پرەزيدەنت اۋىلدان كوشكەندەردى ءىرى قالالارعا قالاي ورنالاستىرۋ كەرەكتىگىن ايتىپ بەردى

استانا. قازاقپارات - ۇكىمەتكە ءىرى قالالارعا قونىستانىپ جاتقاندارعا كوپقاباتتى ۇيلەردى تۇرعىزۋدى نەگىزگە الۋ كەرەك. قازاقستان حالقىنا جولداۋىندا مەملەكەت باسشىسى نۇرسۇلتان نازاربايەۆ وسىلاي ايتتى، دەپ حابارلايدى قازاقپارات ءتىلشىسى.

پرەزيدەنت ءوز جولداۋىندا حالىقتىڭ كوبى ەندىگى كەزەكتە ءىرى قالالارعا تارتىلاتىنىن اتاپ ءوتتى. ەلباسىنىڭ ايتۋىنشا، الەمدىك ج ءى ءو- ءنىڭ 70 پايىزى ءىرى مەگاپوليستەرگە تيەسىلى.

«18 ميلليون حالقى بار ەلىمىزدە ميلليون حالقى بار ءۇش قالا پايدا بولدى. ولاردىڭ ەكەۋى ءبىزدىڭ تاۋەلسىزدىك جىلدارىندا پايدا بولدى. بۇل ۇلكەن جەتىستىك. ۋربانيزاتسيانىڭ ىنتاسىن ەشكىم توقتاتا المايدى. مىنە، سوندىقتان بۇل ماسەلەنى قالاي رەتكە كەلتىرۋ كەرەكتىگىن ويلاۋ كەرەك. ماعان قالا ىشىندەگى جەرلەردى بەرىپ، سول جەرگە قۇرىلىس جۇرگىزۋدى ۇسىنادى. ال قالالاردىڭ ىشىندە بوس جەر جوق. بۇل بولەك سۇراق. كەزىندە بيلىگى بار ادامدار الىپ- الىپ العان دا، ءوزىنىڭ دە، وزگەنىڭ دە پايداسىنا جاراتا الماي وتىر»، - دەدى پرەزيدەنت.

مەملەكەت باسشىسى قالا ىشىندەگى پايدالانىلماعان جەرلەردى قايتارۋ ءۇشىن پروكۋراتۋراعا تاپسىرما بەرگەنىن ايتتى.

 «كەڭەس كەزىنەن بىزگە مونوقالالار قالدى. ءبارى دە كىشى قالالار. قازىر كىشى قالالار مەن كەنتتەرگە ۇلكەن اۋقىمدى قاراجات جۇمساۋ ءتيىمسىز. بىزگە نە ىستەۋ كەرەك؟ استانا مەن الماتى سەكىلدى قالالار قازىردىڭ وزىندە ج ءى ءو - ءنىڭ 30 پايىزىن بەرىپ وتىر. وسى ەكى قالادا ءبىلىم دە، عىلىم دا، ۇزدىك ماماندار دا بار. سوندىقتان، ۇكىمەتكە ءىرى قالالارعا قونىستانىپ جاتقاندارعا كوپقاباتتى ۇيلەردى تۇرعىزۋدى نەگىزگە الۋ كەرەك. ولاردى ءبىز بەلگىلى ءبىر شارتتار بويىنشا سول جەرگە قابىلدايمىز. بولماسا وتباسىلىق جاتاقحانا سالۋعا بولادى. اۋىلدان حالىقتىڭ كوشۋىن قولداپ وتىرعانىم جوق. ءبىراق، ول جەردە ەشكىمدى ۇستاپ تا تۇرا المايدى»، - دەدى پرەزيدەنت.

اۆتور: ايان بەكەن ۇلى