قىرعىزستان ەكس- پرەزيدەنتكە تيىسپەۋ نورماسىن كونستيتۋتسياعا قايشى دەپ تانىدى

استانا. قازاقپارات - قىرعىزستان جوعارعى سوتىنىڭ كونستيتۋتسيالىق پالاتاسى زاڭگەر نۋربەك توكتاكۋنوۆتىڭ زاڭداعى ەكس- پرەزيدەنتكە تيىسۋگە مۇلدەم بولمايتىنى تۋرالى نورمانى كونستيتۋتسياعا قايشى دەپ تانۋدى سۇراعان شاعىمىن قارادى.

 زاڭگەر قىرعىزستان پرەزيدەنتىنىڭ قىزمەتىنە كەپىلدىك بەرۋ تۋرالى زاڭنىڭ 12-بابىن («قىرعىزستان ەكس- پرەزيدەنتىنە تيىسپەۋ») شاعىم تۇسىرگەن. ول شاعىمىندا ەكس- پرەزيدەنتكە مۇلدەم تيىسۋگە بولمايدى دەگەن نورمانى جويۋدى سۇرايدى.

توكتاكۋنوۆتىڭ سوزىنشە، كونستيتۋتسيالىق پالاتا پرەزيدەنتكە تيىسپەۋ قۇقىعىن بەرۋ كونستيتۋتسياعا قايشى، ءبىراق تيىسپەۋ تۋرالى نورمامەن بىرگە ونداي قۇقىقتان ايىرۋ پروتسەدۋراسى دا قاراستىرىلۋى ءتيىس دەپ جاۋاپ بەرگەن.

«تۇسىنىكتى قىلىپ ايتساق، ولار «ەكس- پرەزيدەنتكە تيىسپەۋ تۋرالى باپ كونستيتۋتسياعا قايشى كەلەدى، سەبەبى بۇل قۇقىقتان ايىرۋ پروتسەدۋراسى قاراستىرىلماعان» دەگەن پىكىردە. پالاتا زاڭعا ەكس- پرەزيدەنتتى تيىسپەۋ قۇقىعىنان ايىرۋ پروتسەدۋراسىن ەنگىزۋدى دەپۋتاتتار ۇسىنۋى كەرەك دەپ، بارلىق جاۋاپكەرشىلىكتى جوگوركۋ كەڭەشكە ارتىپ وتىر. ولار سونىمەن قاتار بۇل پروتسەدۋرا پرەزيدەنتتى قىزمەتىنەن شەتتەتۋدەن (يمپيچمەنت جاريالاۋ - رەد. ) وڭاي بولماۋى ءتيىس دەپ سانايدى» دەيدى توكتاكۋنوۆ.

كونستيتۋتسيالىق پالاتا زاڭگەر توكتاكۋنوۆتىڭ شاعىمىن بيىل شىلدەدە وندىرىسكە العان. زاڭگەر ەكس- پرەزيدەنتكە تيىسۋگە بولمايدى دەگەن ابساليۋتتى قۇقىق كونستيتۋتسيانىڭ «زاڭ الدىندا ادامداردىڭ بارلىعى تەڭ» دەگەن پرينتسيپىنە قايشى كەلەدى دەيدى.

قىرعىزستان پرەزيدەنتىنىڭ قىزمەتىنە كەپىلدىك بەرۋ تۋرالى زاڭنىڭ 12-بابىندا ەكس- پرەزيدەنت قىرعىزستان پرەزيدەنتى قىزمەتىن اتقارۋ كەزىندەگى ارەكەتى نەمەسە ارەكەتسىزدىگى ءۇشىن قىلمىستىق جانە اكىمشىلىك جاۋاپقا تارتىلمايدى، تۇتقىندالىپ، قامالمايدى، تىنتىلمەيدى جانە تەرگەلمەيدى دەلىنگەن. قىرعىزستاندا ەكس- پرەزيدەنت مارتەبەسىنە روزا وتۋنبايەۆا مەن المازبەك اتامبايەۆ قانا يە.

زاڭنىڭ بۇل تالابىن جويۋ تۋرالى تالقى المازبەك اتامبايەۆتىڭ بىشكەك  ТЭЦ- ءىن مودەرنيزاتسيالاۋعا تىكەلەي قاتىسى بارى تۋرالى مالىمدەمەدەن كەيىن كۇشەيگەن. قىرعىزستان قۇقىق قورعاۋ ورگاندار  ТЭЦ- ءتى مودەرنيزاتسيالاۋ كەزىندە سىبايلاس جەمقورلىق قىلمىسى بولعان دەپ كۇدىكتەنەدى. اتامبايەۆ ايىپتى جوققا شىعارادى.

«بىشكەك  ТЭЦ- ءىن مودەرنيزاتسيالاۋ» جوباسىن ىسكە اسىرۋ كەزىندەگى ىقتيمال سىبايلاس جەمقورلىق فاكتىسىن تەرگەۋ اياسىندا المازبەك اتامبايەۆتىڭ ءۇش سەرىگى - بۇرىنعى پرەمەر- مينيستر ساپار يساكوۆ، بىشكەكتىڭ ەكس- مەرى كۋبانىچبەك كۋلماتوۆ پەن دەپۋتات وسمونبەك ارتىكبايەۆ قامالدى. بۇل ءۇش ساياساتكەر دە اتامبايەۆ باسقاراتىن سوتسيال- دەموكراتيالىق پارتيانىڭ مۇشەسى. يسكاكوۆ، كۋلماتوۆ پەن ارتىكبايەۆ وزدەرىنە تاعىلعان ايىپتى تەرىستەيدى.

azattyq.org