ءبىرىنشى قاڭتاردان شاعىن جانە ورتا بيزنەسكە سالىقتىق امنيستيا جاريالانادى
«بيزنەس جۇمىسىن تازا پاراقتان باستاۋى ءۇشىن 2019 -جىلدىڭ 1- قاڭتارىنان شاعىن جانە ورتا بيزنەس ءۇشىن سالىقتىق امنيستيا جۇرگىزۋگە كىرىسۋدى تاپسىرامىن. دەگەنمەن، بارلىعى دا تەگىس بولىپ وتىرعان جوق. بىرىنشىدەن، سالىقتى ءادىل تولەيتىن بيزنەس بار. ول ەرتەڭ «انانىكىن سىزدىڭ، مەنىكىن نەگە سىزبادىڭ؟ » دەيدى. ياعني، ول مەملەكەتكە نەگىزگى سالىعىن تولەگەن بولسا، وندا ءوسىم پۇلدار مەن ايىپپۇلدار جايىندا ءسوز بولىپ وتىر» ، - دەدى ەلباسى.
مەملەكەت باسشىسى نۇرسۇلتان نازاربايەۆ قازاقستان حالقىنا ارنالعان بيىلعى جولداۋىندا استانادا زاماناۋي ونكولوگيالىق ورتالىقتى سالۋ ماسەلەسىن قايتا كوتەردى.
«كەلەسى جىلدان باستاپ استانادا ۇلتتىق ونكولوگيالىق ورتالىقتىڭ قۇرىلىسىنا كىرىسۋ كەرەك. مەن ەكى جىل بويى وسىنى قايتا- قايتا ايتتىم. ۇستەلدىڭ ۇستىنەن ءبىر قويىپ، تاپسىرما بەرمەسەم، بىرەۋدىڭ دە قيمىلدايتىن ءتۇرى جوق. بيىل فۋندامەنتتى قۇيىپ تاستاڭدار. ونىڭ ىشىندە ەڭ زاماناۋي تەحنولوگيالار بولسىن» ، - دەدى ەلباسى.
پرەزيدەنتتىڭ ايتۋىنشا، جاڭا ونكولوگيالىق ورتالىقتا توموتەراپيا، پروتونوتەراپيا، كيبەر- پىشاق، ادام يممۋنيتەتىن كۇشەيتۋ تەحنولوگياسى بولۋى قاجەت. «قازىر بىزدە جۇرەكتىڭ بارلىق وپەراتسيالارى جاسالادى. ەندى، وسى سالاعا دا جاڭا تەحنولوگيالاردى ەنگىزىپ، جوعارى جەتىستىكتەرگە جەتۋىمىز كەرەك. سونىڭ ارقاسىندا مىڭداعان ادامنىڭ ءومىرىن ساقتاپ قالامىز» ، - دەپ اتاپ كورسەتتى مەملەكەت باسشىسى.
ايتا كەتەيىك، پرەزيدەنت ۇلتتىق ونكولوگيالىق ورتالىقتى سالۋدى بۇعان دەيىن دە تاپسىرعان بولاتىن.
ن. نازاربايەۆ بيىلعى جولداۋىندا الداعى بەس جىلدا بىلىمگە، عىلىمعا جانە دەنساۋلىق ساقتاۋ سالالارىنا شىعىستاردى قارجىلاندىرۋدىڭ بارلىق كوزدەرىنەن جالپى ىشكى ءونىمىنىڭ 10 پايىزىنا دەيىن جەتكىزۋدى تاپسىردى.