اسىلحان تولەپوۆ ءتۇن ىشىندە «ايەلىڭ ادەمى ەمەس» دەپ حات جازاتىن قىزدار جايلى ايتتى

 استانا. قازاقپارات - تاياۋدا عانا اكە اتانعان اسىلحان تولەپوۆتىڭ تۇڭعىشى دۇنيەگە كەلگەلى ءومىرى كۇرت وزگەرىپتى. بۇرىندارى ۋاقىتىنىڭ باسىم بولىگىن تۇزدە وتكىزەتىن ونەر يەسى، قازىرگى تاڭدا قولى قالت ەتسە ۇيگە قاراي اسىعادى.

 Stan.kz اقپاراتتىق اگەنتتىگىنىڭ تىلشىسىمەن سۇحباتتاسقان جاس اكە، جەكە ومىرىندەگى جاڭالىقتارىمەن ءبولىستى.

«ءيا، اللاعا شۇكىر اكە اتاندىم. ەسىمىن اتاسى قويدى. سايلاۋ الپامىس اسىلحان ۇلى. سايلاۋ - اكەمنىڭ اتى. پەرزەنتحاندان شىعاراتىن كەزدە ب ا ق وكىلدەرىن شاقىرمادىق. وتباسىلىق قۋانىش بولعان سوڭ، ءوزىم سەزىنە بىلەيىنشى دەگەن وي عوي. كەلىنشەگىمنىڭ قاسىندا انام بولدى. ءبىر اپتاداي اسپاندا قالقىپ ۇشىپ ءجۇردىم. قازىر ۇيگە اسىعىپ تۇرامىن. تۇسىرىلىمدە جۇرسەم دە كەلىنشەگىمە جازىپ، ۇلىمدى سۋرەتكە ءتۇسىرىپ جىبەرشى دەيمىن. ساعىنىپ وتىرادى ەكەنسىڭ. (كۇلەدى) » ، - دەيدى جاس اكە.

وتكەن جىلدىڭ قاراشاسىندا شاڭىراق كوتەرگەن اسىلحان، جۇبايىمەن جۇرت نازارىندا ءجيى جۇرگەندى قالامايدى ەكەن. ونەر يەسىنىڭ ويىنشا، ءار قادامىن جەلىگە جۇكتەيتىن وتاندىق شوۋ- بيزنەستەگى ارتىستەردىڭ قۇپياسى قالماعان.

«جەكە ءومىر بولعان سوڭ، قۇپيا بولعانىن قالايمىن. تويدان كەيىن 1-2 رەت سۋرەت سالدىم، بالالى بولعانىمدى سالدىم. شىنى كەرەك مەنىڭ جەكە ءومىرىم كىمگە قىزىق؟ .. مەن ويلايمىن كورەرمەنگە دە ءبىر نارسەنىڭ جۇمباق بولعانى دۇرىس سياقتى. «مىسالى، مەن ۇيقىدان تۇردىم، ەرتەڭ مىنا جەرگە بارامىن. مەنىڭ كەلىنشەگى مىناداي. مىنا جەردەن كيىم الدىم» - دەپ جاريا قىلسام، ءبىر قىزىق قالمايتىن سياقتى. بىرنەشە اي وقىرماندار باعالايدى. ۋاقىت وتكەننەن كەيىن باسقا وتباسى شىعادى. سوعان اۋىسىپ كەتەدى. سوندىقتان قۇپيا بولعانى دۇرىس سياقتى. نەگىزى ءتىل- كوز دەگەن ۇعىم بار عوي» ، - دەيدى اسىلحان تولەپوۆ.

ءبىر قىزىعى بويداقتىق ومىرمەن قوش ايتىسقان اسىلحانعا قىزدار قاۋىمى ءالى كۇنگە دەيىن تىنىشتىق بەرمەيتىن كورىنەدى. تولەپوۆكە تۇندە قوڭىراۋ شالىپ، رومانتيكاعا تولى ءتۇرلى حاتتار جولدايدى ەكەن.

«تۇندە تەلەفونعا حابارلاسقاندا تۇسىنبەي قالامىن. ماڭىزدى ءبىر شارۋامەن حابارلاسىپ تۇر دەپ تۇتقانى كوتەرسەڭ، «اللو» دەپ ۇندەمەي تۇرادى. كوبىنەسە جاس قىزدار عوي. بىرەۋلەر نەگە ۇيلەنىپ كەتتىڭ، دەيدى. «كەيبىرەۋلەرى نەگىزى ساعان لايىقتى قىز مەن ەدىم» دەگەن حاتتار جازادى. «ايەلىڭ ادەمى ەمەس قوي. مەن ادەمىمىن» عوي دەپ ءوزىنىڭ سۋرەتىن جىبەرەتىن قىزدار دا بار. (كۇلەدى) كەي كەزدەرى سىزبەن تەك كەزدەسىپ، تاماق ىشكىم كەلەدى دەگەن قارىنداستىرىمىز دا بولادى. كينوعا شاقىراتىندار دا بار» ، - دەيدى اكتەر.

ءبىراق بۇل وتباسىندا قىزعانىشقا ورىن جوق. اسىلحانعا عاشىق قىزداردىڭ قىلىعىن، كەلىنشەگى كوڭىلىنە المايدى. ويتكەنى، بۇل تاقىرىپ تويعا دەيىن تالاي رەت تالقىلانعان.

«كەلىنشەگىم كىم ول، نە ءۇشىن حابارلاستى؟ » - دەپ سۇرامايدى. مۇمكىن بارلىعى ىشىندە شىعار. ءبىراق قىزعانبايدى. باستاپقىدا بارلىعىن ايتقانمىن. ماعان قىزدار حابارلاسادى. وسىلاي- وسىلاي بولادى. مەنىڭ ورتام ۇلكەن دەگەن سياقتى تۇسىندىرگەنمىن» ، - دەيدى اسىلحان.