بايان- ولگەيدە قازاق باتىرىنا ەسكەرتكىش قويىلدى

ولگەي. قازاقپارات - قازاق- جوڭعار سوعىستارى مەن قازاق- قىتاي قاتىناسى كەزىندە ەرلىگىمەن جانە ديپلوماتيالىق قابىلەتىمەن كوزگە تۇسكەن قوجابەرگەن باتىر جانىبەك ۇلىنا موڭعوليانىڭ بايان- ولگەي ايماعىنىڭ ورتالىعىندا ەسكەرتكىش قويىلدى، دەپ حابارلايدى قازاقپارات.

 بۇل تۋرالى حالىقارالىق تۇركى حالىقارالىق اكادەمياسىنىڭ باسپا ءسوز قىزمەتى حابارلادى.

ءمۇسىن باتىردىڭ 320 جىلدىق مەرەيتويىنا وراي جاسالعان. تۇعىرىنان باستاپ، ۇستاعان تۋىنىڭ ۇشىنا دەيىنگى بيىكتىگى 7 مەتر بولاتىن ەسكەرتكىش ۇلانباتىر قالاسىندا، باتىر ۇرپاقتارىنىڭ قارجىسىنا جاسالعان. ەسكەرتكىشكە ولگەي قالاسىنىڭ اكىمدىگى ارنايى جەر تەلىمىن ءبولدى.

 ەسكەرتكىشتىڭ اشىلۋ سالتاناتىنا ايماق باسشىسى عىلىمحان ايىپ، ايماقتىق قۇرىلتاي باسشىسى باۋىرجان دالەل ۇلى، زيالى قاۋىم وكىلدەرى، قازاقستاننان بارعان باتىر ۇرپاقتارى مەن جەرگىلىكتى تۇرعىندار قاتىستى. ەڭسەلى ەسكەرتكىشكە «قوجابەرگەن باتىر جانىبەك ۇلى - 320 جىل» دەپ جازىلعان.

 ۇيىمداستىرۋشىلار بولاشاقتا ەسكەرتكىشتىڭ قوس قاپتالىنا باتىردىڭ جوڭعار حانزاداسى امىرسانامەن بىرگە قىتايعا قارسى جۇرگىزگەن جورىقتارى جايلى ارحيۆتە ساقتالعان قۇجاتتاردان ۇزىندىلەر جازىلعان تاقتا ورناتۋدى جوسپارلاپ وتىر. ارحيۆتەردەن، اسىرەسە قىتايداعى تسين پاتشالىعىنىڭ ورتالىق ارحيۆىنەن قوجابەرگەن باتىر جانىبەك ۇلى مەن ءامىرسانانىڭ 1756-57 -جىلدارى بىرگە جۇرگەنى، اياگوز وڭىرىندە بولعان قازاق- قىتاي شايقاسىنان سوڭ تسين يمپەرياسىنىڭ اسكەرلەرىنە قارسى تىزە قوسا كۇرەس جۇرگىزگەنى، كەيىن قوجابەرگەن باتىردىڭ قازاق حاندىعى مەن قىتايدىڭ اراسىنداعى ساۋدا- ساتتىقتا بەلسەندى ءرول اتقارعانى تۋرالى دەرەكتەر تابىلعان.

 بيىل باتىردىڭ تۋعانىنا 320 جىل تولىپ وتىر. وسىعان وراي موڭعوليادا باستالعان شارا استانادا جالعاسىپ، 19 - قازاندا ق ر قورعانىس مينيسترلىگى اسكەري- تاريحي مۋزەيى مەن ش. ءۋاليحانوۆ اتىنداعى تاريح جانە ەتنولوگيا ينستيتۋتى بىرلەسىپ، باتىرعا ارنالعان حالىقارالىق كونفەرەنتسيا وتكىزۋدى جوسپارلاپ وتىر. باتىردىڭ شاپانىن ۇرپاقتارى بيىل اسكەري- تاريحي مۋزەيىنە تاپسىرسا، جورىقتا ۇستاعان تۋى موڭعوليانىڭ بايان- ولگەي ايماعىنداعى ۇرپاقتارىنىڭ قولىندا ساقتاۋلى.