USD 425.02 EUR 450.1
RUB 7.17 CNY 63.75
جاڭالىقتار

قازاقستاندا كاسىپقوي بوكس دامىماعان - گولوۆكين

5 قازان 20:56
:ءبولىسۋ
قازاقستاندا كاسىپقوي بوكس دامىماعان - گولوۆكين

استانا. قازاقپارات - قازاقستاندىق كاسىپقوي بوكسشى گەننادي گولوۆكين بۇگىن الماتىدا باسپا ءسوز جيىنىنا قاتىستى.

تەحنودوم ساۋدا جەلىسىمەن اراداعى سەرىكتەستىك جايلى ايتىپ، تىلشىلەر سۇراقتارىنا جاۋاپ بەردى. سونداي- اق الداعى جوسپارلارىمەن ءبولىستى. GGG مەن «تەحنودوم» سەرىكتەستىگىنىڭ سىرى نەدە؟

باسپا ءسوز جيىنى قوس تاراپتىڭ سەرىكتەستىك ورناتۋىنا باعىتتالدى. نەگىزىنەن بۇل سەرىكتەستىكتىڭ باستى ماقساتى - قازاقستاندىق جاس بوكسشىلاردىڭ الەمدىك ارەنادا تانىلۋىنا جاعداي جاساۋ. العاش بولىپ ءسوز العان «تەحنودوم» كومپانياسىنىڭ نەگىزىن قالاۋشى، ديرەكتورلار القاسىنىڭ ءتوراعاسى ەدۋارد كيم جوبانىڭ ارتىقشىلىقتارىن ايتا كەتتى.

- ءبىزدىڭ ۇسىنىسىمىزدى قابىل العان گەننادي گولوۆكينگە العىسىمىزدى بىلدىرەمىز. كومپانيا ءۇشىن ۇلكەن جەتىستىك، العا ورلەۋ. بىرىگە وتىرىپ ەلىمىزدە سپورتتىڭ دامۋىنا ۇلەس قوساتىن بولامىز. تالانتتى بوكسشىلاردى قولداۋ كەرەك، دەمەۋشى بولۋ كەرەك. جاتتىعۋ جاساۋىنا جاعداي جاسالۋى ءتيىس. ءبىراق كاسىپقوي بوكستى باستاعان سپورتشى ءۇشىن مۇنىڭ بارلىعى تابىلا قويۋى قيىن. سوندىقتان دا وسىنداي سەرىكتەستىك جوبانى قولعا الدىق. قازاقستاندىق تالانتتى بوكسشىلار GGG Promotions پروموۋتەرلىك كومپانياسىنا قوسىلۋىنا جول اشىلادى. قازاقستاندى الەمدىك ارەنادا تانىتۋىنا مۇمكىندىك تۋادى. ال ەكىنشى جاعىنان «تەحنودوم» ۇزاق ۋاقىت قارجىلىق جاعدايىن رەتتەپ وتىراتىن بولادى. ءبىز جاس سپورتشىلارعا تىنباي توككەن تەر مەن جاساعان ەڭبەكتىڭ جەمىسى بولارىن دالەلدەگىمىز كەلەدى. ونىڭ جارقىن ءبىر مىسالى، ءوزىمىزدىڭ گەننادي گولوۆكين.

الەمدى مويىنداتقان قازاقستاننىڭ حالىق باتىرى. وتانىن، تۋعان جەرىن ءبار ءسات تە ۇمىتقان ەمەس. ءوزى سەكىلدى جاس بوكسشىلاردىڭ دا ەلىمىزدى الەمگە تانىتقانىن قالايتىن جان، - دەدى ەدۋارد كيم.

ءوز كەزەگىندە گەننادي گولوۆكين دە بۇل جوبا الداعى باستى جوسپارى ەكەنىن ايتا كەتتى.

- ءبىز جاس سپورتشىلاردىڭ كاسىپقوي بوكستا ءوز ورىندارىن تاپقانىن قالايمىز. بوكسشىنىڭ جەتىستىگى جاتتىعۋى مەن كۇشىنە عانا بايلانىستى ەمەس، ونى ۇيىمداستىرا دا ءبىلۋ كەرەك. مەن ءوزىم مۇنىڭ قانشالىقتى ماڭىزدى ەكەنىن جاقسى بىلەمىن. جاس بوكسشىلاردىڭ اياقتان تۇرۋىنا كومەك قولىن سوزعالى تۇرعان تەحنودوم كومپانياسىنا العىسىمدى بىلدىرەمىن. جوسپار كوپ. جۇدىرىقتاسۋعا بولاتىن قارسىلاستارىم دا كوپ. ولاردى قاراستىراتىن بولامىز. كەلەسى قارسىلاس كىم بولاتىنىن، جەكپە-جەك قاشان جانە قايدا وتەتىنىن الداعى ۋاقىتتا ايتامىز.

بىرىنشىدەن بۇگىن ءبىز سەرىكتەستىك جوبانى قولعا الدىق. كومەك پەن قولداۋ بىلدىرەمىز. وسى ءبىزدىڭ ەڭ ءبىرىنشى جوسپار، - دەدى بوكسشى.

