پرەزيدەنت جوعارعى سوت تۋرالى: باياعى سۋديالار ءالى وتىر

استانا. قازاقپارات - مەملەكەت باسشىسى نۇرسۇلتان نازاربايەۆ قۇقىق سوت جۇيەسىن ساپالى تۇردە جاڭارتۋدى تاپسىردى، دەپ حابارلايدى قازاقپارات ءتىلشىسى.

«سوت جۇيەسىندەگى مامانداردى ساپالى تۇردە جاڭارتۋ قاجەت. وسىنى ىلعي ايتامىز. سۋديا قىزمەتىنە مىقتى زاڭگەرلەر كەلۋگە تىرىسۋى قاجەت. ءبىراق ونداي ءۇردىس بايقالمايدى. تاۋەلسىزدىگىمىزگە 27 جىل بولدى. باياعى سۋديالار وتىر. مەن ولاردى جامان دەپ ايتا المايمىن. ءبىراق وزدەرىنە جۇكتەلگەن ماسەلەلەردى شەشە الماي جاتىر»، - دەدى ن. نازاربايەۆ جولداۋدى جاريالاۋ بارىسىندا.

ەلباسىنىڭ ايتۋىنشا، حالىق ءالى كۇنگە دەيىن پرەزيدەنتكە حات جازىپ، ءوز ماسەلەلەرىن شەشۋدى سۇرايدى. دەمەك، ولاردىڭ پروبلەماسى سوتتا شەشىلمەيدى.

 ق ر جوعارعى سوتىنىڭ ءتوراعاسى جاقىپ اسانوۆتىڭ ايتۋىنشا، بۇگىندە سۋديا قىزمەتىنە قۇجات تاپسىرىپ جاتقان زاڭگەرلەردىڭ سانى كوبەيىپ كەلەدى. الايدا زاڭگەرلەردىڭ دەڭگەيى تومەن. «ماسەلەن، ەكى كونكۋرس ءوتتى. سوندا 140 ادامنان 5-اق ادام سۋديا قىزمەتىنە ۇسىنىلدى»، - دەدى ج. اسانوۆ.

مەملەكەت باسشىسى جوعارعى سوت كەڭەسىنە دە ەسكەرتۋ جاسادى. «تالعات (دوناقوۆ - كەڭەس باسشىسى)، مەن سەنى ول جەرگە نە ءۇشىن قويدىم. سۋديانىڭ «ستاۆكاسىن» ءبىلۋ ءۇشىن ەمەس. اۋداندا ءبىر «تاكسا»، وبلىستىق سوتتا ءبىر «تاكسا». جوعارعى سوت كەڭەسى مىقتى مامانداردى ىرىكتەۋى ءتيىس. مەن تاعى ايتامىن، ءبىر جەردەگى ماسەلە شەشىلمەي جاتسا، باسشىنى اۋىستىرۋ قاجەت. تەمىردەي ءتارتىپ بولۋى شارت. اشىعىن ايتايىن، جاڭادان قويعان ادامداردى بىردەن اۋىستىرعىم كەلمەيدى. ءبىراق قاجەت بولسا، سولاي ىستەۋگە تۋرا كەلەدى»، - دەپ اتاپ كورسەتتى ن. نازاربايەۆ.

پرەزيدەنتتىڭ ايتۋىنشا، سوڭعى جىلدارى ءبىراز شارالار اتقارىلدى. الايدا باستى تالاپ - حالىقتىڭ سوتتارعا دەگەن سەنىمىنە جەتە الماي جاتىرمىز. زاڭ ۇستەمدىگى بولماسا، قازىرگى رەفورمالاردى ىسكە اسىرۋ مۇمكىن ەمەس. وسى ورايدا مەملەكەت باسشىسى زاماناۋي تەحنولوگيالاردى كەڭىنەن قولدانۋدى تاپسىردى. «بىزدە جىل سايىن 4 ميلليون ادام سوت داۋلارىنا قاتىسادى. وعان قانشاما كۇش- جىگەر مەن اقشا جۇمسالادى. سوندىقتان ارتىق پروتسەدۋرالاردى قىسقارتۋ قاجەت. ايتپەسە، وعان ۋاقىت تا، اقشا دا كوپ كەتەدى. ماسەلەن، بۇرىن سوتقا كەلۋگە مىندەتتەدى. قازىر ۇيدە وتىرىپ، عالامتور ارقىلى سوت وتىرىسىنا قاتىسۋعا بولادى»، - دەدى ن. نازاربايەۆ.

 ايتا كەتەيىك، الداعى ۋاقىتتا پوليتسەيلەردىڭ جالاقىسى كوتەرىلەدى. بۇدان بولەك، قۇقىق قورعاۋشىلاردى دايارلاۋ 5 جىلدان 6 ايعا قىسقارۋى مۇمكىن.

اۆتور: ارمان اسقاروۆ