شيكىزاتتىق ەمەس سالا ءۇشىن تىكەلەي ينۆەستيتسيالار قورىن قۇرۋدى قاراستىرۋ كەرەك - ەلباسى

None
None
استانا. قازاقپارات - شيكىزاتتىق ەمەس سالادا ءىرى جوبالاردى جۇزەگە اسىرۋ ءۇشىن شەتەلدىك ينۆەستورلارمەن تەڭ قارجىلاندىرۋ قاعيداتىمەن جۇمىس ىستەيتىن تىكەلەي ينۆەستيتسيالار قورىن قۇرۋدى قاراستىرۋ كەرەك.

 بۇل تۋرالى مەملەكەت باسشىسى نۇرسۇلتان نازاربايەۆ قازاقستان حالقىنا ارناعان جولداۋىندا اتاپ ءوتتى، دەپ حابارلايدى قازاقپارات ءتىلشىسى.

«شيكىزاتتىق ەمەس سالادا ءىرى جوبالاردى جۇزەگە اسىرۋ ءۇشىن شەتەلدىك ينۆەستورلارمەن تەڭ قارجىلاندىرۋ قاعيداتىمەن جۇمىس ىستەيتىن تىكەلەي ينۆەستيتسيالار قورىن قۇرۋ ماسەلەنى قاراستىرۋ كەرەك. بۇل سالاعا شامامەن 300 ميلليارد تەڭگەگە تارتا قاراجات ءبولىنسىن. قاراجاتتىڭ قانداي كوزدەردەن الىناتىنىن ءبىز بىرگە شەشەمىز. وسىنى قولعا الساق، تەڭ قارجىلاندىرۋ بويىنشا ترانسۇلتتىق كومپانيالارعا قارجى قۇيساق، وندا ولار بۇل جۇمىسقا بەلسەنە كىرىسەدى. سولاي عوي، اسقار ۇزاقباي ۇلى، (ق ر پرەمەر- ءمينيسترىنىڭ ءبىرىنشى ورىنباسارى اسقار ءمامين - اۆت.). بۇل - سونىڭ ۇسىنىسى. مەن ونى قابىلدايمىن»، - دەدى نۇرسۇلتان نازاربايەۆ.

ايتا كەتەيىك، ق ر پرەزيدەنتى نۇرسۇلتان نازاربايەۆ وسى ۋاقىتتا اقوردادا قازاقستان حالقىنا جولداۋىن جاريالاۋدا. ستراتەگيالىق قۇجات ەلىمىزدىڭ الەۋمەتتىك- ەكونوميكالىق دامۋىنىڭ وزەكتى ماسەلەلەرىنە جانە قازاقستاندىقتاردىڭ ءال- اۋقاتىن ودان ءارى ارتتىرۋ مىندەتتەرىنە ارنالعان.

اۆتور: ايان بەكەن ۇلى

سوڭعى جاڭالىقتار