ىستىق شايدىڭ ەشكىم كۇتپەگەن پايداسى انىقتالدى

استانا. قازاقپارات - عالىمدار زەرتتەۋ جۇرگىزىپ، ىستىق شايدىڭ قانداي پايداسىن بارىن انىقتادى.

زەرتتەۋ ناتيجەسى شايدى كوپ ىشەتىن ادامداردىڭ گلاۋكوماعا سيرەك شالدىعاتىنىن كورسەتتى. ماقالا British Journal of Ophthalmology باسىلىمىندا جاريالانعان.

گلاۋكوما كوزدىڭ كورمەي قالۋىنىڭ نەگىزگى سەبەبى بولىپ تابىلادى، ول كوزدىڭ ىشىندەگى قىسىمنان پايدا بولادى.

زەرتتەۋدە ىستىق نەمەسە جىلى شاي تۋرالى ايتىلادى. ءبىراق وتە ىستىق شاي جونىندە ەمەس، ويتكەنى ونكولوگيالىق اۋرۋلاردى زەرتتەۋ بويىنشا حالىقارالىق اگەنتتىكتىڭ مالىمدەۋىنشە، تىم ىستىق سۋسىن ىشكەن ادام وڭەش راگىنا شالدىعۋى مۇمكىن.

عالىمدار ا ق ش- تا جۇرگىزىلگەن ۇلتتىق ساۋالنامانىڭ ناتيجەسىنە ساراپتاما جۇرگىزگەن. بەلگىلى بولعانداي، 1600 ازاماتتىڭ تەك بەس پايىزىندا عانا گلاۋكوما بار ەكەن. كوفە نەمەسە سۋىق شاي ىشەتىن ادامداردىڭ كوز كورۋى ناشارلاي باستاعانى انىقتالدى.

وسىلايشا، عالىمدار ىستىق شاي ءىشۋ مەن گلاۋكوما اۋرۋىنا شالدىقپاۋ اراسىنداعى بايلانىستى تاپتى. مۇنى شايدىڭ قۇرامىنداعى كوفەينمەن تۇسىندىرۋگە بولادى. كوفەنىڭ قۇرامىندا دا كوفەين بولعانىمەن، ونىڭ گلاۋكومامەن بايلانىسى ىستىق شاي سەكىلدى ەمەس.

زەرتتەۋشىلەردىڭ ايتۋىنشا، شايدىڭ قۇرامىنداعى فلاۆونويدتاردىڭ قابىنۋعا قارسى جانە انتيوكسيدانتتىق قاسيەتى بار، ول كوزدى اۋرۋلاردان قورعاي الادى. بۇدان بولەك، شايداعى انتيوكسيدانتتار كوز جاسۋشالارىنىڭ جاپپاي جويىلۋىن باسەڭدەتەدى.