كوپ قاباتتى ۇيدەگى ءورت: ادامداردى امان الىپ شىققان اقتوبەلىكتەر ماراپاتتالدى

اقتوبە. قازاقپارات - اقتوبەدەگى كوپ قاباتتى ۇيدەن شىققان ءورت كەزىندە تۇرعىندارعا كومەكتەسكەن جاستار مەن ارنايى قىزمەت وكىلدەرى ماراپاتتالدى، دەپ حابارلايدى قازاقپارات ءتىلشىسى.

اقتوبە قالاسىنىڭ اكىمدىگى بۇگىن ءورت كەزىندە تۇرعىنداردى سىرتقا الىپ شىققان ەرىكتىلەر مەن پوليتسيا، توتەنشە جاعدايلار قىزمەتكەرلەرىن ماراپاتتادى. ولاردىڭ قاتارىندا اقتوبە پوليتەحنيكالىق كوللەدجىنىڭ ەكى ستۋدەنتى بار. 18 جاستاعى الەكساندر تيموشەنكو مەن 19 جاستاعى ۆلاديمير كالمىكوۆ ءورت سوندىرۋشىلەر كەلگەنشە ادامداردى سىرتقا شىعاردى.

 

   

«بىزدە ويلانىپ تۇراتىن ۋاقىت بولعان جوق. پودەزدگە كىرىپ، ءار پاتەردىڭ ەسىگىن قاقتىق. اتا-انالار بالالارىن قولىنا ۇستاپ، جۇگىردى. ال قاريالاردى دەمەپ، قولىنان ۇستادىق. ءتۇتىن قاتتى بولدى، اياق استى كورىنبەدى. كەيىن ۇستىمىزدەگى كيىمدى شەشىپ، سۋلاپ، باسىمىزعا كيىپ كىرۋگە تۋرا كەلدى. ال ءورت سوندىرۋشىلەر كەلگەندە كاسىبي ماماندارعا تاپسىرۋىمىزدى سۇرادى»، - دەدى الەكساندر تيموشەنكو. اكىمدىك ەكى ستۋدەنتكە العىس حات پەن 100 مىڭ تەڭگەنىڭ سەرتيفيكاتىن ۇسىندى.

دەمالىستا جۇرگەن ءورت سوندىرۋشىلەر دە ءوز مىندەتىن بۇلجىتپاي ورىندادى.

«ءوزىم سول ءۇيدىڭ ماڭىندا قوناقتا وتىردىم. ۇيدەن شىققان كەزدە اۋلا ىشىندەگى ءتۇتىندى كوردىك. جۇگىرىپ بارىپ، ادامداردى شىعارا باستادىق. ول كەزدە ءورت ءسوندىرۋ قىزمەتى كەلمەدى. تەحنيكا جەتكەن كەزدە ولارعا باعىت بەرىپ، جول سىلتەدىك. ءارى قاراي ارىپتەستەرىمىز ءوز جۇمىسىن اتقاردى»، - دەدى ءورت ءسوندىرۋ قىزمەتى ءبولىمىنىڭ اعا ينجەنەرى ءادىل مۋفتاكوۆ.

سونىمەن قاتار ونىڭ جانىندا ءورت ءسوندىرۋشى قۋانتاي بايمۋرزين بولعان. بۇگىن اكىمدىكتە ءورت سوندىرۋشىلەر نۇربولات سۇيەۋوۆ، قانات جاۋتىكوۆ، ەركىن وتاربايەۆ تا ماراپاتتالدى. جەرگىلىكتى پوليتسيا قىزمەتكەرلەرى قاتارىندا المات سارين، مەدەت قويتانوۆ، ۋچاسكەلىك ينسپەكتور ارمان كۋشنيازوۆ بار.

«ءابىلقايىر حان داڭعىلىنداعى كوپ قاباتتى ۇيدە 69-پاتەر جاندى. جالىن كوپ قاباتتى ءۇيدىڭ بالكوندارىنا اۋىستى. ءورت كەزىندە 30 پاتەر زاقىمدالدى. ال بىرەۋى تولىعىمەن جانىپ كەتتى. بارلىعى 47 ادام قۇتقارىلىپ، 200 ادام قاۋىپسىز جەرگە شىعارىلدى. قايعىلى وقيعا تىركەلمەدى. ءورتتىڭ جالپى اۋماعى 200 ش. م. قۇراپ وتىر. ءى ءى ب- نىڭ سازدى پوليتسيا ءبولىمى تەرگەۋدى باستادى»، - دەدى قالالىق ت ج ب باستىعى ايبات جاڭابەرگەنوۆ.

تۇرعىن ءۇي-كوممۋنالدىق شارۋاشىلىق مەكەمەسى ءتۇنى بويى جۇمىس ىستەپ، قارا كۇيە بولعان ءۇيدىڭ قاسبەتىن سىرلاپ قويدى. پاتەرى ورتكە ورانىپ، زاقىمدانعان تۇرعىنداردىڭ ەشقايسىسى اكىمدىكتەن جاتىن ورىن سۇراپ كەلمەگەن.

ەسكە سالا كەتەيىك، كەشە اقتوبەدەگى 9 قاباتتى ءۇي ورتەنىپ، 200 ادام قاۋىپسىز جەرگە كوشىرىلگەن بولاتىن. سونداي-اق، وقيعاعا بايلانىستى ارنايى كوميسسيا قۇرىلدى.