ادەل سيندرومى نەمەسە ەسسىز عاشىق بولۋ

 استانا. قازاقپارات - «ەسسىز عاشىق بولۋ» ءسوزىن پسيحياترلار جاي مەتافورا رەتىندە قابىلدامايدى.

سەبەبى ولار ەروتومانيامەن اۋىراتىن ادامدارمەن ءجيى جولىعادى. ەروتومانيا كەزىندە ەمدەلۋشى وزىنە بىرەۋ عاشىق ەكەندىگىنە سەنىمدى بولادى. سەنىم ەش نەگىزسىز بولا بەرەدى، سەبەبى سيمپاتيا وبەكتى ەمدەلۋشىنىڭ بارى تۋرالى بىلمەۋى دە مۇمكىن. كوبىنەسە، بۇل نىسانعا اتاقتى نەمەسە دارەجەسى جوعارى ادامدار تاپ بولادى.

ەروتومانيامەن اۋىراتىن ادام ونىڭ ءار قوزعالىسىنان وزىنە جولدانعان قۇپيا بەلگىلەر كورەدى. وتكەن عاسىردىڭ باسىندا اتاقتى فرانسۋز پسيحياترى گاەتان دە كلەرامبو العاش رەت ەروتومانيانىڭ كلينيكالىق جاعدايىن سۋرەتتەپ بەردى: ەگدە ايەل وزىنە اعىلشىن كارولى گەورگ V- شى عاشىق ەكەندىگىن ايتقان. وعان قوسا، 53 جاسار ايەل كارولدىڭ سەزىمى تۋرالى بارلىق انگليا بىلەتىندىگىنە سەنىمدى بولعان.

ايەل مونارحتى بۋكينگەم سارايىنىڭ قاسىنان اڭدىپ، ول كۇيمە پەردەسىن اشىپ-جاپقان سايىن ماحاببات جولداۋى رەتىندە قابىلداعان.

ادەل سيندرومى

اتاقتى جازۋشىنىڭ كىشى قىزى ادەل گيۋگو ادەمى ايەل جانە دارىندى پيانينوشى بولعان. وعان ءوز سەزىمىن ءبىلدىرىپ جۇرگەن جىگىتتەر كوپ بولسا دا، ول بارلىعىنا نەمقۇرايلىقپەن قاراپ ءجۇردى. ءبىر كۇنى ول البەرت پينسون اتتى جاس جىگىتتى كورەدى. ءبىر قاراعاندا ەشكىم تانىمايتىن اعىلشىن وفيتسەرىن كورگەندە ادەل گيۋگو ءوز تاعدىرىن كەزدەستىردىم دەپ ويلايدى. ول ونىڭ مىنەزى، ادەتى تۋرالى ەشتەڭە بىلمەسە دە، تاڭداعان جىگىتىنە بارلىق ءومىرىن ارنادى: ءوز ءۇيىن تاستادى، پينسوندى اۋىستىرعان قالالار مەن ەلدەرگە كوشىپ باردى، ونى كورۋدىڭ كەز كەلگەن امالىن ىزدەدى.

ادەلدىڭ عاشىق بولعانى سونشالىقتى، پينسوندى گاليفاكسكە (كانادا) قىزمەت ەتۋگە اۋىستىرعاندا، ادەل اتا-اناسىنا ايتپاي، ونىڭ ارتىنان كەتە باردى.

ال جولدى تولەۋ ءۇشىن اناسىنىڭ باعالى زاتتارىن ۇرلاپ كەتكەن. ادەل اينالاسىنداعىلارعا ەكەۋىنىڭ نەكەلەسكەندەرىن ايتىپ جۇرگەن. ادەل البەرتتىڭ جەك كورۋى مەن ەلەمەۋىن بايقامايتىن. ادەل ءوزىن سول وفيتسەردىڭ ايەلى سانايتىن الەمدە ءومىر ءسۇردى، ونىڭ قارىزدارىن تولەپ ءجۇردى جانە «كۇيەۋىنىڭ قىلىقتارىن» كوتەرۋ كەرەكپىن دەپ سانايتىن. وفيتسەر جەرگىلىكتى سوتتىڭ قىزىنا ۇيلەنگىسى كەلگەندە ادەل سوتقا البەرتتىڭ ايەلى ەكەندىگىن جازىپ، حات جولداعان.

