مۇحتار اۋەزوۆتىڭ قاسقابۇلاقتا سويلەگەن ءسوزى

None
None
 استانا. قازاقپارات - ابايدىڭ «جيدەباي- ءبورىلى» مەملەكەتتىك قورىق- مۋزەيىنىڭ عىلىمي قورىندا مۇحتار اۋەزوۆتىڭ قاسقابۇلاقتا سويلەگەن ءسوزىنىڭ اۋديوجازباسى ساقتاۋلعان. نازارلارىڭىزعا وسى جازبانى ۇسىنامىز.

 قادىرلى جولداستار! وسى ارادا، وسى تۇرعان جيىندارىڭىزبەن كوڭىل تولقىتقانداي سونشالىق زور، ادامعا اسەر ەتكەندەي دوستىق، تۋىسقاندىق نيەت كورسەتىپ تۇرسىزدار. بۇل زور سىيلارىڭىزعا، وسى كورسەتكەن پەيىلدەرىڭىزگە، جاڭاعى ايتقان، مەنىڭ الدىمدا سويلەگەن جولداستاردىڭ اۋزىنان شىققان نەشە ءتۇرلى دوستىق تا، تۋىسقاندىق تا سەنىم، ءسۇيىنىش سوزدەردىڭ بارلىعىنا مەن سونشالىق ريزامىن دا، قۋانامىن دا جانە بارىنشا العىس ايتامىن. مەنىڭ العاشقى ايتايىن دەگەن ءسوزىم وسى. كوڭىل، جۇرەك، كەۋدە العىسقا تولى. وسى كورسەتكەن پەيىلدەرىڭە، ۇلكەن اعا، كىشى ءىنى، اتادان شوبەرەگە دەيىن، انادان كىشكەنتاي نەمەرە- شوبەرە قىزدارىنا دەيىن - بارلەرىڭىز دە جيىلىپ كەلىپ تۇرسىزدار.

مەنىڭ تۋعان ورتام، تۋىپ وسكەن ەلىم، دوسىم - سىزدەرسىزدەر. سىزدەردىڭ ورتالارىڭا كەلۋ - مەنىڭ 60 جاسقا جاسىم كەلگەنمەن مەنى قايتا تۋدىرعانداي، قايتا جاسارتقانداي بولىپ تۇر. (قول شاپالاقتاۋ) . ورتالارىڭا كەلۋ، جۇزدەرىڭدى كورۋ، وسىنداي جاقسى پەيىلمەن قارسى الۋلارىڭىزدى تانۋ، ءبىلۋ دەگەننىڭ بارلىعى - ول زور سىيلىق. ءار جاقتا تالاي- تالاي جەرلەردە، تالاي- تالاي جىلدار كەلمەي جۇرسەم دە مەنىڭ كوڭىلىم وسى جەرلەرمەن، وسى ەلمەن بايلانىستى. ويتكەنى: وتان دەگەندە، ەل دەگەندە، ءبىز وسىنداي تۋعان جەردى، وسىنداي ەلدى ايتامىز. سول ەل - سىزدەرسىزدەر. كورىپ تۇرسىزدار، مەنىڭ دە كوڭىلىم تولقىپ تۇر، سىزدەرگە كەزدەسكەنگە، ايىپ ەتپەڭىزدەر! بۇل سىيلارىڭىز جالعىز ماعان عانا جاسالعان سىي ەمەس، وسى كۇنگى قازاق سوۆەت ادەبيەتىنىڭ ءوسىپ كەلە جاتقان جولىنا، جەتكەن تابىستارىنا، سوعان ارنالعان سىي- قۇرمەت. ءبىر جاعىنان سول سىزدەردىڭ كوڭىل- پەيىلدەرىڭىز وزدەرىڭىزدىڭ عانا كوڭىل- پەيىلدەرىڭىز ەمەس، ءبۇتىن اباي اۋدانىنىڭ، قالا بەرسە ءبۇتىن سەمەي وبلىسىنىڭ، قالا بەرسە، قازاقستان، ءبۇتىن سوۆەت حالقىنىڭ وسى كۇندەردە مەنىڭ از عانا ەڭبەگىمە، مەنىڭ كەشەگى وتكەن ەڭبەك جولىما جاساپ وتىرعان انالىق، اتالىق، دوستىق قۇرمەتىنىڭ ايعاعى، سونىڭ بەلگىسى. سىزدەر ايتىپ وتىرعان ءسوز، سىزدەر جاساپ وتىرعان سىي- قۇرمەت - بۇل ءبۇتىن سىزدەردىڭ ارقاڭىزدا، بۇل ارادا وزدەرى بولماسا دا، جاساپ وتىرعان كوپ حالقىمىزدىڭ، سوۆەت حالقىنىڭ، وتانىمىزدىڭ قۇرمەتى دەپ بىلەمىن مەن. سول ءۇشىن دە جۇرەك، كوڭىل العىسقا تولى.