قازاقستانداعى كاسىپقوي بوكستىڭ جاي-كۇيى

قازىرگى تاڭدا كاسىپقوي بوكسقا بەت بۇرىپ، مۇحيت اسىپ، قۇرلىق باسىپ ەل نامىسىن قورعاپ جۇرگەن بوكسشىلار سانى ارتىپ كەلەدى. گەنا دا ا ق ش-تا پروموۋتەرلىك كومپانيا اشقان. اراسىندا قازاقستاندىق بوكسشىلار دا بار. باسپا ءسوز جيىنى كەزىندە GGG بۇل جايىندا دا ايتا كەتتى.

- مەنىڭ ا ق ش-تا تىركەلگەن پروموۋتەرلىك كومپانيام بار. ەلىمىزدەن الي احمەدوۆ پەن رۋسلان ماديەۆ سوندا جاتتىعۋدا. ەكەۋى دە تالانتتى بوكسشىلار. بولاشاقتا چەمپيون اتانعىلارى كەلەدى. سول جولدا ەڭبەكتەنىپ كەلەدى. العا قويعان ماقساتتارى بار. ابەل سانچەس ولارمەن بىرگە جۇمىس جاساۋدا، جاتتىقتىرۋدا، - دەدى گەنا.

GGG پروموۋتەرلىك كومپانياسىنا بوكسشىلار قالاي ىرىكتەلەدى؟

قازاقستاندىق كاسىپقوي بوكسشى پروموۋتەرلىك كومپانياسىنا بوكسشىلار قالاي ىرىكتەلەتىنى جايلى دا تىلگە تيەك ەتتى. ول ءۇشىن بوكسشىلاردىڭ تاجىريبەسى مەن يكەمى باستى نازاردا بولادى ەكەن. - جارتى جىل نەمەسە ءبىر جىل عانا جۇدىرىقتاسقان بوكسشىلار مەنىڭ كوماندامدا بولادى دەپ ايتا المايمىن. تاجىريبەسى بولۋ كەرەك. ويتكەنى مەن ولاردىڭ دەنساۋلىعىنا جاۋاپ بەرەمىن. ماقساتتارىنا جەتۋ ءۇشىن سەنىمدى جوسپارلارى دا بولۋ كەرەك. ءبىز تاڭدايتىن بوكسشىلار مەنىمەن بىرگە جاتتىعادى. بار بىلگەنىمدى ۇيرەتكىم كەلەدى. سوندىقتان دا پروموۋتەرلىك كومپانيام ا ق ش-تا. سەبەبى ءبىر زالدا جاتتىققانىمىز اسا پايدالى. انىعىن ايتساق، قازاقستاندا كاسىپقوي بوكس دامىماعان. جەتىستىك شىڭىن باعىندىرۋ ءۇشىن سول سالاعا جاقىن ءجۇرۋ كەرەك. چەمپيوندارمەن بىرگە جاتتىعۋ كەرەك. سپاررينگ وتكىزۋ كەرەك. ال قازاقستاندا مۇنداي جاعداي جاسالماعان، - دەدى گولوۆكين.

گولوۆكين مانسابىن قاشان اياقتايدى؟

گەننادي گولوۆكين وسى جىلى 36 جاسقا تولدى. قازىرگى تاڭدا كاسىپقوي بوكستاعى مانسابىن اياقتاعانى دۇرىس دەپ سانايتىندار قاتارى دا ارتا باستادى. ال بوكسشىنىڭ ءوزى نە دەيدى؟ - بۇل سۇراققا جاۋاپ بەرۋ قيىن. وسى جاسقا دەيىن عانا جۇدىرىقتاسۋعا بولادى دەگەن شەكتەۋ جوق. بوكس - ەڭ قيىن سپورت تۇرلەرىنىڭ ءبىرى. ءبىر سوققىنىڭ ءوزى بۇكىل جوسپارىڭدى كۇل-تالقان ەتۋى مۇمكىن. مۇمكىندىك بولسا، ىقىلاس بولسا جۇدىرىقتاسۋدى جالعاستىرا بەرەمىن، - دەدى GGG.

قازاقستاندىقتارعا العىسى شەكسىز

باسپا ءسوز جيىنى سوڭىنان قازاقستاندىق كاسىپقوي بوكسشى بارشا قازاقستاندىقتارعا العىس ءبىلدىردى. جەكسەنبىنىڭ تاڭىندا ەرتە تۇرىپ قولداۋ بىلدىرەتىندەرى ءۇشىن راقمەتىن جەتكىزدى. - سىزدەردى ءوز جەرىمدە كورىپ وتىرعانىما وتە قۋانىشتىمىن. مەنى قولداعان بارشا قازاقستاندىقتارعا العىسىمدى بىلدىرەمىن. جەكسەنبىنىڭ تاڭىندا ەرتە تۇرىپ جەكپە-جەگىمدى كورىپ، قولداۋ بىلدىرەتىندەرىڭىزگە راقمەت ايتامىن، - دەدى بوكسشى.

Massaget.kz


:ءبولىسۋ

اأتور:

novasa

سونداي-اق... وقىڭىز
پئكئر قالدئرؤ
+7
جئبةرؤ

مۇراعات