شىمكەنتتە وتانداسىن ولتىرگەن قىتاي ازاماتى سوتتالدى
سوتتالۋشى تۇركىستان وبلىسى كاسىپورىندارىنىڭ بىرىندە كەلىسىم شارت نەگىزىندە ەڭبەك ەتكەن. مۇندا قىتاي جۇمىسشىلارىنان قۇرىلعان ارنايى بريگادا جۇمىس ىستەگەنى انىقتالدى. سى جيجەن سول جۇمىسشى توبىن باسقارىپ، اي سايىن قاراماعىنداعىلارعا ايلىقتارىنان الدىن الا تولەپ، ياعني اۆانس بەرىپ وتىرعان.
جۇمىسشىلاردىڭ ءبىرى سوتتالۋشىعا ەشقانداي اقشا الماعانىن ايتىپ، نارازىلىعىن بىلدىرگەن. ءوزارا كەلىسپەۋشىلىكتىڭ ناتيجەسىندە، اسحانادا ەكەۋىنىڭ اراسىندا ۇرىس كەرىس باستالىپ، سوڭى توبەلەسكە ۇلاسقان.
نارازى وتانداسى جيجەندى ءبىر ۇرىپ، جەرگە سۇلاتىپ تۇسىرگەن. سوندا ايىپتالۋشى قولىنا اسحانا پىشاعىن الىپ، جابىرلەنۋشىنىڭ اياعىنان بىرنەشە رەت جانە كەۋدە تۇسىنا سۇعىپ الدى.
پىشاق سوققىلارىنىڭ ءبىرى ءدال جۇرەگىنە ءتيىپ، قىتاي جۇمىسشىسى تىلگە كەلمەي كوز جۇمعان.
بۇل تۋرالى شىمكەنت قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى ءابينۇر قارابايەۆ مالىمدەدى.
سۋديانىڭ ايتۋىنشا، سوتتالۋشى قىتاي ازاماتى كىناسىن تولىق مويىنداعان. ايتا كەتەيىك، سوت ۇكىمى ءالى زاڭدى كۇشىنە ەنگەن جوق