كاسىپكەر: اۋىلعا جول سالۋ - دامۋعا سەرپىن بەرەتىن جۇمىس

اقتوبە. قازاقپارات - اقتوبەدەگى كوپىرلەر مەن جولدار قۇرىلىسىن جۇرگىزىپ وتىرعان كاسىپكەر تولەگەن تاڭاتاروۆ جولداۋداعى اۋىل جولدارى قۇرىلىسىنىڭ ماڭىزدىلىعىن اتاپ ءوتتى، دەپ حابارلايدى قازاقپارات ءتىلشىسى.

بيىل اقتوبە وبلىسىندا 150 شاقىرىم جول جوندەلىپ جاتىر. قالا ىشىندەگى ەكى كوپىردى سالعان «Trans-MostGroup» قۇرىلىس ۇيىمىنىڭ باس ديرەكتورى تولەگەن تاڭاتاروۆ ەندى اۋىل جولدارى جوندەلسە، قاتىناس ارتىپ، ادامدار جول ازابىنان ارىلاتىنىن ايتىپ بەردى.

«رەسپۋبليكا كولەمىندە جولدار مەن كوپىرلەردى سالۋعا، سونىڭ ىشىندە ءبىزدىڭ وڭىردە دە ۇلكەن قاراجات بولىنەدى. قارجىلاي قولداۋدىڭ مول قورى مەملەكەت باسشىسىنىڭ اۋىلدار مەن اۋدان ورتالىقتارىن وبلىس ورتالىقتارىمەن بايلانىستىراتىن ساپالى جولداردىڭ قۇرىلىسى تۋرالى تاپسىرماسىن تولىق ورىنداۋعا مۇمكىندىك بەرەدى. بۇل شارا اۋىلدىڭ دامۋىنا كۇمانسىز سەرپىن بەرەدى»، - دەدى «Trans-MostGroup»  قۇرىلىس ۇيىمىنىڭ باس ديرەكتورى تولەگەن تاڭاتاروۆ.

 

ەلباسى ءوز جولداۋىندا اكىمدەرگە اۋىل، اۋدان اراسىنداعى قاتىناستى رەتكە كەلتىرۋدى تاپسىردى. ەندى قارجىلاندىرۋ كولەمى ارتىپ، جەرگىلىكتى ماڭىزى بار جولدارعا 150 ميلليارد تەڭگەگە دەيىن، ال اۋىلدىق جەرلەردى سۋمەن قامتۋعا 100 ميلليارد تەڭگەگە دەيىن قارجى بولىنەدى.

 ەسكە سالساق، بيىل اقتوبە- اتىراۋ جولى سالىنىپ جاتىر. قۇرىلىس جۇمىستارى كەزىندە جەرگىلىكتى ماتەريالدارى پايدالانىلادى.

بۇل اقتوبەنىڭ تەمىر، العا، مۇعالجار، بايعانين اۋداندارىنا اپاراتىن جولدى قالپىنا كەلتىرۋگە مۇمكىندىك بەرەتىن جوبا. سونىمەن قاتار، اقتوبە- ورسك تاسجولى سالىنىپ جاتىر. ءارى اۋىل ىشىندەگى جولدار قۇرىلىسى مەملەكەتتىك- جەكەمەنشىك سەرىكتەستىك اياسىندا جۇرگىزىلدى.