ۇلتتىق مۋزەيدە كورەي سۋرەتشىسىنىڭ الەمگە ايگىلى تۋىندىلارىنىڭ كورمەسى اشىلدى

استانا. قازاقپارات - بۇگىن ۇلتتىق مۋزەيدە ق ر مادەنيەت جانە سپورت مينيسترلىگىنىڭ قولداۋىمەن تانىمال كورەيالىق سۋرەتشى لي چولسۋدىڭ «كۇلىمدەگەن الەم» اتتى كورمەسى اشىلدى، دەپ حابارلايدى قازاقپارات.

كورمەنى ۇيىمداستىرۋشىلار - كورەيا رەسپۋبليكاسىنىڭ قازاقستانداعى ەلشىلىگى مەن ق ر ۇلتتىق مۋزەيى.

ۇلتتىق مۋزەي باسپا ءسوز قىزمەتىنىڭ مالىمەتىنشە، لي چولسۋدىڭ بۇكىل الەمگە ايگىلى گرافيكالىق تۋىندىلارى قازاقستاندىق ونەرسۇيەر قاۋىمعا العاش رەت ۇسىنىلىپ وتىر. بۇل - وتكەن عاسىردىڭ 90-جىلدارىنان باستاپ 2017 -جىلعا دەيىن سالىنعان 60 گرافيكالىق سۋرەت.

شارانىڭ اشىلۋ سالتاناتىندا ءسوز العان ق ر ۇلتتىق مۋزەيى ديرەكتورىنىڭ مىندەتىن اتقارۋشى لەونيد كوچەتوۆ شارانىڭ ماڭىزىنا توقتالدى.

«ءبىز قازاقستان رەسپۋبليكاسىنداعى كورەيا ەلشىلىگىمەن تىعىز بايلانىستا جۇمىس جاساپ كەلەمىز. وتكەن جىلى قازاقستان مەن كورەيا رەسپۋبليكاسىنىڭ ديپلوماتيالىق قارىم- قاتىناسىنا 25 جىل تولۋىنا وراي «كورەي بەينەلەرى» جانە «قازاقستان كارىستەرى» تاقىرىبىندا كورمەلەر ۇيىمداستىرعانبىز. وسى باعىتتا ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنان تۋىندايتىن مىندەتتەر اياسىندا قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن «التىن ادامنىڭ الەم مۋزەيلەرىنە شەرۋى» جوباسىن ىسكە قوسىپ، سەۋلدەگى كورەي ۇلتتىق مۋزەيىندە كورسەتۋدى جوسپارلاپ وتىرمىز. بولاشاقتا ەكى ەل اراسىنداعى ىنتىماقتاستىقتى ارتتىرۋ ماقساتىندا ءتۇرلى مادەني شارالار جالعاسىن تابادى»، - دەدى.

لي چولسۋ سولتۇستىك چحۋنچحون پروۆينسياسىندا ءومىر سۇرگەن 30 جىلدىڭ ىشىندە ونەرمەن اينالىسىپ، ەگىنشىلىك سالاسىندا ەڭبەك ەتكەن. قاراپايىم سىزىقتارمەن ورىندالعان اسەرلى سۋرەتتەر، ولارعا جازىلعان كەرەمەت ماتىندەر - ونىڭ ەڭبەكتەرىنىڭ باستى ەرەكشەلىگى.

كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى كيم دە- سيكتىڭ ايتۋىنشا، لي چولسۋ - وتە تالانتتى تۇلعا.

«ونىڭ تۋىندىلارى بەيبىتشىلىك، بىرلىك، تىرشىلىكتەگى ورتاق ۇيلەسىمدى ناسيحاتتايدى. لي چولسۋ شىعارماشىلىعىنداعى باستى تاقىرىپ - ادامنىڭ ىشكى جان-دۇنيەسى. لي چولسۋ تەك سۋرەت سالىپ قانا قويماي، ولەڭ دە جازادى. ونىڭ شىعارمالارى الەمدىك دەڭگەيدە تانىستىرىلىپ، كوپتىڭ كوڭىلىنەن شىققان بولاتىن. «كۇلىمدەگەن الەم» سىزدەرگە دە ۇنايدى دەپ سەنەمىن»، - دەدى ول ءوز سوزىندە.

سۋرەتشى لي چولسۋدىڭ كورمەلەرى بازەل (شۆەتساريا، 2016)، ساحالين (2017)، سيەتل (2017) قالالارىندا وتكەن. بيىل ۆەنگريا، يسپانيا، گەرمانيا، فرانسيا جانە بەلگيا سىندى ەلدەردى قامتىعان ەۋروپالىق تۋرنەنىڭ ءبىر بولىگى رەتىندە قازاقستانعا كەلدى.