دەنساۋلىق مينيسترلىگى دارىگەردىڭ ناۋقاستى تەپكىلەۋ وقيعاسىنا ءوز ۇستانىمىن ءبىلدىردى

استانا. قازاقپارات - ق ر دەنساۋلىق ساقتاۋ ۆيتسە- ءمينيسترى الەكسەي سوي تەمىرجول اۋرۋحاناسىندا بولعان جاعدايعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«ەندى، قۇزىرەتتى ورگاندار ءوز باعاسىن بەرە جاتار. دەگەنمەن، دارىگەردىڭ ەتيكاسى بويىنشا ادامعا كۇش كورسەتۋگە تىيىم سالىنعان. ارينە، ءبىر سەبەپتەر بولدى. ونى قۇقىق قورعاۋشىلار انىقتايدى. سوتتا دا ەكى جاق ءوز ۇستانىمىن ايتاتىن شىعار»، - دەدى ا. سوي جۋرناليستەرگە بەرگەن سۇحباتىندا.

ونىڭ ايتۋىنشا، توبەلەس كەزىندە كىم قانداي كوڭىل-كۇيدە بولدى، ءوز ارەكەتىنە جاۋاپ بەردى مە، جوق پا، وسىنىڭ ءبارىن جان-جاقتى قاراستىرۋ قاجەت.

«اشىعىن ايتۋ كەرەك، كەي كەزدە پاتسيەنتتەر قاتتى اۋىرىپ كەلەدى دە، ۇرسىپ سويلەيدى. ماس كۇيىندە كەلەتىندەر دە بولادى. سودان نەشە ءتۇرلى جاعدايلار تۋىندايدى. ەندى، بۇل جولعى جاعداي سولاي اياقتالدى. تەكسەرىس باستالدى. جاقىن ارادا ناقتى سەبەپتەرىن انىقتاپ جاريالايمىز»، - دەپ اتاپ كورسەتتى ا. سوي.

ايتا كەتەيىك، استاناداعى ورتالىق تەمىرجول اۋرۋحاناسى مەديتسينالىق قىزمەتكەردىڭ ناۋقاستى ساباۋ وقيعاسىن راستادى.

باس دارىگەر سەرگەي دەموچكيننىڭ ايتۋىنشا، ناۋقاس ادامدى 26 جاستاعى كەزەكشى تەراپيەۆت تەپكىلەگەن.

«سوققىعا جىعىلعان ناۋقاس اۋرۋحاناعا 2 -قازانعا قاراعان ءتۇنى باس جاراقاتىمەن ماس كۇيىندە جەتكىزىلگەن. ناۋقاس ءوزىن دورەكى ۇستاپ، مەديتسينالىق قىزمەتكەرلەردى بالاعاتتاعان. ونى كەزەكشى نەيروحيرۋرگ تەكسەرگەن جانە جاراسىن تاڭىپ، ۇيىنە جىبەرگەن. ءبىراق، اۋرۋحاناعا قايتىپ كەلىپ، جوعالعان تەلەفونىن تاۋىپ بەرۋدى تالاپ ەتكەن. سول ساتتە ناۋقاس اۋرۋحانانىڭ كەزەكشى تەراپيەۆتىنە ءتيىسىپ، جاقىن تۋىستارىن بالاعاتتاعان جانە بوكستان سپورت شەبەرى ەكەنىن ايتىپ، جەكپە-جەككە شاقىرعان. ءبىر رەت ۇرعاندا دارىگەر ەش جاۋاپ قايتارماعان، ال ەكىنشى رەت ۇرعاندا ناۋقاستى كەۋدەسىنەن يتەرگەن. جەرگە قۇلاعان ناۋقاستى اشۋمەن تەپكەن»، - دەدى س. دەموچكين.

وسىعان دەيىن ناۋقاستى سوققىعا جىققان دارىگەردىڭ جۇمىستان بوساتىلعاندىعى حابارلاندى. سونداي-اق وعان قاتىستى قىلمىستىق ءىس قوزعالدى.