قوقىستا قالعان ابايدىڭ ءمۇسىنى وسكەمەندەگى مەكتەپتىڭ اۋلاسىنا قويىلادى
بۇل تۋرالى وسكەمەن قالاسىنىڭ اكىمى جاقسىلىق ومار شىعىس كەنتىنىڭ تۇرعىندارىمەن بولعان كەزدەسۋدە ايتتى.
«ابايدىڭ ءمۇسىنىن وسى جەرگە قويامىز. ءبىراق، ءبىر كەمشىلىگى - ەسكەرتكىشتەگى بەينە دۇرىس جاسالماعان. قايتا جوندەۋىمىز كەرەك. ابايدىڭ بەينەسىن قالاي بولسا، سولاي جاساي بەرمەيمىز عوي. ابايدىڭ ەڭ ءساتتى شىققان ءمۇسىنى الماتىداعى رەسپۋبليكا سارايىنىڭ الدىندا تۇر. ول مۇحتار اۋەزوۆتىڭ كەڭەسىمەن جاسالعان. ءبىز دە سول نۇسقاعا ساي جاساۋىمىز كەرەك»، - دەدى قالا اكىمى.
***
وقىرماندارعا تۇسىنكتى بولۋ ءۇشىن وسىعان دەيىن جازىلعان سەرىك قۇسانبايەۆتىڭ ماقالاسىنان ءۇزىندى كەلتىرە كەتەيىك.
... «ابايدىڭ مىنا كەۋدە ءمۇسىنىن 2014 -جىلى شەمونايحا اۋدانىنىڭ اكىمدىگىندەگىلەر تاپسىرىس بەرىپ جاساتقان. كەيىن قارجىلارى بولماي قالدى ما، الدە ابايدان اينىپ قالدى ما، ايتەۋىر الماي قويدى. مۇنى مەن ەمەس مارقۇم اكەم جاساعان»، - دەيدى «قازاقستانعا ەڭبەگى سىڭگەن ءمۇسىنشى» ۆلاديمير بوريسوۆيچ سامويلوۆتىڭ ۇلى.
كەلىسىم ءوزارا اۋىزشا جۇرگىزىلگەن كورىنەدى. اياعى وسىلايشا سيىرقۇيىمشاقتانىپ، ناتيجەسىندە ەشقانداي جازىعى جوق اباي اتامىز دالادا، قوقىستىڭ اراسىندا قالىپ قويعان.
بولعان جايدىڭ انىق- قانىعىن بىلمەك ماقساتپەن لەو شيككە دە، شەمونايحا اكىمدىگىنە دە حابارلاسقان ەدىك. لەو شيك ابايدىڭ كەۋدە ءمۇسىنى جايلى ءبىرىنشى رەت ەستىپ تۇرعانىن ايتسا، مامىر ايىنان بەرى شەمونايحا اۋدانى اكىمىنىڭ مىندەتىن اتقارىپ وتىرعان دميتريي گوركوۆوي دەگەن ازامات بۇل ماسەلەنىڭ جالعان ەكەندىگىن، اۋدان ەشكىمگە دە، ەشقاشان دا ابايدىڭ مۇسىنىنە تاپسىرىس بەرمەگەنىن جەتكىزدى.
سامويلوۆتار قاقپاسىنىڭ الدىندا ابايدىڭ كەۋدە مۇسىنىنەن بولەك، ميحاەليستىڭ دە باسى جاتىر ءبىر جەردە دومالاپ.
- بۇل ۇلى ادامداردى وسىنشاما نەگە قورلاپ وتىرسىڭ؟ - دەگەن ءازىل- شىنى ارالاس ساۋالىمىزعا:
- بىرىنشىدەن، وسى كورىنىستى ارى وتكەن، بەرى وتكەندەر كورىپ اكىمدىكتەگىلەرگە جەتكىزىپ بارسىن دەگەم. ەكىنشىدەن، مىناۋ ابايدىڭ كەۋدە ءمۇسىنىن بىلتىر تەلەۆيدەنيەدەگىلەر كەلە جاتىرمىز دەگەسىن كرانمەن وسى جەرگە شىعارتتىرعان ەدىم. ەندى قايتا كىرگىزۋگە كرانىم جوق، ونىڭ ۇستىنە ارى- بەرى سۇيرەپ جۇرگەندە بەتوننان قۇيىلعان ءمۇسىن سىنىپ قالا ما دەپ قورقام. ويتكەنى، سالماعىنىڭ ءوزى 400 كيلوگرامنىڭ ماڭايىندا، - دەيدى ءمۇسىنشىنىڭ ۇلى.
كىمنىڭ ءسوزىنىڭ راس، كىمدىكى جالعان ەكەنىن بىلە الماي ەكى ورتادا ءبىزدىڭ باسىمىز داڭ بولدى. قالاي بولعاندا دا تۇتاس ءبىر ۇلتتىڭ رۋحاني كوسەمىنە اينالعان ۇلى ابايدىڭ بۇلايشا قورلانۋىنا جول بەرمەۋىمىز كەرەك قوي.
كىشى سامويلوۆ ءبىر سوزىندە بۇل كەۋدە ءمۇسىندى جاساۋ ءۇشىن كەزىندە 500 مىڭ تەڭگەنىڭ شىعىنى شىققاندىعىن، ەگەر الام دەۋشى تابىلسا، 300 مىڭعا بەرە سالاتىندىعىن دا نىعارلاپ ايتىپ قالدى.