قازاقستاندا ەڭ تومەنگى جالاقى كوتەرىلسە، كىمنىڭ ايلىعى وزگەرەدى
ەندى، ەڭ تومەنگى جالاقى كۇنكورىس شەگىنە بايلانىستى بولمايدى، دەپ حابارلايدى قازاقپارات ءتىلشىسى.
ەكونوميست ساراباي جۇبايەۆتىڭ ايتۋىنشا، بۇگىندە بارلىق كورسەتكىشتەر ەڭ تومەنگى كۇنكورىس شەگىنە بايلانىستى. سونىڭ ىشىندە ەڭ تومەنگى جالاقى دا بار.
«كۇنكورىس شەگىنە قاراي مۇعالىمدەردىڭ ايلىعى، دارىگەرلەردىڭ جالاقىسى انىقتالادى. ەندى، پرەزيدەنت ەڭ تومەنگى جالاقى كۇنكورىس دەڭگەيىنە بايلانىستى بولمايدى دەدى. وعان قوسا، ەڭ تومەنگى جالاقىنىڭ كولەمى 1,5 ەسەگە - 28 مىڭنان 42 مىڭعا وسەتىن بولدى. دەمەك، بارلىق كورسەتكىشتەر وزگەرەدى. مۇعالىمدەردىڭ ايلىعى دا، دارىگەرلەر مەن اكىمدەردىڭ جالاقىسى دا كوتەرىلەدى. بۇل باستامانىڭ نەگىزگى ناتيجەسى وسى»، - دەدى س. جۇبايەۆ قازاقپارات تىلشىسىنە بەرگەن سۇحباتىندا.
ساراپشىنىڭ سوزىنە قاراعاندا، كۆازيمەملەكەتتىك سالا قىزمەتكەرلەرىنىڭ جالاقىسىن دا كوتەرۋگە تۋرا كەلەدى. سەبەبى ولاردىڭ ايلىعى دا ەڭ تومەنگى جالاقىعا بايلانىستى.
«كوممەرتسيالىق كاسىپورىندار عانا وزدەرى شەشەدى. سەبەبى ولار بيۋدجەتكە قاراپ وتىرعان جوق جانە جالاقىنى وزدەرى بەلگىلەيدى. ال مەملەكەتتىك جانە بيۋدجەتتىك سالا قىزمەتكەرلەرىنىڭ ايلىعى ەڭ تومەنگى جالاقىعا تىكەلەي بايلانىستى»، - دەپ اتاپ كورسەتتى س. جۇبايەۆ.
ايتا كەتەيىك، بۇگىن مەملەكەت باسشىسى 2019 -جىلدىڭ 1 -قاڭتارىنان باستاپ ەڭ تومەنگى جالاقىنى 1,5 ەسەگە، ياعني 28 مىڭنان 42 مىڭعا دەيىن ءوسىرۋدى تاپسىردى. بۇل بارلىق سالا بويىنشا ءتۇرلى مەنشىك نىساندارىنداعى كاسىپورىنداردا جۇمىس ىستەيتىن 1 ميلليون 300 مىڭ ادامنىڭ ەڭبەكاقىسىن تىكەلەي قامتيدى. بيۋدجەتتىك مەكەمەلەردە جۇمىس ىستەيتىن 275 مىڭ قىزمەتكەردىڭ ەڭبەكاقىسى كوبەيىپ، ورتا ەسەپپەن 35 پايىزعا وسەدى. وسى ماقساتتارعا 2019-2021 -جىلداردا رەسپۋبليكالىق بيۋدجەتتەن جىل سايىن 96 ميلليارد تەڭگە ءبولۋ كەرەك.
پرەزيدەنتتىڭ ايتۋىنشا، ەندى، ەڭ تومەنگى جالاقى ەڭ تومەنگى كۇنكورىس شەگىنە بايلانىستى بولمايدى. ەڭ تومەنگى جالاقىنىڭ جاڭا مولشەرى بۇكىل ەكونوميكا اۋقىمىنداعى ەڭبەكاقى ءوسىمىنىڭ كاتاليزاتورىنا اينالادى.
«تومەن جالاقى الاتىن قىزمەتكەرلەردىڭ ەڭبەكاقىسىن كوتەرۋگە قاتىستى بۇل باستامانى ءىرى كومپانيالار دا قولدايدى دەپ سەنەمىن»، - دەدى ن. نازاربايەۆ.