ەكپەدەن باس تارتقان اتا-انالار زاڭ الدىندا جاۋاپ بەرەدى

استانا. قازاقپارات - ق ر دەنساۋلىق ساقتاۋ مينيسترلىگى ءوز بالاسىنا ۆاكسيناتسيا جاساماعان اتا-انالاردى جاۋاپكەرشىلىككە تارتۋ ماسەلەسىن قاراستىرىپ جاتىر، دەپ حابارلايدى قازاقپارات ءتىلشىسى.

ۆيتسە-مينيستر الەكسەي سويدىڭ ايتۋىنشا، ونداي جاۋاپكەرشىلىك دەنساۋلىق ساقتاۋ تۋرالى جاڭا كودەكسكە ەنگىزىلۋى مۇمكىن.

«قازىرگى كەزدە ءبىز قوعامدىق ۇيىمدارمەن، جالپى، جۇرتشىلىقپەن وسى ماسەلەنى كەڭىنەن تالقىلاپ جاتىرمىز. سەبەبى ادام اۋىرىپ جۇرسە دە، باسقالاردىڭ دەنساۋلىعىنا نەمقۇرايلى قاراسا، ءتيىستى ەم-دومدى قولعا الماسا، وعان قارسى ءبىر شارا بولۋ كەرەك دەپ ويلايمىز. ماسەلەن، مەنينگيت بار. ونىمەن اۋىرعان ادام ينفەكسيانىڭ قاۋىپتى ەكەنىن بىلە تۇرا، كوپ حالىق وتىرعان جەرگە كەلسە، قاۋىپتى ەمەس پە؟ سوندىقتان ءبىز وسى ماسەلەنى كەڭىنەن قاراستىرىپ جاتىرمىز. ارينە، ادام قۇقىقتارى جانە تاعى باسقا جايتتار بار»، - دەدى ا. سوي جۋرناليستەرگە بەرگەن سۇحباتىندا.

ونىڭ ايتۋىنشا، ۆاكسينا ماسەلەسى دە سولاي. مەملەكەت اۋرۋعا قارسى ەم-دومدى ۇسىنادى. الايدا كەيبىر ادامدار ونى بىلە تۇرا، ۆاكسيناتسيادان باس تارتادى. دەمەك، جەكە جاۋاپكەرشىلىك ماسەلەسى تۋىندايدى.

«سوسىن ول ادام ۆاكسينادان باس تارتقاننان كەيىن اۋىرىپ قالسا، ونى مەملەكەتتىڭ اقشاسىنا قايتادان ەمدەگەن قانشالىقتى ادىلەتتى؟ وسى جاعىن دا قاراستىرۋىمىز قاجەت»، - دەپ اتاپ كورسەتتى ا. سوي.

ال باس سانيتار جانداربەك بەكشيننىڭ سوزىنە قاراعاندا، بۇگىندە ۆاكسيناتسيادان باس تارتاتىن ازاماتتاردىڭ سانى ازايىپ كەلەدى.

«اشىعىن ايتۋ كەرەك، ۆاكسينادان باس تارتۋدىڭ نەگىزگى سەبەبى - ءدىني كوزقاراس. ونداي ادامداردىڭ سانى 60 پروتسەنتتەن اسىپ وتىر. ولار تەلەديدار كورمەيدى، گازەت-جۋرنال وقىمايدى، گادجەتتەردى پايدالانبايدى. ءبىز ونداي ادامداردىڭ اربىرەۋىمەن جەكە-جەكە جۇمىس ىستەيمىز. ماسەلەن، 2016 -جىلى 250 ادام ءوز كوزقاراسىن وزگەرتسە، اعىمداعى جىلى 8-ايدىڭ ىشىندە ونداي ادامداردىڭ سانى 2220-عا جەتتى»، - دەيدى ج. بەكشين.

ايتا كەتەيىك، بۇگىن ق ر دەنساۋلىق ساقتاۋ مينيسترلىگىندە ينفەكسيالىق اۋرۋلادىڭ الدىن الۋ جونىندەگى رەسپۋبليكالىق شتابتىڭ وتىرىسى ءوتتى. سول جەردە استانا مەن ماڭعىستاۋداعى مەنينگوكوكك ينفەكسياسىنا قاتىستى سوڭعى دەرەكتەردى جاريالادى.