ال بۇل قۇرمەتتى بۇل كۇنگە دەيىن ىستەلگەن ىسىممەن مەن تولىق اقتادىم دەپ ويلامايمىن، ەسەپتەمەيمىن. بۇدان بىلاي دا، ەندىگى قالعان ومىردە، قولدان كەلگەن كۇش- قۋاتتىڭ بارلىعىن جۇمساپ، بۇدان بىلاي دا سىزدەردىڭ كوڭىلدەرىڭىزدە وسىنداي ماعان، مەنىڭ ەڭبەگىمە جاقسى پەيىلمەن قاراپ، جاقسى باعالايتىن، العىس ايتارلىق تۋىسقاندىق، اتالىق، انالىق، باۋىرلىق كوپ سەزىمدەر وزگەرمەسىن دەپ، سول سەزىمدەر، مۇمكىن بولسا، وسە بەرسىن دەپ، سول وسە بەرۋىنە لايىقتى ەڭبەك بەرسەم دەپ، مەن سونى ارمان ەتەمىن. سول ەڭبەكتى مىناۋ وتىرعان كىشكەنتاي بالالار، ەرتەڭ مەكتەپكە بارعاندا، بۇگىنگى مەكتەپتەگى بالالار بۇل اراداعى مەكتەپتەرىن ءبىتىرىپ، جاڭاعى جوعارعى داراجەلى مەكتەپتەرگە بارعاندا، سونان سوڭ كەيىنگى وسى تۇرعان جاس كەلىندەر، قارىنداستار، وسىلاردان تۋعان بالا ۇرپاق - ءبارى دە ءبىزدىڭ وسىنداي ەڭبەكتەرىمىزدىڭ ماڭىندا تۋىپ جاتقان حالىقتىڭ وسى بۇگىنگى سىزدەر كورسەتىپ وتىرعان سىي- قۇرمەتىن ولار دا ەسكە ۇستايتىنداي، جادىندا ساقتايتىنداي بولسا ەكەن دەگەن ارمان بولادى مەنىڭ دە كوڭىلىمدە.

ءبىر ەمەس، تالاي رەت ءالى دە ورالىپ، ءتىرى بولساق، كەلەمىز دەپ ويلايمىن. ءاربىر كەلگەن سايىن ەلدىڭ، ولكەنىڭ كوركەيىپ كەلە جاتقانىن ەستىگەندە، بىلگەندە مەنىڭ دە كوڭىلىم شات. سىزدەر مەنىڭ تابىسىمدى قۋانىش ەتىپ قۇتتىقتاساڭىزدار، مەن سىزدەردىڭ تابىستارىڭىزدى، سىزدەردىڭ جەتكەندەرىڭىزدى، بۇگىنگى بۋىننىڭ، بۇگىنگى ءناسىلدىڭ، سوۆەت ەلىنىڭ، وسى اباي اۋدانىنداعى، كولحوزداعى سوۆەت ەلىنىڭ بۇگىنگى ناسىلدەرىنىڭ قولى ونەرگە، بىلىمگە جەتىپ وتىرعانىنا مەن دە سونداي قۋانىش ەتەمىن. ءسىز بەنەن ءبىز - ءبىر جانبىز، ءبىر ءتانبىز.. .

adebiportal.kz

سوڭعى جاڭالىقتار