قىتاي يمپورت سالىعىن ازايتادى
بۇل اقپاراتتى ەلدىڭ مەملەكەتتىك كەڭەسى جانىنداعى كەدەندىك سالىقتار جونىندەگى كوميتەتى جاريالادى.
وسىلايشا توقىما بۇيىمدارى، قۇرىلىس ماتەريالدارى، كەراميكالىق جانە شىنى بۇيىمدار، مەتالل، ەلەكتروتەحنيكالىق جابدىقتار مەن شيكىزات تاۋارلارىنىڭ تاريفى تومەندەتىلەدى. كەدەندىك سالىقتار ورتاشا ەسەپپەن 10,5-دان 8 پايىزعا دەيىن ازايتىلادى. سىرتتان اكەلىنەتىن تاۋارلاردىڭ تاريفىن بىرتىندەپ تومەندەتۋ ماسەلەسىن بيىل قىتاي ءتوراعاسى شي جينپيڭ بواودا وتكەن ازيالىق فورۋمدا ايتقان ەدى. باستاما ەلدىڭ رەفورمالار مەن اشىقتىق ساياساتىنىڭ جاڭا ساتىسىنا كوشكەنىن بىلدىرەدى.
ۇكىمەتتىڭ ماقساتى - قىتاي نارىعىنا شىعاتىن شەتەلدىك كومپانيالارعا جەڭىلدىك جاساۋ جانە ىشكى تۇتىنۋدى ىنتالاندىرۋ ءۇشىن يمپورت كولەمىن ارتتىرۋ. ساراپشىلاردىڭ ايتۋىنشا، قىتاي ءوز نارىعىنا ساۋدا سەرىكتەستەرىنىڭ كوبىرەك كەلگەنىن قالاپ وتىر.
سيۋي سيان، قىتاي حالىقتىق ۋنيۆەرسيتەتى جانىنداعى قارجى مەكتەبىنىڭ پروفەسسورى:
- مەنىڭ ويىمشا، قىتاي دۇنيەجۇزىنە ءوزىنىڭ اشىقتىق ساياساتىن ۇستانىپ وتىرعانىن جاريا قىلىپ، ونى دامىتۋعا ىنتالى ەكەنىن ءبىلدىرىپ جاتىر. بواو فورۋمىندا ءتوراعا شي جينپيڭ الەمگە وسىنداي ۋادەسىن بەرگەن بولاتىن. بۇل دەگەنىمىز - قىتاي ءوز مىندەتتەمەسىن ورىندايدى دەگەن ءسوز. ءبىز الەمدىك ساۋداداعى كليماتتىڭ قۇبىلعانىنا قاراماستان ءوز ساياساتىمىزدى وزگەرتپەيمىز.
دەگەنمەن تاريفتەر سوعىسىنىڭ اسەرى دە بەلگىلى بولا باستادى. ماسەلەن، قىتاي مەن ا ق ش- تىڭ اراسىنداعى ساۋدا بالانسىنداعى تاپشىلىق ودان ءارى ارتىپ وتىر. قىتاي ەلىنە ا ق ش- تان اكەلىنەتىن ازىق- تۇلىكتىڭ كولەمى % 9,5 پايىزعا ازايعان. جالپى امەريكالىق ەكسپورت % 1,6 تۇسكەن. بۇل مۇحيتتىڭ ار جاعىنان كەلەتىن سوياعا قىتايدىڭ تاريفتى كوتەرۋىنەن بولعان.
www.24.kz