قازاقستاندا الەمگە ايگىلى يلليۋزيونيستەر شوۋى وتەدى
«يلليۋزيونيستەر» شوۋى 25 مەملەكەتتەگى 200 قالانى شارلاپ، برودۆەي تاريحىنداعى ەڭ ۇزدىك بولىپ تانىلعان ۇجىم. ا ق ش، اۆستراليا، كانادا جانە ۇلى بريتانياداعى تاڭقالارلىق جەتىستىگىنەن كەيىن ولار ەۋروپانى «جاۋلاۋىن» جالعاستىرۋدا. ەندى مىنە، استانا مەن الماتى تۇرعىندارىنا دا وسىنداي جوعارى دەڭگەيدەگى سيقىر ونەرىن كورۋ مۇمكىندىگى تۋىپ وتىر.
«يلليۋزيونيستەر» شوۋىنىڭ قويىلىمدارىنان كورەرمەندەر يلليۋزيانى اربايتىن كورىنىستەردى، اۋادا قالىقتاۋدى، ويدى وقۋدى، جوعالۋدى جانە باسقا دا كوپتەگەن جوعارى تەحنولوگيالى جانە قاۋىپتى تريۋكتەردى كورە الادى. ازىرگە ولاردى پروديۋسسەرلەر قاتاڭ قۇپيادا ۇستاپ وتىر. بۇدان بولەك كلاسسيكالىق يلليۋزياعا زاماناۋي ەستەتيكا، ادەمى كوستيۋمدەر جانە تەاتر ونەرى قوسىلادى.
قازاقستاندا قويىلاتىن شوۋدىڭ قۇرامىندا 7 يلليۋزيونيست بار. اتاپ ايتقاندا، حارريسون گرينباۋم فالسيفيكاتور، مارك كالين شوۋمەن، دجينجەر لايت سيقىرشى، ەنزو سيقىرشى، كرەندل جۇگىرۋ شەبەرى، سەباستيان نيكولاس مانيپۋلياتور، روبين شارپ قارۋ شەبەرى.
اتالعان سيقىرشىلاردىڭ شوۋى دۇنيەجۇزىندەگى ميلليونداعان كورەرمەندەرى بار تەلەارنالاردا كورسەتىلگەن.
«ءبىزدىڭ ءارقايسىسىمىز قازاقستانعا كەلگەنىمىزگە اسا قۋانىشتىمىز. 2018 -جىل ءبىزدىڭ شوۋ ءۇشىن ەرەكشە جىل بولۋدا. قازاقستانعا العاش كەلۋىمىز بولعاندىقتان ءبىز ءۇشىن بارلىعى تاڭ جانە ەرەكشە بولىپ كورىنۋدە. ءبىز الەمنىڭ كوپتەگەن ەلدەرىن ارالادىق دەگەنمەن قازاقستان باسقاشا. ارينە ءالى تولىق ارالاپ، تانىسىپ ۇلگەرمەدىك، دەگەنمەن شوۋ اراسىندا مىندەتتى تۇردە جاقىنىراق تانىپ بىلۋگە تىرىسامىز. سونىمەن قاتار قازاقستانعا كەلۋىمىزدىڭ بۇل باسى عانا دەپ ويلايمىن. بىزدە بولاشاققا جوسپار كوپ. الەمنىڭ ءار ەلىنە، ءار قالاسىنا بارعان سايىن بىزدە جاڭا يدەيا، جاڭا تۋىندىلار پايدا بولادى. بۇل جولى دا سولاي بولادى دەپ ويلايمىز. قويىلىمدارعا كەلسەك ونىڭ قۇپياسىن اشپاي- اق قويايىق، ءبىراق اسەرلى شوۋ قويۋعا ۋادە بەرەمىز»، - دەدى «يلليۋزيونيستەر» شوۋىنىڭ كرەاتيۆتى پروديۋسەرى سايمون پەينتەر شوۋدىڭ وتكىزىلۋىنە وراي ۇيىمداستىرىلعان باسپا ءسوز ءماسليحاتىندا.
باسپاءسوز ءماسليحاتى بىتكەن سوڭ يلليۋزيونيستەر قويىلىمدارىنان ءۇزىندى كورسەتتى.
«يلليۋزيونيستەر» شوۋى استانا قالاسىندا 6-7 - قازان كۇندەرى كونگرەسس ورتالىقتا جانە الماتى قالاسىندا 10-11 - قازان كۇندەرى رەسپۋبليكا سارايىندا بولادى.
اۆتور: داۋلەت ىزتىلەۋ