مادەنيەت مينيسترلىگى قىزمەتكەرلەرى ناۋقاستانعان تىلشىگە ءبىر كۇندىك جالاقىسىن اۋدارماق

استانا. قازاقپارات - مادەنيەت جانە سپورت مينيسترلىگى قىزمەتكەرلەرى ءبىر كۇندىك جالاقىلارىن اۋىر ناۋقاسقا شالدىققان سپورت جۋرناليسى گالينا پوليەۆاياعا اۋداراتىن بولدى.

مادەنيەت جانە سپورت ءمينيسترى ارىستانبەك مۇحامەدي ۇلى بەلگىلى سپورت جۋرناليسىنە ەل بولىپ كومەكتەسۋ قاجەتتىگىن ايتتى، دەپ حابارلايدى قازاقپارات ءتىلشىسى ۆەدومستۆونىڭ باسپا ءسوز قىزمەتىنە سىلتەمە جاساپ.

«گالينا پوليەۆايا - ەلىمىزدە سپورت جۋرناليستيكاسىنىڭ دامۋىنا زور ۇلەس قوسقان تۇلعا. بىرنەشە وليمپيادا، ازيا ويىندارىنا قاتىسىپ، سپورتشىلارىمىزدىڭ جارقىن جەڭىستەرىن كوگىلدىر ەكران ارقىلى ەلگە جەتكىزگەن گالينانىڭ ەندى ءوزى دە جەڭىسكە جەتۋى ءتيىس. مەن ءبارى جاقسى بولاتىنىنا سەنەمىن»، - دەدى مينيستر.

ايتا كەتسەك، بۇعان دەيىن ق ر مادەنيەت جانە سپورت مينيسترلىگى استانا قالاسىنىڭ اكىمدىگىمەن بىرلەسىپ، 6 -قازان كۇنى ساعات 10.00-دە «ستوليچنىي» ساياباعىندا گالينا پوليەۆايانى قولداۋ ماقساتىندا جەڭىل اتلەتيكالىق جۇگىرۋ (ەرلەر -2,5 ك م، ايەلدەر - 1,5 ك م) قايىرىمدىلىق شاراسىن ۇيىمداستىراتىنىن حابارلاعان بولاتىن.

ەستەرىڭىزدە بولسا، ءبىز جۋرناليست گالينا پوليەۆايانىڭ اۋىر ناۋقاسقا شالدىعىپ، ونىڭ وتباسى حالىقتان كومەك سۇراعانىن جازعان بولاتىنبىز. بۇگىنگى تاڭدا گاليناعا قۇنى قىمبات، شەتەلدە جاسالۋى ءتيىس وتا قاجەت. شەتەلدىك ەمحانا اتالعان وتانى 290 مىڭ دوللارعا باعالاپ وتىر. ونىڭ وتباسى ءۇشىن بۇل سوما وتە ۇلكەن. بارلىق تۇرعىندار مەن قالا قوناقتارى، ب ا ق وكىلدەرى اتالعان شاراعا بەلسەنە اتسالىسا الادى. جينالعان قاراجات جۋرناليستىڭ وتباسىنا تابىستالادى.