قازاقستاندا نازاربايەۆ ۋنيۆەرسيتەت سەكىلدى تاعى ءبىر ىرگەلى جوعارى وقۋ ورنى اشىلادى
«جوعارى ءبىلىم سالاسىندا وقۋ ورىندارىنا تالاپتار قاتايا تۇسەدى. گرانتتاردىڭ سانىن وسىردىك. ەندىگى كەزەكتە جاۋاپكەرشىلىكتى ارتتىراتىن ۋاقىت كەلدى. ج و و- نىڭ تابىستىلىعىنىڭ باستى تالابى - وقۋ بىتكەننەن كەيىن ستۋدەنتتەردىڭ جۇمىسپەن قامتىلۋى، ولاردىڭ جوعارى ايلىعى بار جۇمىسقا ورنالاسۋى بولماق. ۋنيۆەرسيتەتتى بىتىرگەننەن كەيىن - تۇلەكتەردىڭ حالى نە بولدى، ولاردى ايلىعى جاقسى جۇمىسقا قابىلدادى ما؟ سولاي بولسا، دەمەك، ۋنيۆەرسيتەت مىقتى دەگەن ءسوز. ولاي بولماسا، بۇل ۋنيۆەرسيتەتتىڭ ومىرشەڭدىگى دە جوق. ول ۋنيۆەرسيتەت بالالاردىڭ تۇسپەيتىنىن ءبىلۋى ءتيىس»، - دەدى پرەزيدەنت.
مەملەكەت باسشىسى ءوز جولداۋىندا ءبىلىم جانە عىلىم مينيسترىمەن سويلەسكەنىن ايتىپ ءوتتى.
«وسى جىلى بارلىق ۋنيۆەرسيتەتتەر تۇلەكتەردى شىعاردى. قاي ۋنيۆەرسيتەتتەن قانشاسى جۇمىسقا ورنالاسا الدى؟ ول تۋرالى جاريالى تۇردە ايتىپ، باسپاعا جاريالاپ، تەلەۆيدەنيەدەن دە كورسەتۋ كەرەك. مىنە، سوندىقتان ج و و- لاردى ىرىلەندىرۋ ساياساتىن جۇرگىزۋ كەرەك. ءبىزدىڭ ەلدە 130-دان استام ۋنيۆەرسيتەت بار. شىنى كەرەك، ولاردىڭ سانى بۇرىن 200-گە جۋىق ەدى. البەتتە، ج و و- لارعا قارسى ەمەسپىن، كىمنىڭ قايدا وقىعىسى كەلسە، سوندا وقىسىن. ءبىراق، ەشكىمگە قاجەت بولماي قالاتىن ادامداردى دايىنداۋدىڭ، جاي ديپلوم بەرە سالۋدىڭ كەرەگى نە؟» - دەدى مەملەكەت باسشىسى.
نۇرسۇلتان نازاربايەۆ ءدال وسى جەردە سىبايلاس جەمقورلىقتىڭ دا قىلاڭ بەرەتىنىن ەسكە سالدى.
«نارىقتا تەك جوعارى ءبىلىم بەرە الاتىن ج و و- لار قالۋى كەرەك. جاھاندىق ۋنيۆەرسيتەتتەرمەن ىنتىماقتاستىقتى جالعاستىرىپ، نازاربايەۆ ۋنيۆەرسيتەتتىڭ تاجىريبەسى بويىنشا الەمنىڭ ۇزدىك توپ- مەنەدجەرلەرىن تارتۋ كەرەك. البەتتە، نازاربايەۆ ۋنيۆەرسيتەتكە قوماقتى قاراجات ءبولىنىپ جاتىر دەۋى دە مۇمكىن. ءبىراق، باسقا ۋنيۆەرسيتەتتەر - الماتىداعى ەكونوميكا جانە ساۋدا ۋنيۆەرسيتەتى مە ەدى - تارتىپ جاتىر عوي. ولار دا ءساتتى جۇمىس ىستەۋدە. قازمۋ- دا سولاي ءساتتى جۇمىس بابىندا. قازىرگى ءبىلىم بەرۋ ينفراقۇرىلىمىنىڭ بازاسى نەگىزىندە نازاربايەۆ ۋنيۆەرسيتەتتىڭ ۇلگىسى بويىنشا تاعى ءبىر ايماقتىق ج و و اشۋ كەرەك دەپ ەسەپتەيمىن»، - دەدى پرەزيدەنت.
اۆتور: ايان بەكەن ۇلى