ديرەكتوردىڭ مۇعالىمدى جۇمىسقا الۋ قۇزىرەتى الىنىپ تاستالۋى مۇمكىن

تۇركىستان. قازاقپارات - تۇركىستان وبلىسىندا سىبايلاس جەمقورلىققا قارسى كۇرەس كۇشەيتىلەدى جانە اۋدان، قالا اكىمدەرى مەن باسقارما باسشىلارىنا قويىلاتىن جاۋاپكەرشىلىك جوعارىلايدى.

بۇل تۋرالى بۇگىن تۇركىستان وبلىسىندا سىبايلاس جەمقورلىقتىڭ الدىن الۋ جانە بولدىرماۋ تۋرالى ماجىلىسىندە وبلىس اكىمى جانسەيىت تۇيمەبايەۆ مالىمدەدى، دەپ حابارلايدى قازاقپارات ءتىلشىسى.

ءوڭىر باسشىسى پاراقورلىققا، زاڭسىزدىققا جول بەرگەن لاۋازىمدى تۇلعالارعا قاتاڭ شارا قولدانىلاتىنىن ايتىپ، قىزمەتكەرلەرىنە ەسكەرتۋ جاسادى. وبلىستىق ءبىلىم باسقارماسى باسشىسىنىڭ ورىنباسارى ا. سادىقوۆانىڭ ايتۋىنشا، وڭىردە كوررۋپتسيانىڭ الدىن الۋ ءۇشىن باسقارما تاراپىنان ءبىرقاتار قىزمەتتەردى سيفرلاندىرۋ شارالارى قولعا الىنعان.

ماسەلەن، مەكتەپكە دەيىنگى ءبىلىم بەرۋ ۇيالارىنا جولداما بەرۋ جانە كەزەككە قويۋ اۆتوماتتاندىرىلىپ، 12 مىڭنان استام بالا بالاباقشاعا ورنالاسقان. ياعني، ادامي فاكتور ازايىپ، وتىنىشتەر ەلەكتروندى تۇردە رەتتەلگەن. 902 ورتا مەكتەپ mektep.sitcen.kz جۇيەسىنە قوسىلىپ، وقۋشىلار وسى ارقىلى مەكتەپكە قابىلدانىپ جاتىر.

بۇگىندە 53031 وقۋشى ەلەكتروندى تۇردە 1-سىنىپقا قابىلدانعان. سونىمەن قاتار، 902 ءبىلىم ۇياسىندا jumys.sitсen.kz جۇيەسى ەنگىزىلىپ، 2718 ءوتىنىش كەلىپ تۇسكەن. جۇيە قىزمەتى ارقىلى 321 مۇعالىم جۇمىسقا قابىلداندى. قازىرگى تاڭدا جۇيەدە 652 بوس جۇمىس ورنى تۋرالى مالىمەت تۇر. ەندى ۇستازدارعا ديرەكتورعا نەمەسە باسقالارعا جولىقپاي جۇمىسقا ورنالاسۋ جۇرگىزىلۋدە. ال، تەحنيكالىق قىزمەتكەرلەردى جۇمىسقا قابىلداۋدى مەكتەپ ديرەكتورىنىڭ قۇزىرەتىنەن الىپ تاستاپ، اۋتسورسينگكە وتكىزۋ ۇسىنىسى قاراستىرىلىپ جاتىر.

جيىندا جەر قاتىناستارى، مەملەكەتتىك ساتىپ الۋ سالاسىنداعى زاڭبۇزۋشىلىقتار دا تالقىلانىپ، سىيبايلاس جەمقورلىققا قارسى كۇرەس جونىندەگى كوميسسيانىڭ جۇمىسىن كۇشەيتۋ كەرەكتىگى ايتىلدى.

وبلىس اكىمى ج. تۇيمەبايەۆ باسقارما باسشىلارىنىڭ ەسەبىن تىڭداپ، ەلگە شىنايى وتانشىلدىق سەزىممەن ادال قىزمەت ەتۋ كەرەكتىگىن ايتتى.

«سىبايلاس جەمقورلىق - قوعامنىڭ ىندەتى. سوندىقتان حالىق اراسىندا سىبايلاس جەمقورلىققا قارسى مادەنيەتتى قالىپتاستىرۋ جۇمىستارى قولعا الىنىپ، ءبىلىم بەرۋ ۇيىمدارىندا مادەني-اعارتۋشىلىق جۇمىستارى اتقارىلسىن. سىبايلاس جەمقورلىققا قارسى كوميسسياسى جانىنان ىشكى تالداۋ جۇمىستارىن جۇرگىزۋ ءۇشىن جۇمىسشى توبى قۇرىلۋى ءتيىس. مەملەكەتتىك مەكەمەلەر اشىق ءارى ەلگە جاقىن بولىپ، ساپالى قىزمەت كورسەتسىن. سىبايلاس جەمقورلىق فاكتىلەرى تىركەلگەن ءارى وسى ىندەتكە قارسى ءتيىستى دارەجەدە قاداعالاۋ جۇرگىزبەگەن لاۋازىمدى قىزمەتكەرلەردىڭ ماسەلەسى قاتاڭ قارالاتىن بولادى»، - دەدى جانسەيىت تۇيمەبايەۆ.

وبلىس اكىمى جيىندى قورتىندىلاپ، اۋدان، قالا اكىمدەرى مەن باسقارما باسشىلارىنا جەمقورلىققا قارسى كۇرەستى كۇشەيتۋ جونىندە تاپسىرما بەردى.