1866 -جىلى پينسوندى باتىس ءۇندىستانداعى باربادوس ارالىنا اۋىستىرادى، ادەل دە ونىڭ ارتىنان بارادى. ادەلدىڭ ارالداعى ءومىرى تۋرالى اقپارات از. ول ءوزىن «پينسون حانىم» دەپ ايتۋىن سۇرايتىن بولعان. ونىڭ پسيحيكالىق جاعدايى ناشارلاي بەرگەن. 1872 -جىلى ادەلدى فرانسياعا الدىرتادى. بۇل قايعىلى وقيعا بولدى. اكەسىنەن باسقا بارلىق وتباسى مۇشەلەرى قايتىس بولعان. سول كەزدە ادەل تولىقتاي اقىلىنان اداسىپ، ءومىرىنىڭ سوڭعى جىلدارىن پسيحياتريالىق اۋرۋحانادا وتكىزدى.

ادەل 1915 -جىلى قايتىس بولدى. ادەلدىڭ جاۋاپسىز ماحابباتى تۋرالى وقيعا حالىق اراسىندا بەلگىلى بولىپ، ادەبي ورتادا كەڭ تارالعان «ادەل سيندرومى» تەرمينىنە يە بولدى. پسيحياتريا سالاسىنداعى ماماندار ايەلدىڭ اۋرۋىنا ۋاقىتىندا ءمان بەرىلگەندە، ونى ەمدەۋگە بولاتىندىعىن ايتادى. بۇل قايعىلى ماحابباتتىڭ وقيعاسى فرانسۋا تريۋففونىڭ «ادەلدىڭ وقيعاسى» (يستوريا ادەلي گ. ) اتتى فيلمىندە كورسەتىلگەن.

قازىر «ادەل سيندرومى» - ەروتومانيانىڭ ءبىر ءتۇرى، جەكە دياگنوز.

ەروتومانيا نەسىمەن قاۋىپتى؟

ەروتومانيامەن اۋىراتىن ادامنىڭ ارەكەتتەرى جازىقسىز جانە رومانتيكالىق بولىپ كورىنۋى مۇمكىن. ءبىراق بۇل اۋرۋ باسقا پسيحيكالىق اۋرۋلار سەكىلدى قاۋىپتى بولىپ كەلەدى. اۋرۋ ادام ءوز عاشىعىن ءاردايىم اڭديدى، جوسپار قۇرادى جانە جاقىنداسۋدىڭ جولدارىن ىزدەيدى. ول %100 ءوزارا سۇيىسپەنشىلىككە سەنىمدى بولعاندىقتان، ونى ەشقانداي باس تارتۋ توقتاتپايدى. ءتىپتى، ءسىز پوليتسياعا ارىز جازساڭىز دا، ءسىز ونى بىردەڭە ءۇشىن جازالاپ جاتىر دەپ قابىلدايدى. ەگەر نىسان ۇزاققا دەيىن جاۋاپ قايتارماسا، ءۇمىت فازاسى ىزالانۋ فازاسىنا اۋىسادى.

اۋرۋ قاۋىپتىرەك شارالارعا كىرىسەدى. ول دۇرىس ويلاۋدان قالادى: ول ونى ۇرلاپ كەتۋى نەمەسە ونىڭ سەرىگىن ۇرىپ كەتۋى مۇمكىن. كەيدە ءتىپتى باسقا ادامدارعا كەسىرى ءتيىپ كەتەدى. ەروتومانيا جەدەل پسيحوتەراپيالىق ەمدەۋدى قاجەت ەتەدى. پسيحياترلار ونى كۇيزەلىس، جۇيكە جۇيەسىنىڭ بۇزىلۋى، جابىسۋ سيندرومى، شيزوفرەنيا جانە پسيحوز سەكىلدى اۋرۋلارمەن بايلانىستىرادى. ەروتومانيامەن اۋىراتىن ادام ءوزىنىڭ سەنىمى وتىرىك ەكەندىگىن كورە المايتىندىقتان، ونى ەمدەۋ قيىنعا تۇسەدى.

Massaget.kz