جۇرەگى جۇمساق دارىگەر ناۋقاس بالانىڭ قونجىعىنا وتا جاسادى

  استانا. قازاقپارات - كانادالىق حيرۋرگ انەستەزياسىز، ەش قيىندىقسىز پۇلىشتەن جاسالعان قونجىققا وتا جاسادى.

كانادالىق دارىگەر دانيەل ماكنيلي بۇرىن- سوڭدى ويىنشىق قونجىققا وتا جاساپ كورمەسە دە، پۇلىشتەن جاسالعان ايۋدىڭ يەسى ناۋقاس بولعاندىقتان، كىشكەنتاي بالانىڭ وتىنىشىنەن باس تارتا المادى.

8 جاستاعى دجەكسون ماككي وپەراتسيا بولمەسىنە بارا جاتىپ، حيرۋرگتان ءوزىنىڭ كىشكەنتاي قونجىعىن دا جوندەپ بەرۋىن ءوتىندى.

دارىگەرىنە ەرەكشە ءوتىنىش جاساعان دجەكسون تۋعانىنان گيدروتسەفاليادان، ياعني مي جۇلىن سۇيىقتىعىنىڭ جيناقتالۋىنان زارداپ شەگەدى. ال، دارىگەر ماكنيلي ونىڭ العاشقى نەيروحيرۋرگتەرىنىڭ ءبىرى.

«مەن ونىڭ وتىنىشىنەن قالاي باس تارتامىن» - دەپ جازدى دارىگەر Twitter- دەگى پاراقشاسىندا قونجىققا وتا جاساپ تۇرعان سۋرەتىن سالىپ.

ناۋقاس بالانىڭ وتىنىشىنەن باس تارتا الماعان دارىگەر Twitter- گە ونىڭ قونجىعىنا وتا جاساپ تۇرعان كەزدەگى سۋرەتىن جاريالادى. جۇرەگى جۇمساق دارىگەردىڭ سۋرەتى كوپ قارالىم جيناپ، شامامەن جەتى مىڭ وقىرماننىڭ پاراقشاسىندا جاريالاعان.

بالانىڭ ءوتىنىشىن جەرگە تاستاماعان دارىگەر قونجىقتىڭ قولتىعىنىڭ جىرتىلعانىن انىقتاپ، وتا كەزىندە وعان «وتتەگى ماسكاسىن» كيگىزىپ قويدى.

Stan.kz