كۇزدە بەتكە قالاي كۇتىم جاساۋ كەرەك؟

 استانا. قازاقپارات - قىز- كەلىنشەكتەر جىلدىڭ كەز كەلگەن مەزگىلىندە سۇلۋ بولىپ، بەت تەرىسى جارقىراپ تۇرعانىن قالايدى.

اسىرەسە، ەڭبەك دەمالىسىنان كەيىن بەت تەرىسىن ىلعالداندىرىپ، ونى كۇز، قىس ايلارىنا دايىنداۋ وتە ماڭىزدى ەكەنىن ەسكەرۋ قاجەت.

وسى رەتتە كوسمەتولوگ شىنار جۇمانباي بەت تەرىسىنە سايكەس كەلەتىن پروتسەدۋرانى عانا جاساپ، ونى ءار ماۋسىمعا بايلانىستى دۇرىس تاڭداۋدىڭ ماڭىزدى ەكەنىن ايتادى.

ماماننىڭ ايتۋىنشا، كوسمەتولوگيادا ناقتى تىيىم سالىنعان بەلگىلى ءبىر پروتسەدۋرالار جوق. مۇندا تەك ونى دۇرىس تاڭداۋ وتە ماڭىزدى. ءبىراق ول قازىر قازاقستاندىق قىزدار كوپ جاساتاتىن پيلينگ پروتسەدۋراسىن جاز ايلارىندا جاساماۋ كەرەكتىگىن ەسكەرتەدى.

پيلينگ دەپ ايتىپ وتىرعانىمىز تەرىنى ءولى جاسۋشالاردان تازارتىپ، ونىڭ جاڭارۋىنا سەپتىگىن تيگىزىپ، پيگمەنتاتسيامەن، اجىمدەرمەن، ءتىپتى، اكنەمەن كۇرەسۋگە دە كومەكتەسەدى. - جالپى بۇكىل كوسمەتولوگيالىق پروتسەدۋرانى كۇز بەن قىستا جاساعان ءجون. ويتكەنى بۇل ماۋسىم تەرىگە وتە قولايلى.

قىستا جاسالاتىن پيلينگتەر (حيميالىق پيلينگتەر)، ونىڭ ىشىندە بادامنان، سۇتتەن جاسالعان پيلينگتەر - وسىنىڭ بارلىعىن ءبىز مىندەتتى تۇردە كۇن سۋىعاندا، كۇن ساۋلەسىنىڭ بەلسەندىلىگى تومەندەگەن كەزدە، ياعني كۇزدەن باستاپ قىستىڭ سوڭعى ايلارى ناۋرىز ايىنا دەيىن جاساۋ كەرەك، - دەيدى كوسمەتولوگ.

بۇل پروتسەدۋرا 16 مىڭ تەڭگەدەن باستالادى. ونىڭ ايتۋىنشا، بۇل پروتسەدۋرانى كۇز، قىس ۋاقىتىندا جاساۋعا تاعى ءبىر سەبەپ - قازاقستاندىق قىز-كەلىنشەكتەردىڭ كوبى ەڭبەك دەمالىسىنان ورالىپ، بەتىندەگى پيگمەنتتەردى الىپ تاستاعىسى كەلەدى. ال جالپى كۇز بەن قىستاعى قولايلى پروتسەدۋرالاردىڭ قاتارىنا تەك پيلينگپەن جانە ينەمەن جاسالاتىن (بيوريەۆيتاليزاتسيا) پروتسەدۋرالاردى جاتقىزۋعا بولادى ەكەن.

راسىندا دا پيلينگتەن كەيىن تەرىنىڭ قىزارىپ، ءىسىنۋ پايدا بولعانى جانە تەرىنىڭ قىشىعانى جايلى ءجيى ەستيمىز. مامان بۇل پروتسەدۋرانىڭ قانداي كەرى اسەرى بار جايلى سۇراققا بىلاي دەپ جاۋاپ بەردى: - قازىرگى ۋاقىتتا تەرىنىڭ قابىرشىقتانۋىنا جول بەرمەيتىن، بەتتى كۇيدىرىپ جىبەرمەيتىن پيلينگ جاسالادى. كليەنت تەك 15-20 پايىزدىق قىشقىل الادى. بۇرىنعىداي ۇلكەن مولشەردەگى قىشقىل قابىلدانبايدى، - دەپ ءتۇسىندىردى جۇمانباي.

وسى رەتتە كوسمەتولوگ كۇيدىرەتىن پيلينگتەردىڭ وتە قاۋىپتى ەكەنىن ايتىپ ءوتتى. ونىڭ ايتۋىنشا، بەت تەرىسى كۇيىپ قالعان جاعدايدا تەرىدە د پيگمەنتى پايدا بولادى.

ال ونى پينتسەتپەن جۇلىپ قالساڭ، استىنان تاعى ءبىر پيگمەنت پايدا بولىپ، ناتيجەسىندە گيپەرپيگمەنتاتسياعا اينالادى ەكەن. سونداي-اق، مامان كۇز ماۋسىمىنداعى بەت كۇتىمى بويىنشا بىرنەشە كەڭەس بەردى:

1. كۇن سالقىنداعاندا بەت تەرىسى قۇرعاپ كەتۋىنە بايلانىستى ءاردايىم ماسكا جاساپ تۇرۋ قاجەت؛

2. دالاعا شىعار الدىندا مىندەتتى تۇردە ىلعالداندىراتىن كرەم قولدانۋ كەرەك؛

3. تەرىسى سەزىمتال نەمەسە كۋپەروزى بار ادامدارعا سالقىننان قورعانعان ءجون؛

4. تەرىنى جاڭارتىپ تۇرۋ قاجەت، ياعني، پيلينگ پروتسەدۋراسىن ۇمىتپاۋ كەرەك؛

5. تەرموسۋلاردى قولدانىپ، مايلى تەرىنى دە ىلعالداندىرۋدى ۇمىتپاۋ كەرەك.

6. تەرىنىڭ قورعانىشتىق قىزمەتىن جۇزەگە اسىرۋ - تەرىنى كۇن ساۋلەسىنەن، جەلدەن، ايازدان دا قورعاۋ قاجەت؛ قۇرامىندا كۇننەن قورعايتىن فيلترى بار كوسمەتيكانى تاڭداعان ابزال؛

7. سىرتقى فاكتورلاردان ساقتانۋ كەرەك - تەمەكى ءتۇتىنى، كۇيزەلىس. مۇنىڭ بارلىعى دا تەرىگە زياندى اسەرىن تيگىزەدى.

8. ەڭ باستىسى - تاڭداعان كوسمەتيكا مەن بەت كۇتىمى تەرىنىڭ تيپىنە سايكەس كەلۋى كەرەك.

دەرەككوز: tengrinews.kz