مىرزا «پاسسيوناري بولۋ دەگەنىمىز...» تاقىرىبىندا قوستاناي جانە قاراعاندى وبلىسى جاستارى الدىندا ءسوز سويلەپ، مەملەكەت باسشىسى جولداۋىنىڭ ماڭىزدى تۇستارىنا توقتالدى.

- سەمينار-ترەنينگ اياسىندا ءسىز ەلباسىنىڭ بۇگىنگى «قازاقستاندىقتاردىڭ ءال اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىنىڭ ماڭىزى تۋراسىندا دا ەگجەي- تەگجەيلى ايتىپ ءوتتىڭىز...

- ءيا، ءوزارا ديالوگ فورماتىندا وتكەن بۇل جولداۋدا كەلەر جىلدىڭ «جاستار جىلى» بولىپ بەلگىلەنۋى جاس بۋىننىڭ وكىلى رەتىندە قۋانا قابىلداعان جاڭالىعىم بولدى. جاستار ماسەلەسى دەگەندە البەتتە ەكى پروبلەمانىڭ باسى قىلتيادى: جۇمىس پەن باسپانا. مۇنىڭ ەكەۋى دە الەۋمەتتىك ماسەلەلەر. بۇل تۇرعىدا، ەلباسى جولداۋىنىڭ باسىم بولىگى الەۋمەتتىك باعىتتا بولعانى قۇپتارلىق. وسى ورايدا، ەڭ تومەنگى جالاقىنىڭ كوتەرىلۋى مەن «7-25-20» باعدارلاماسىنداعى العاشقى جارنانى تومەندەتۋدى قاراستىرۋدى تاپسىرعانى دا جاستارعا كومەك بولارى ءسوزسىز. بۇعان قوسا، بيزنەسكە سالىقتىق راقىمشىلىق جاساۋ مەن «بيزنەستىڭ جول كارتاسى» باعدارلاماسىنىڭ 2025 -جىلعا دەيىن ۇزارتىلۋى دا جاستاردى كاسىپكەرلىككە كوپتەپ تارتىپ، ىنتالاندىرۋعا زور كومەك بولماق. ويتكەنى، بۇل باعدارلاما بيزنەسىن جالعاستىرىپ جاتقاندار ءۇشىن عانا ەمەس، ەندى باستاپ جاتقان وسكەلەڭ ۇرپاق ءۇشىن دە سەپتىگى مول بولارىنا سەنىم مول.

- ءسىزدىڭ سەمينارىڭىز جاستار اراسىنداعى پاسسيونارلىق تاقىرىبىنا ارنالدى. نەلىكتەن؟

 - پاسسيوناري - وزىق مۇرات ءۇشىن ۇلكەن تاۋەكەلگە بارۋعا دايىن تۇلعا. توقتاۋسىز ىزدەنىستىڭ سوڭىندا جۇرەتىن ونداي جاندار ماڭايىنا شۋاعىن شاشىپ ءجۇرىپ، كەۋدەسىنە ۇيالاعان وزىق يدەيانى وزگەگە بىرتە- بىرتە سىڭىرە باستايدى. سول ارقىلى جانىنا پىكىرلەس جانداردىڭ شوعىرىن قالىپتاستىرعانىن ءوزى دە بايقاماي قالادى. وزىق يدەياسى ارقىلى ماگنيتشە تارتا بىلەتىن ونىڭ باتىل مىنەزى ءارى- بەرىدەن سوڭ ناعىز كوشباسشىعا لايىق تۇلعالاردى ءوز ماڭايىنا توپتاستىرادى.

- قازىرگى جاستار اراسىندا پاسسيوناريلەر كوپ پە؟

- قازىردە جاستار اراسىندا بيزنەس، عىلىم مەن مەديا جانە باسقا سالاداعى جىگەرلىلىكتى، قايسارلىقتى بايقايمىن. ولاردىڭ اراسىندا ناعىز پاسسيوناريلەر كوپ. تەورەتيك مامانداردىڭ ايتۋىنا سەنسەك، جاستاردىڭ جىلدام جۇمىلا بىلەتىن قابىلەتى مەن سىني ويلاي الاتىن قاسيەتى ۇلكەن وزگەرىسكە الىپ كەلە الادى. جولداۋدى ءتيىمدى جۇزەگە اسىرۋدا دا پاسسيوناري جاستار قوعامعا كوپتەپ كەرەك. مەنىڭ ماقساتىم دا وسى. كوپ نارسە جاستاردىڭ وزىنە بايلانىستى ەكەنىنە كوز جەتكىزدىرۋ.

اڭگىمەلەسكەن قانات اۋەسباي